Read Dikateny Iombonana Eto Madagasikara Nomerỳ 26 Bible Online

Nomerỳ 26 - Dikateny Iombonana Eto Madagasikara bible

Nomerỳ 26

¹Taorian’io loza io, dia hoy ny TOMPO tamin’i Mosesy ary tamin’i Elehazara mpisorona sady zanakalahin’i Aharôna:

²— Manaova fanisàm-bahoaka isam-pianakaviana eo amin’ny Fiangonan’i Israely, dia izay lehilahy rehetra roapolo taona no ho miakatra ka mahatam-piadiana[101].

³Teo amin’ny lemak’i Môaba amoron’i Jôrdàna tandrifin’i Jerikao no nitenenan’i Mosesy sy i Elehazara mpisorona tamin’ireo Israelita ka nanambarany

⁴fa, araka izay nandidian’ny TOMPO an’i Mosesy, dia hanaovana fanisana ny lehilahy rehetra roapolo taona no ho miakatra. Ireto avy àry ireo Israelita izay niala tany Ejipta:

⁵Ny taranak’i Reobena, lahimatoan’i Israely, dia nisy ireto tarika ireto: ny Hanôkita avy tamin’i Hanôka; ny Paloita avy tamin’i Palò;

⁶ny Hetsirônita avy tamin’i Hetsirôna; ny Karmita avy tamin’i Karmỳ.

⁷Ireo no tarika robenita; ary 43 730 no isan’ny lehilahy mahatam-piadiana tao aminy[102].

⁸Ny zanakalahin’i Palò anankiray dia i Eliaba,

⁹izay rain’i Nemoela sy i Datàna ary i Abirama. Ireo Datàna sy i Abirama ireo no solotenan’ny Fiangonana izay nanohitra an’i Mosesy sy i Aharôna; niaraka tamin’ny tarik’i Kôra izy roa lahy raha nikomy tamin’ny TOMPO izy ireo.

¹⁰Nisokatra ny tany ka nitelina azy ireo mbamin’i Kôra, tamin’ny andro nahafatesan’ny tariny sy nandevonan’ny afo lehilahy 250 izay natao ho ohatra ho an’ny vahoaka sisa.

¹¹Kanefa ireo zanakalahin’i Kôra kosa tsy mba maty.

¹²Ny taranak’i Simehôna, araka ny tarika tao aminy, dia izao: ny Nemoelita avy tamin’i Nemoela; ny Jaminita avy tamin’i Jamina; ny Jakinita avy tamin’i Jakina;

¹³ny Tsôharita avy tamin’i Tsôhara; ny Saolita avy tamin’i Saoly.

¹⁴Ireo no tarika simehônita; ka nisy 22 200 ny lehilahy mahatam-piadiana tao aminy.

¹⁵Ny taranak’i Gada, araka ny tarika tao aminy, dia izao: ny Tsefônita avy tamin’i Tsefôna; ny Hagita avy tamin’i Hagỳ; ny Sonita avy tamin’i Sonỳ;

¹⁶ny Oznita avy tamin’i Oznỳ; ny Herîta avy tamin’i Herỳ;

¹⁷ny Arôdita avy tamin’i Arôda; ny Arelîta avy tamin’i Arelỳ.

¹⁸Ireo no tarika gadita; ka nisy 40 500 ny lehilahy mahatam-piadiana tao aminy, araka ny nanisana azy.

¹⁹Ny taranak’i Joda, araka ny tarika tao aminy, dia: ny Selanita avy tamin’i Sela; ny Peritsita avy tamin’i Peretsa; ny Zerahita avy tamin’i Zerà. Ny taranak’i Peretsa dia nisy fianakaviambe anankiroa: ny Hetsirônita avy tamin’i Hetsirôna ary ny Hamôlita avy tamin’i Hamòla. Ny zanak’i Joda roa lahy, i Hera sy i Ônana, anefa dia maty tany Kanahana.

