Read Dikateny Iombonana Eto Madagasikara Nomerỳ 28 Bible Online

Nomerỳ 28 - Dikateny Iombonana Eto Madagasikara bible

Nomerỳ 28

¹Niteny tamin’i Mosesy ny TOMPO mba hamepetra ny Israelita hoe:

²«Aoka hotandremanareo ny hanolotra ho an’ny TOMPO, amin’ny fotoana voafetra, ireo fanatitra ho Azy, dia ny sakafo izay hodorana ka hanetona ho hanitra ankasitrahiny.

³«Izao no sakafo dorana izay hatolotrareo ho an’ny TOMPO isan’andro: zanak’ondry roa izay samy herintaona avy sady tsy misy kilema. Ho sorona dorana manontolo tsy tapaka ho Azy izany.

⁴Ny zanak’ondry voalohany dia hatolotra ny maraina ary ny faharoa kosa ny hariva,

⁵miaraka amin’ny lafarinina tsara toto telo kilao nofetaina tamin’ny menaka madio iray litatra sy tapany.

⁶Io sorona dorana manontolo isan’andro tsy tapaka io dia araka izay natao tany an-tendrombohitra Sinay; ho sakafo dorana ho an’ny TOMPO izany ka hanetona ho hanitra ankasitrahiny.

⁷Io zanak’ondry voalohany io dia hampiarahina amin’ny fanatitra araraka, izany hoe divay iray litatra sy tapany izay hatolotra ho an’ny TOMPO ao amin’ny Toeramasina.

⁸Ny zanak’ondry faharoa kosa dia hatolotra ho an’ny TOMPO amin’ny hariva, ka hampiarahina amin’ireo fanatitra lafarinina sy divay toy ny tamin’ny maraina; ho sakafo dorana ho an’ny TOMPO izany ka hanetona ho hanitra hankasitrahiny.

⁹«Amin’ny andro sabata kosa dia izao no hatolotra: zanak’ondry roa izay samy herintaona avy sady tsy misy kilema sy lafarinina tsara toto enina kilao nofetaina tamin’ny menaka mbamin’ny fanatitra divay momba azy.

¹⁰Sorona dorana manontolo atolotra isan-tsabata izany ho fanampin’ny sorona dorana manontolo tsy tapaka isan’andro sy ny fanatitra divay momba azy.

¹¹«Amin’ny andro voalohany isam-bolana, dia ombilahy roa sy ondrilahy iray ary zanak’ondry fito izay samy herintaona avy sady tsy misy kilema no hatolotra ho sorona dorana manontolo ho an’ny TOMPO.

¹²Ny biby tsirairay dia hampiarahina amin’ny lafarinina tsara toto nofetaina tamin’ny menaka, dia lafarinina sivy kilao isan’ombilahy, lafarinina enina kilao isan’ondrilahy,

¹³ary lafarinina telo kilao isan-janak’ondry. Sorona dorana manontolo hanetona ho hanitra hankasitrahin’ny TOMPO izany.

¹⁴Ny fanatitra araraka momba izany kosa dia divay telo litatra isan’ombilahy, divay roa litatra isan’ondrilahy ary iray litatra sy tapany isan-janak’ondry. Izany no sorona hatao isaky ny andro voalohan’ny volana, amin’ny volana rehetra mandritra ny taona.

¹⁵Hanolotra osilahy iray koa ho an’ny TOMPO ianareo ho sorona fanalana ny ota, ho fanampin’ny sorona dorana manontolo tsy tapaka isan’andro sy ny fanatitra divay momba azy.

¹⁶«Ny andro faha-14, amin’ny volana voalohany isan-taona, no hankalazana ny fetin’ny Paska, ho voninahitry ny TOMPO[113].

¹⁷Ny andro faha-15 amin’io volana io ihany no hanombohan’ny andro fito izay hihinananareo ny mofo tsy misy leviora.

¹⁸Amin’ny andro voalohany, dia hisy fivoriana masina, ka tsy hanao ny asa fanaonareo andavanandro ianareo.

¹⁹Ny hatolotrareo ho an’ny TOMPO, ho sakafo miendrika sorona dorana manontolo, dia izao: ombilahy roa sy ondrilahy iray ary zanak’ondry fito izay samy herintaona avy sady tsy misy kilema.

²⁰Ny biby tsirairay dia hampiarahina amin’ny lafarinina nofetaina tamin’ny menaka, dia lafarinina sivy kilao isan’ombilahy, enina kilao isan’ondrilahy

²¹ary telo kilao isan-janak’ondry.

²²Hanolotra osilahy iray koa ianareo ho sorona fanalana ny ota, hanaovana ny fombam-pivavahana famelan-keloka ho anareo.

²³Hataonareo avokoa izany ho fanampin’ny sorona dorana manontolo isa-maraina tsy tapaka.

²⁴Isan’andro mandritra ny herinandro no hanaovanareo izany ho an’ny TOMPO, dia sakafo dorana hanetona ho hanitra hankasitrahiny ho fanampin’ny sorona dorana manontolo tsy tapaka isan’andro sy ny fanatitra divay momba azy.

²⁵Amin’ny andro fahafito dia hisy fivoriana masina ho anareo, ka tsy hanao ny asa fanaonareo andavanandro ianareo[114].

²⁶«Amin’ny andro Pentekôsta[115], rehefa mitondra ny fanatitra voamaina vaovao ho an’ny TOMPO ianareo, dia hisy fivoriana masina ho anareo, ka tsy hanao ny asa fanaonareo andavanandro ianareo.

²⁷Ny hatolotrareo ho sorona dorana manontolo hanetona ho hanitra hankasitrahin’ny TOMPO dia izao: ombilahy roa sy ondrilahy iray ary zanak’ondry fito izay samy herintaona avy.

²⁸Ny biby tsirairay dia hampiarahina amin’ny lafarinina nofetaina tamin’ny menaka ka lafarinina sivy kilao isan’ombilahy, enina kilao isan’ondrilahy,

²⁹ary telo kilao isan-janak’ondry.

³⁰Hanolotra osilahy iray koa ianareo mba hanaovana ny fombam-pivavahana famelan-keloka ho anareo.

³¹Hataonareo izany ho fanampin’ny sorona dorana manontolo tsy tapaka isan’andro mbamin’ny fanatitra lafarinina momba azy; ary biby tsy misy kilema no hatolotrareo miaraka amin’ny fanatitra divay momba azy.