Read Dikateny Iombonana Eto Madagasikara Nomerỳ 27 Bible Online

Nomerỳ 27 - Dikateny Iombonana Eto Madagasikara bible

Nomerỳ 27

¹Nisy ireo zanakavavin’i Tselôfehada, zanakalahin’i Hefera sy zafin’i Gilehada, ary zafiafin’i Makira sy zafindohalik’i Manase; ireo vehivavy ireo, izay avy tamin’ny fokon’i Manase zanak’i Jôsefa, dia i Mahalà sy i Nôhà, i Hôglà sy i Milkà ary i Tiritsà.

²Niseho tamin’i Mosesy sy i Elehazara mpisorona ary ny tompon’andraikitra sy ny fiangonana manontolo teo anoloan’ny varavaran’ny Tranolay fihaonana izy ireo, ka nanao hoe:

³— Maty tany an-taniefitra ny rainay, nefa tsy mba isan’ny tarik’i Kôra izay niara-nioko hiodina tamin’ny TOMPO; fa matin’ny fahotany ihany izy, nefa tsy nanan-janakalahy.

⁴Koa rariny ve raha ho very anarana eo amin’ny tarika misy azy ny rainay, na dia tsy mba nanan-janakalahy aza? Mba omeo zaratany ho fanananay àry izahay tahaka ny natao ho an’ny ireo rahalahin-drainay!

⁵Nentin’i Mosesy teo amin’ny TOMPO ny fitarainan’izy dimy mirahavavy.

⁶Ary niteny tamin’i Mosesy ny TOMPO ka nanao hoe:

⁷— Marina ny an’ireo zanakavavin’i Tselôfehada, koa omeo zaratany ho fananany tahaka ireo rahalahin-drainy tokoa izy ka afindrao aminy ny anjaran-drainy.

⁸Ary hiteny amin’ny Israelita ianao ka hanao hoe: Raha misy lehilahy maty ka tsy nanan-janakalahy, dia ny zanany vavy no hamindranareo ny zara taniny.

⁹Fa raha tsy manan-janakavavy kosa izy, dia ny rahalahiny no homenareo ny zara taniny.

¹⁰Raha tsy manan-drahalahy izy, dia ny rahalahin-drainy no homenareo ny lovany.

¹¹Ary raha tsy manan-drahalahin-dray izy, dia ny havany akaiky azy indrindra ao amin’ny tarika misy azy no homenareo ny zara taniny, ka dia izy no handova izany. Ho fomba fanao hitondrana ny Israelita izany, araka izay nandidian’ny TOMPO an’i Mosesy.

¹²Hoy ny TOMPO tamin’i Mosesy: — Miakara eo an-tampon’io tendrombohitra Habarima io, ka tazano ny tany izay omeko ny Israelita.

¹³Ary rehefa hitanao izany, dia ho faty tahaka an’i Aharôna rahalahinao koa ianao.

¹⁴Fa tsy nankatò ny didiko ianareo mirahalahy tany an-taniefitr’i Tsina, raha nila ady tamiko ny fiangonana; tsy naneho ny fahamasinako teo anatrehany manko ianareo, fony nitaky rano tamiko izy. Ny amin’ny ranon’i Meribà[108] tany Kadesy, tao an-taniefitr’i Tsina, no lazaina etoana.

¹⁵Dia niteny tamin’ny TOMPO i Mosesy hoe:

¹⁶— TOMPO Andriamanitra ô, aoka Ianao mpanome aina ny voaary rehetra no hanendry lehilahy anankiray izay afaka hitondra ny fiangonana

¹⁷sy hitarika azy amin’ny toe-javatra rehetra, mba tsy ho toy ny ondry tsy misy mpiandry ny fiangonanao[109].

¹⁸Dia hoy ny TOMPO namaly an’i Mosesy: — Alao i Josoa[110] zanakalahin’i Nona fa lehilahy itoeran’ny Fanahiko. Izy no hametrahanao tanana,

¹⁹ary hoentinao eo anatrehan’i Elehazara mpisorona sy ny fiangonana manontolo ka hotokananao handimby anao eo imason’izy ireo.

²⁰Anomezo anjara azy ny voninahitrao mba hankatoavan’ny Israelita rehetra azy.

²¹Izy kosa hiseho eo amin’i Elehazara mpisorona, izay hangataka ho azy eo anatrehako ny tinapaky ny Orima[111]. Avy amin’izany no hitarihany ny Israelita rehetra, dia ny fiangonana manontolo, amin’ny toe-javatra rehetra.

²²Nataon’i Mosesy araka izay efa nandidian’ny TOMPO azy izany. Dia naka an’i Josoa izy ka nentiny teo anatrehan’i Elehazara mpisorona sy ny fiangonana manontolo.

²³Ary rehefa nametra-tanana tamin’i Josoa i Mosesy, dia nanokana azy ho dimbiny, araka ny voalazan’ny TOMPO tamin’ny alalan’i Mosesy[112].