Read Dikateny Iombonana Eto Madagasikara Nomerỳ 25 Bible Online

Nomerỳ 25 - Dikateny Iombonana Eto Madagasikara bible

Nomerỳ 25

¹Nitoby tao Sitima ny Israelita ka nanomboka nijangajanga tamin’ny vehivavy môabita,

²izay nitarika azy hanao sorona amin’ireo andriamaniny.

³Nanolo-tena hivavaka tao Bahala-Pehôra ny Israelita, ka nirehetan’ny fahatezeran’ny Tompo.

⁴Dia hoy ny TOMPO tamin’i Mosesy: — Alao ny filohan’ny vahoaka; dia eo anoloako no anantony azy manatrika ny masoandro, mba hampitony ny fahatezerako mirehitra aminareo Israelita.

⁵Dia hoy i Mosesy tamin’ny mpitsara israelita: — Aoka ianareo tsirairay avy samy hamono hahafaty ny olom-peheziny izay nanolo-tena hivavaka tao Bahàla-Pehôra!

⁶Tamin’izay fotoana izay, dia nisy lehilahy israelita iray nitondra vehivavy midianita hankeo amin’ny mpiray foko aminy, teo imason’i Mosesy sy ny Fiangonana israelita manontolo izay nitomany teo am-baravaran’ny Tranolay fihaonana.

⁷Raha nahita izany i Pinehasa, zanakalahin’i Elehazara sady zafikelin’i Aharôna mpisorona, dia nitsangana teo anivon’ny Fiangonana ka nandray lefona;

⁸narahiny hatrany an-dainy ilay lehilahy israelita ka nolefoniny niaraka tamin’ny vadiny tao. Dia nitsahatra ny areti-mandringana namely ny Israelita.

⁹Ireo matin’io areti-mandringana io dia nahatratra 24 000.

¹⁰Ary niteny tamin’i Mosesy ny TOMPO ka nanao hoe:

¹¹— I Pinehasa, zanakalahin’i Elehazara sady zafikelin’i Aharôna mpisorona, no nampiala ny fahatezerako tamin’ny Israelita satria niseho ho saro-piaro momba Ahy teo anivon’izy ireo; ka dia tsy nataoko lany ringana ny Israelita, na dia saro-piaro amin’ny maha Andriamanitra Ahy aza Aho.

¹²Noho izany, dia lazao an’i Pinehasa fa omeko azy ny fanekempihavanako ho loharanom-piadanana;

¹³izany fanekempihavanana izany dia hahatonga ny tenany sy ny taranany ho mpisorona hatrany, satria niseho ho saro-piaro momba Ahy i Pinehasa ka nahazo famelan-keloka ho an’ny Israelita.

¹⁴Ilay Israelita, izay novonoina ho faty niaraka tamin’ilay vehivavy midianîta, dia i Zimrỳ zanakalahin’i Salò sady filoham-pianakaviana simehônita.

¹⁵Ary ilay vehivavy midianîta maty kosa dia i Kôzbỳ, zanakalahin’i Tsora izay filoham-pianakaviana midianîta.

¹⁶Niteny tamin’i Mosesy indray ny TOMPO ka nanao hoe:

¹⁷— Tafiho ny Midianîta ka aringano,

¹⁸fa fahavalo mpamitaka anareo tamin’ny raharahan’i Pehôra sy tamin’ny raharahan’i Kôzbỳ izay zanakavavin’ny manampahefana midianîta anankiray, ka maty novonoina tamin’ny andron’ny areti-mandringana vokatry ny raharahan’i Pehôra.