Read Dikateny Iombonana Eto Madagasikara Nomerỳ 32 Bible Online

Nomerỳ 32 - Dikateny Iombonana Eto Madagasikara bible

Nomerỳ 32

¹Nanana andiana biby fiompy marobe ny taranak’i Reobena sy ny taranak’i Gada. Rehefa hitany fa mety hiompiana tsara ny faritr’i Jahezera sy ny tanin’i Gilehada[125],

²dia niteny tamin’i Mosesy sy i Elehazara mpisorona ary ny filohan’ny fiangonana izy roa tonta ka nanao hoe:

³— I Hatarôta sy i Dibôna, i Jahezera sy i Nimrà, i Hesbôna sy i Elehale, i Sebama sy i Nebao ary i Behôna dia tanàna

⁴anisan’ny tany izay azon’ny Israelita noho ny fanampian’ny TOMPO. Tany tsara iompiana biby izany; ary izahay rahateo dia manana biby fiompy maro.

⁵Hoy koa ny Reobenita sy ny Gadita hoe: — Raha ekenao ihany ny soso-kevitray, ry Mosesy, dia aoka io tany io mba homena anay ho zarataninay, fa aza entina mita an’i Jôrdàna izahay.

⁶Dia hoy i Mosesy tamin’ny taranak’i Gada sy ny taranak’i Reobena: — Ahoana hoe? Ny mpiray firenena aminareo handeha hanafika, ka ianareo kosa ve hijanom-potsiny eto?

⁷Nahoana ny Israelita no kivìnareo tsy hankany amin’ny tany izay nomen’ny TOMPO azy?

⁸Nanao fahadisoana toy izany koa ny rainareo, raha nirahiko avy tao Kadesy-Barnea hisafo ny tany Kanahàna izy.

⁹Fa raha tonga tao an-dohasahan’i Eskôla izy ka nahita ny tany, dia nanakivy ny Israelita mba tsy hankanesany any amin’ny tany izay nomen’ny TOMPO azy[126].

¹⁰Nirehi-pahatezerana ny TOMPO tamin’izay andro izay, ka nianiana nanao hoe:

¹¹«Ireo olona izay niakatra avy tany Ejipta ka feno roapolo taona no ho miakatra, dia tsy hisy hahita ny tany izay efa nianianako tamin’i Abrahama sy i Itsehàka ary i Jakôba fa homena azy, satria tsy nanaraka ny teniko izy.

¹²I Kaleba, zanakalahin’i Jefone izay anisan’ny tarik’i Kenaza, ary i Josoa zanakalahin’i Nona ihany no hiditra any, satria izy roa lahy no nanaraka ny teniko.»

¹³Tezitra aoka izany tamin’ny Israelita ny TOMPO ka nampirenireny azy efapolo taona tany an-taniefitra mandra-pahalany tamingana izay rehetra nanao ratsy teo anatrehany.

¹⁴Ary ianareo, ry andian’olona mpanota, indreo ianareo fa manara-dia ireo rainareo ka hampirehitra indray ny fahatezeran’ny TOMPO amin’ny Israelita.

¹⁵Fa raha tsy mety manaraka ny Teniny ianareo, dia hohalavainy ny fitoeran’ny Israelita atỳ an-taniefitra, ary ho tompon’andraikitra amin’ny fahavoazan’izao vahoaka rehetra izao ianareo.

¹⁶Dia nanatona an’i Mosesy ny Reobenita sy ny Gadita ka nanao taminy hoe: — Hanao vala ho an’ny biby fiompy sy tanàna ho an’ny fianankavianay eto izahay;

¹⁷ary avy eo dia handray fiadiana faingana ka handeha eo alohan’ny Israelita mandra-panatitray azy any aminy, fa ny fianakavianay kosa hijanona ao amin’ny tanàna mimanda mba ho voaaro amin’ny mponina eto amin’ny faritany.

¹⁸Tsy hody izahay raha tsy tafapetraka amin’ny zara taniny avy ny Israelita.

¹⁹Fa tsy hiara-mandova aminy ny any an-dafy andrefan’i Jôrdàna izahay, satria ny anjara lovanay dia atỳ an-dafy atsinanan’i Jôrdàna.

²⁰Dia hoy i Mosesy tamin’ny Reobenita sy ny Gadita: — Raha izany no ataonareo, dia raiso ny fiadianareo mba hiantafika eo ambany fifehezan’ny TOMPO;

²¹ary aoka ny lehilahy vonon-kiady rehetra hiampita eny an-dafy andrefan’i Jôrdàna araka ny fifehezan’ny TOMPO ka haharitra ao mandra-pandroakan’ny Tompo ireo fahavalony!