²⁰

²¹

²²Ireo no tarika tao amin’ny fokon’i Joda; ka nisy 76 500 ny lehilahy mahatam-piadiana tao aminy, araka ny nanisana azy.

²³Ny taranak’i Jisakara, araka ny tarika tao aminy, dia izao: ny Tôlahita avy tamin’i Tôlà; ny Povanîta avy tamin’i Povà;

²⁴ny Jasobita avy tamin’i Jasoba; ny Simrônita avy tamin’i Simrôna.

²⁵Ireo no tarika isakarita; ka nisy 64 300 ny lehilahy mahatam-piadiana tao aminy, araka ny nanisana azy.

²⁶Ny taranak’i Zebolòna, araka ny tarika tao aminy dia izao: ny Seredita avy tamin’i Sereda; ny Elônita avy tamin’i Elôna; ny Jahilielîta avy tamin’i Jahiliela.

²⁷Ireo no tarika zebolonita; ka nisy 60 500 ny lehilahy mahatam-piadiana tao aminy, araka ny nanisana azy.

²⁸Ny taranak’i Jôsefa, araka ny fokony avy, dia ny Manasita sy ny Efraîmita.

²⁹Ny fokon’i Manase dia nisy ireto tarika ireto: ny Makirita avy tamin’i Makira; ny Gilehadita avy tamin’i Gilehada zanakalahin’i Makira.

³⁰Ny taranak’i Gilehada dia ireto fianakaviana ireto: ny Ihezerîta avy tamin’i Ihezera, ny Helekita avy tamin’i Heleka,

³¹ny Asrielita avy tamin’i Asriela, ny Sekemita avy tamin’i Sekema,

³²ny Semidita avy tamin’i Semida, ary ny Heferita avy tamin’i Hefera.

³³I Tselôfahàna zanakalahin’i Hefera, tsy mba nanan-janakalahy, fa zanakavavy ihany ka ireto avy no anarany: i Mahelà, Nôhà, Hôglà, Milkà ary Tiritsà.

³⁴Ireo no tarika manasita; ka nisy 52 700 ny lehilahy mahatam-piadiana tao aminy, araka ny nanisana azy.

³⁵Ny fokon’i Efraîma, araka ny tarika tao aminy, dia izao: ny Sotelahita avy tamin’i Sotelà; ny Bekerita avy tamin’i Bekera; ny Tahanita avy tamin’i Tahàna.

³⁶Ny fianakaviamben’ny Heranita dia avy tamin’i Heràna, zanakalahin’i Sotelà.

³⁷Ireo no tarika efraimita; ka nisy 32 500 ny lehilahy mahatam-piadiana tao aminy, araka ny nanisana azy. Ireo no taranak’i Jôsefa, araka ny fokony avy.

³⁸Ny taranak’i Benjamîna, araka ny tarika tao aminy, dia izao: ny Belahîta avy tamin’i Belà; ny Asbelita avy tamin’i Asbela; ny Ahiramita avy tamin’i Ahirama;

³⁹ny Sofamita avy tamin’i Sofama; ary ny Hofamita avy tamin’i Hofama.

⁴⁰Ny taranak’i Belà dia nisy fianakaviambe anankiroa: ny Ardita, avy tamin’i Arda, ary ny Nahamita avy tamin’i Nahamàna.

⁴¹Ireo no tarika benjaminita; ka nisy 45 600 ny lehilahy mahatam-piadiana tao aminy, araka ny nanisana azy.

⁴²Tarika tokana ihany kosa ny taranak’i Dana, dia ny Sohamita avy tamin’i Sohama.

⁴³Ny tarika sohamita manontolo dia nisy 64 400 ny lehilahy mahatam-piadiana tao aminy, araka ny nanisana azy.

⁴⁴Ny taranak’i Asera, araka ny tarika tao aminy, dia izao: ny Jimnita avy tamin’i Jimnà; ny Jisvita avy tamin’i Jisvỳ; ny Berihîta avy tamin’i Berihà.

