Read Dikateny Iombonana Eto Madagasikara Nomerỳ 21 Bible Online

Nomerỳ 21 - Dikateny Iombonana Eto Madagasikara bible

Nomerỳ 21

¹Rehefa ren’ilay Kanahanita mpanjakan’i Harada, izay nonina tany amin’ny faritra atsimo, fa tonga avy tamin’ny lalan’i Atarima ny Israelita[82], dia notafihiny ireo ary nobaboiny ny sasany taminy.

²Koa nivoady tamin’ny TOMPO ireo Israelita ka nanao hoe: — Raha atolotrao eo an-tananay io firenena io, dia hataonay levona ny tanànany.

³Nohenoin’ny TOMPO ny voadin’ny Israelita ka natolony azy ny Kanahanita. Dia nataon’ny Israelita levona izy ireo mbamin’ny tanànany; ary ny anaran’izany toerana izany dia natao hoe Hôrmà[83].

⁴Niala tao an-tendrombohitra Hôra ny Israelita, ka nihazo tamin’ny lalan’ny Ranomasin’ny Volotara hanodidina ny tanin’i Edôma[84]. Teny an-dalana anefa dia very toky ny vahoaka.

⁵Koa nanomboka nanakiana an’Andriamanitra sy i Mosesy ny olona nanao hoe: — Nahoana no nentinareo niala tany Ejipta mba ho faty atỳ an-taniefitra izahay? Atỳ anefa tsy misy na mofo na rano, ary efa leon’itony mofomofo ratsy na hoe mana itony izahay.

⁶Koa nandefasan’ny TOMPO bibilava misy poizina ny vahoaka; ary nokekerin’ireo bibilava ireo ny Israelita ka marobe no maty noho izany[85].

⁷Dia nankeo amin’i Mosesy ny vahoaka sisa ka nanao hoe: — Efa nanota izahay fa nanome tsiny ny TOMPO sy ny tenanao. Koa ifony re ny TOMPO mba hanala ireo bibilava ireo aminay. Dia nifona ho an’ny vahoaka i Mosesy.

⁸Ary hoy ny TOMPO taminy: — Manaova bibilava varahina dia ahantony amin’ny hazo lava fa izay rehetra voakaikitra, ka mijery izany, dia ho velona sady afa-doza.

⁹Dia nanao bibilava varahina i Mosesy ka nahantony tamin’ny hazo lava. Ary nisy olona voakaikitry ny bibilava misy poizina ka mijery ilay bibilava varahina, dia velona[86].

¹⁰Niainga ny Israelita ka nitoby tao Ôbôta.

¹¹Niala teo Ôbôta izy, dia nitoby tao Hije-Habarîma ao amin’ny taniefitra atsinanan’i Môaba.

¹²Niala teo izy, dia nitoby teo amoron’ny ranon-driaka Zareda.

¹³Niala teo indray izy, dia nitoby tao an-dafin’ny renirano Arnôna izay mipoitra any amin’ny faritanin’ny Amôrita ary mamakivaky ny taniefitra, vao manamorona ny sisin-tanin’i Môaba ka mampisaraka ny faritry ny Môabita sy ny faritry ny Amôrita.

¹⁴Izany no ilazana ao amin’ny Bokin’ireo adin’ny TOMPO hoe: «...i Vaheba any Sofà sy ny sakeli-dranony; i Arnôna

¹⁵izay ombàn’ny sakeli-dranony ka mitsontsorika mankany Hàra ary manaraka ny sisin-tanin’i Môaba...»

¹⁶Niala teo indray ny Israelita, dia nankany Beèra (na hoe Fantsakana). Teo no nitenenan’ny TOMPO tamin’i Mosesy hoe: — Angony ny vahoaka fa homeko rano.

¹⁷Tamin’izay indrindra no nihiran’ny Israelita izao hira izao: «Aoka ianao hiboiboika rano, ry fantsakana, ka hanaovanay fihobiana!