²²Rehefa resy eo anatrehan’ny TOMPO io tany io, dia hody ianareo ka ho afa-tsiny amin’ny TOMPO sy amin’ny Israelita hafa; ary hoeken’ny TOMPO ho fanananareo ity tany ity.

²³Fa raha tsy manao izany kosa ianareo, dia manota amin’ny TOMPO, ary fantaro fa ianareo ihany no hifoteran’ny vokatry ny fahotanareo.

²⁴Manaova tanàna ho an’ny fianakavianareo ary vala ho an’ny ondry aman’osinareo; nefa tanteraho izay fampanantenana naloaky ny vavanareo.

²⁵Dia niteny tamin’i Mosesy ny taranak’i Gada sy ny taranak’i Reobena ka nanao hoe: — Hanao araka izay nandidianao izahay, tompoko.

²⁶Ny vady aman-janakay sy ny ondry aman’osinay ary ny biby hafa rehetra fiompinay dia hajanonay eto amin’ny tanànan’i Gilehada;

²⁷fa izahay kosa dia efa samy vonon-kiady avokoa ka handeha hiantafika eo ambany fifehezan’ny TOMPO, araka izay nolazainao, ry Mosesy.

²⁸Dia nomen’i Mosesy baiko ny amin’ireo i Elehazara mpisorona sy i Josoa zanakalahin’i Nona ary ny filoham-pianakaviana tamin’ny foko israelita

²⁹ka nilazany hoe: — Raha hiara-mita an’i Jôrdàna aminareo ny miaramila gadita sy robenita rehetra mirongo fiadiana mba hiantafika eo ambany fifehezan’ny TOMPO, ka ho resinareo ny tany eo anoloanareo, dia omeo ho fananany ny tany Gilehada.

³⁰Fa raha tsy manao izany kosa izy, dia miaraka aminareo ihany ao amin’ny tany Kanahàna no hahazoany zara tany ho fananany.

³¹Dia namaly ny miaramila Gadita sy i Reobenita ka nanao hoe: — Izay nandidian’ny TOMPO anay no hataonay!

³²Handray fiadiana izahay ka hitsofoka ao amin’ny tany Kanahàna araka ny fifehezan’ny TOMPO, mba ho atỳ an-dafy atsinanan’i Jôrdàna atỳ no hahazoanay zara tany[127] ho fananany.

³³Dia nomen’i Mosesy ny taranak’i Gada sy ny taranak’i Reobena ary ny antsasaky ny fokon’i Manase zanakalahin’i Jôsefa, ny fanjakan’i Sihôna mpanjakan’ny Amôrita sy ny fanjakan’i Hôga mpanjakan’i Basàna, dia ny tany mbamin’ny tanànany miaraka amin’ny faritra manodidina.

³⁴Ary ny taranak’i Gada nanangana indray ireto tanàna ireto, dia i Dibôna sy i Hatarôta, i Harôhera

³⁵sy i Hatarôta-Sôfàna, i Jahezera sy i Jôgbôhà

³⁶ary i Bety-Nimrà sy i Bety-Haràna; nataony tanàna mimanda ireo ary nisy koa valan’ondry namboariny.

³⁷Fa ny taranak’i Reobena kosa nanangana indray ireto tanàna ireto, dia i Hesbôna sy i Elehale, i Kiriataîma,

³⁸sy i Nebao ary i Bahala-Mehôna sy i Sibmà; ary dia nomeny anaram-baovao ny tanàna sasantsasany izay naoriny.

³⁹Ny taranak’i Makira, zanakalahin’i Manase, dia nankany Gilehada ka nahazo azy ary nandroaka ny Amôrita izay nipetraka tao.

⁴⁰Koa nomen’i Mosesy an’ireo taranak’i Makira zanakalahin’i Manase i Gilehada ary dia nipetraka tao ireo.

⁴¹Mba lasa koa ny taranak’i Jaîro zanakalahin’i Manase naka ny tanàna madinika teo amin’ny Amôrita ka nanome anarana azy hoe «Havôta-Jaîro».

⁴²Ary lasa koa i Nôba naka an’i Kenata sy ny tanàna madinika manodidina ka niantso azy hoe Nôba araka ny anarany ihany.