⁴⁵Ny fianakaviambe avy tamin’ny taranak’i Berihà dia ny Heberita avy tamin’i Hebera ary ny Malkielita avy tamin’i Malkiela.

⁴⁶I Asera dia nanan-janaka vavy natao hoe Serà.

⁴⁷Ireo no tarika aserita; ka nisy 53 400 ny lehilahy mahatam-piadiana tao aminy, araka ny nanisana azy.

⁴⁸Ny taranak’i Naftalỳ, araka ny tarika tao aminy, dia izao: ny Jahatsielîta avy tamin’i Jahatsiela; ny Gonita avy tamin’i Gonỳ;

⁴⁹ny Jetserîta avy tamin’i Jetsera; ary ny Silemita avy tamin’i Silema.

⁵⁰Ireo no tarika naftalita; ka nisy 45 400 ny lehilahy mahatam-piadiana tao aminy, araka ny nanisana azy.

⁵¹Ny fitambaramben’ny lehilahy israelita mahatam-piadiana dia nahatratra 601 730.

⁵²Niteny tamin’i Mosesy ny TOMPO ka nanao hoe:

⁵³— Hozaraina amin’ireo foko ireo ny tany arakaraka ny isan’ny olona ao aminy.

⁵⁴Ny foko izay maro an’isa dia homenao zaratany lehibe kokoa, fa izay vitsy kosa dia homenao kelikely kokoa; arakaraka ny isany ihany no hanomezanao ny zaratany.

⁵⁵Antsapaka anefa no hizaràna ny tany, na dia araka ny habetsahan’ny olona isam-poko, aza.

⁵⁶Antsapaka izany no hanapahana izay faritra homena ny foko maro an’isa sy ny foko vitsy an’isa[103].

⁵⁷Toy izao no voaisa ho taranak’i Levỳ, araka ny tarika tao aminy: ny Gersônita avy tamin’i Gersôna; ny Kehatita avy tamin’i Kehata; ny Merarita avy tamin’i Merarỳ.

⁵⁸Toy izao ny fianakaviambe levita: ny Libnita sy ny Hebrônita, ny Mahalita sy ny Mosita ary ny Kôrahita[104]. I Kehata no niteraka an’i Hamrama

⁵⁹izay nanambady an’i Jôkebeda zanakavavy naterak’i Levỳ tany Ejipta. Io Jôkebeda io no nanome zanaka telo an’i Hamrama dia i Aharôna sy i Mosesy mirahalahy ary i Miriama anabaviny.

⁶⁰I Aharôna dia niteraka an’i Nadaba sy i Abihò ary i Elehazara sy i Itamara[105].

⁶¹Fa i Nadaba sy i Abihò dia maty, fony nandoro vovo-javamanitra tsy sahaza teo anatrehan’ny TOMPO[106].

⁶²Ny fitambaran’ny lehilahy levita rehetra nihoatra ny iray volana dia 23 000. Tsy niara-natao fanisana tamin’ny Israelita izy, satria tsy mba nomena zaratany teo anivon’ny Israelita.

⁶³Ireo no vokatry ny fanisàm-bahoaka nataon’i Mosesy sy i Elehazara mpisorona tamin’ny Israelita tao amin’ny lemak’i Môaba, amoron’i Jôrdàna tandrifin’i Jerikao.

⁶⁴Tamin’izy ireo dia tsy nahitana na iray aza tamin’izay efa voaisan’i Mosesy sy i Aharôna mpisorona tamin’ny fanisàm-bahoaka natao tamin’ny Israelita tany an-taniefitr’i Sinay,

⁶⁵satria ny TOMPO efa nilaza fa ho faty any an-taniefitra ireo. Koa tsy nisy niangana tamin’ireo, afa-tsy i Kaleba zanakalahin’i Jefone ary i Josoa zanakalahin’i Nona[107].