¹⁸Fantsakana nohadin’ireo filoha nombàn’ny tehim-pahefàny; fantsakana nolavahan’ireo loholona nombàn’ny tehim-pifehezany.» Rehefa niala tao an-taniefitra ny Israelita, dia nankany Matanà.

¹⁹Niala teo Matanà izy, dia nankany Mahaliela; niala teo, dia nankany Bamôta;

²⁰ary farany, rehefa niala tao Bamôta izy, dia nankany an-dohasaha mamaky ny tanin’i Môaba, ka tafapaka hatrany an-tampon’i Pisgà izay ahatazanana ny taniefitra.

²¹Naniraka olona nankany amin’i Sihôna mpanjakan’ny Amôrita ny Israelita nanao hoe:

²²— Mba avelao re izahay hamaky eo amin’ny taninao. Tsy hamaky any amin’ny saha na ny tanimboaloboka izahay, ary tsy hisotro amin’ny ranom-pantsakana; fa ny lalam-panjakana[87] ihany no hizoranay mandra-pahafakay ny faritry ny taninao.

²³Nefa i Sihôna tsy namela ny Israelita hamaky eo amin’ny taniny; fa nangoniny avokoa ny tafiny rehetra, ka lasa izy nitsena ny Israelita hatrany Jahatsà, any an-taniefitra ary niady taminy tao.

²⁴Nasian’ny Israelita tamin’ny lelan-tsabatra kosa i Sihôna ka azony ny taniny voafaritr’i Arnôna ao atsimo sy i Jabôka ao avaratra ary ny sisin-tanin’ny Hamônita, dia ilay sisin-tany ao atsinanana.

²⁵Nalain’ny Israelita avokoa ny tanànan’ny Amôrita ka nonenany hatramin’i Hesbôna sy ny tanàna manodidina azy.

²⁶I Hesbôna no renivohitr’i Sihôna mpanjakan’ny Amôrita, rehefa avy niady tamin’ny mpanjakan’i Môaba teo aloha izy ka naka ny taniny rehetra hatrany Arnôna.

²⁷Izany no nanaovan’ny poety hoe: «Mankanesa ao Hesbôna ianareo. Enga anie ho voatsangana indray ary ho voaorina, toy ny teo aloha ilay renivohitr’i Sihôna[88]!

²⁸Fa nisy afo nivoaka avy tao Hesbôna, nisy lelafo avy tao an-drenivohitr’i Sihôna ka nandevona an’i Hara-Môaba, sy ireo tompon’ny havoan’i Arnôna.

²⁹Loza no nihatra taminao, ry Môaba! Ringana ianao, ry firenena izay mpivavaka tamin’i Kemôsy! Na ny lehilahy izay nikasa handositra na ny vehivavy dia samy nafoin’i Kemôsy ho babon’i Sihôna, mpanjakan’ny Amorita[89].

³⁰Kanefa notifirinay zana-tsipîka ny Amôrita. Rava i Hesbôna hatrany Dibôna. Nofoananay avokoa hatrany Nôfà ary hatrany Medebà[90] mihitsy aza.»

³¹Toy izany no nitoeran’ny Israelita teo amin’ny tanin’ny Amôrita.

³²Naniraka olona hisafo an’i Jahezera i Mosesy; dia nalain’ny Israelita izany tanàna izany sy ireo tanàna kely miankina aminy ary noroahiny ny Amôrita izay nipetraka tao.

³³Avy eo dia nivily lalana nankany Basàna ireo Israelita. Dia tamy nitsena azy i Hôga, mpanjakan’i Basàna, sy ny tafiny manontolo mba hiady aminy tao Edrehỳ.

³⁴Ka hoy ny TOMPO tamin’i Mosesy: — Aza matahotra azy, fa hatolotro eo an-tananao izy sy ny tafiny manontolo ary ny taniny; ka tahaka ny nanaovanao an’i Sihôna, mpanjakan’ny Amôrita, izay nanjaka tao Hesbôna, no hataonao aminy.

³⁵Dia nasian’ny Israelita tsy nisy niangana i Hôga sy ny zanany ary ny tafiny manontolo, ka lasany ny taniny.