Read Dikateny Iombonana Eto Madagasikara Nomerỳ 35 Bible Online

Nomerỳ 35 - Dikateny Iombonana Eto Madagasikara bible

Nomerỳ 35

¹Tao amin’ny lemak’i Môaba, teo amoron’i Jôrdàna tandrifin’i Jerikao ihany, no nitenenan’ny TOMPO tamin’i Mosesy mba hamepetra ny Israelita hoe:

²— Aoka ianareo hanome tanàna eo amin’ny zara tany fanananareo avy ho an’ny Levita mba honenany[137]. Homenareo azy koa ny tany manodidina hiandrasany ny bibiny.

³Ny tanàna dia ho azy mba honenany, fa ny tany kosa ho an’ny biby fiompiny sy ny fitaovany ary ny bibiny hafa rehetra.

⁴Koa ny tany manodidina ny tanàna izay homenareo ny Levita dia dimanjato metatra miala avy eo amin’ny rindrin’ny tanàna amin’ny lafiny efatra.

⁵Handrefy faritra efamira ivelan’ny tanàna ianareo ka arivo metatra ny lafiny atsinanana, arivo metatra ny lafiny atsimo, arivo metatra ny lafiny andrefana ary arivo metatra ny lafiny avaratra; dia ho eo anivon’io faritra io ny tanàna. Izany no ho tanin’ny Levita manodidina ny tanàna.

⁶Ny tanàna homenareo ny Levita dia ny tanàna enina fialokalofana, izay hataonareo fandosiran’izay nahafaty olona[138], ary tanàna hafa 42 ihany koa.

⁷Ka ny fitambaran’ny tanàna rehetra izay homenareo ny Levita dia 48, miaraka amin’ny tany manodidina hiandrasany ny bibiny.

⁸Ary momba ireo tanàna izay halainareo avy amin’ny tanin’ny Israelita, dia izay foko lehibe no hanalanareo maro kokoa, fa izay foko kely kosa dia hanalanareo vitsy kokoa; eny, samy hanome tanàna ho an’ny Levita araka ny zara tany azony avy ny foko tsirairay.

⁹Niteny tamin’i Mosesy indray ny TOMPO

¹⁰mba hamepetra ny Israelita hoe: — Rehefa tafita an’i Jôrdàna ka tafiditra amin’ny tany Kanahàna ianareo,

¹¹dia hifidy tanàna izay hataonareo tanàna fialokalofana, mba hialokalofan’izay nahafaty olona tsy nahy[139].

¹²Ireo tanàna ireo no ho fialokalofana mba hahafahanareo mandositra ny mpamaly faty[140]; ka tsy ho faty izay nahafaty olona alohan’ny hisehoany fitsarana eo anatrehan’ny fiangonana.

¹³Hisy tanàna enina havahanareo ho fialokalofana,

¹⁴ny telo etỳ an-dafy atsinanan’i Jôrdàna ary ny telo hafa ao amin’ny tany Kanahàna: ho tanàna fialokalofana ireo.

¹⁵Ny olona rehetra, na Israelita izy na vahiny miara-monina amin’ny Israelita ka nahafaty olona tsy nahy, dia afaka mialokaloka amin’ireo tanàna enina ireo.

¹⁶«Raha vy no namelezana ka nahafaty olona, dia mpandatsaka aina izay manao izany ka hatao maty.

¹⁷Raha vato no namelezana ka nahafaty olona, dia mpandatsaka aina izay nanao izany ka hatao maty.

¹⁸Raha hazo no namelezana ka nahafaty olona, dia mpandatsaka aina izay nanao izany ka hatao maty.

¹⁹Ny mpamaly faty no hamono hahafaty ny mpandatsaka aina, raha vao mahita azy izy.

²⁰Raha fankahalana no nandonana olona na koa lolom-po no nitorahana azy ka nahafaty azy,

²¹na filana ady no namelezana totohondry olona ka nahafaty azy, dia hatao maty ilay mpamely satria mpandatsaka aina; ny mpamaly faty no hamono hahafaty ny mpandatsaka aina, vantany vao tafahaona aminy.

²²«Kanefa mety tsy nahy na tsy filana ady no nandonana olona; mety tsy lolom-po no nitorahana zavatra azy;

²³mety misy sendra manjera vato ka nahafaty olona tsy nahy, saingy tsy fahavalon’io olona io izy sady tsy nitady handratra azy.

²⁴Amin’izay, dia hotsarain’ny fiangonana araka izany lalàna izany ny mpamely sy ny mpamaly faty.

²⁵Harovan’ny fiangonana amin’ny mpamaly faty ilay nahafaty olona, ka hateriny indray any amin’ny tanàna izay nialokalofany. «Hitoetra ao amin’io tanàna fialokalofany io ilay nahafaty olona tsy nahy mandra-pahafatin’ny mpisorombe izay voahosotra tamin’ny diloilo masina.

²⁶Fa raha mivoaka ho ao ivelan’ny tanàna fialokalofana kosa izy,

²⁷ka hitan’ny mpamaly faty, dia azon’io vonoina ho faty; ary tsy meloka ny mpamaly faty amin’izany,

²⁸satria ilay nahafaty olona tsy nahy dia tokony ho nitoetra tao amin’ny tanàna fialokalofany mandra-pahafatin’ny mpisorombe; fa rehefa maty kosa io, dia mahazo mody any amin’ny zara tany fananany ihany ilay nahafaty olona tsy nahy.

²⁹«Izany fomba fanao izany dia hampiharinareo hatrany, na aiza na aiza honenanareo.

³⁰«Raha misy namono nahafaty olona, dia tsy azo helohina ho faty izy raha tsy noho ny filàzan’ny vavolombelona maro. Tsy hisy fanamelohana ho faty noho ny filàzan’ny vavolombelona tokana[141].

³¹Tsy handray kolikoly ianareo mba hanavotana ny ain’izay nahafaty olona ka meloka tokony ho faty; eny, hatao maty tokoa izy.

³²Tsy handray kolikoly koa ianareo mba hamelana azy handositra any amin’ny tanàna fialokalofana na hamelana azy hiverina any amin’ny taniny alohan’ny hahafatesan’ny mpisorombe.

³³«Aza mandoto ny tany onenanareo, fa ny famonoana olona dia fandotoana ny tany. Ary raha misy olona voalatsa-dra, ny tany dia tsy hadio raha tsy maty ny mpandatsa-dra.

³⁴Aza mandoto ny tany izay honenanareo sady honenako eo afovoanareo koa, fa Izaho no TOMPO Izay mitoetra eo anivon’ny Israelita.»