Read Dikateny Iombonana Eto Madagasikara Nomerỳ 36 Bible Online

Nomerỳ 36 - Dikateny Iombonana Eto Madagasikara bible

Nomerỳ 36

¹Nisy nanatona an’i Mosesy sy ny filohan’ny foko israelita ireo taranak’i Jôsefa, dia ny loham-pianakaviana avy amin’ny tarik’i Gilehada zanakalahin’i Makira sady zafikelin’i Manase,

²ka nanao hoe: — Efa nodidian’ny TOMPO hizara antsapaka ny tany ho an’ny Israelita ianao, ry Mosesy, ary efa nodidiany ihany koa hanome ny zara tanin’i Tselôfehada rahalahinay ho an’ny zanakavaviny[142].

³Raha manambady lehilahy avy amin’ny foko israelita hafa ireo vehivavy ireo, dia hoesorina amin’ny zara tanin-drazanay ny zara taniny ka hanampy ny anjaran’ny foko izay hidirany izany, ary dia hampihena ny anjara izay azonay tamin’ny antsapaka.

⁴Rehefa tonga manko ny taon-jôbily[143] ho an’ny Israelita, ny zara tanin’ireo zanakavavin’i Tselôfehada dia hanampy ny an’ny foko izay hidirany, ary hoesorina tanteraka amin’ny zara tany azon’ny razanay.

⁵Dia nanome izao didy izao araka ny tenin’ny TOMPO i Mosesy ka nanao hoe: — Marina ny an’ireto taranak’i Jôsefa ireto.

⁶Izao no teny izay nandidian’ny TOMPO momba ny zanakavavin’i Tselôfehada: aoka izy hanambady izay tiany, nefa lehilahy ao amin’ny tarika nisy an-drainy ihany no hovadîny.

⁷Amin’izay dia tsy hisy zara tany hifindra foko eo amin’ny Israelita, fa samy ho eo amin’ny zara tany azon’ny fokon-drainy avy no hifikiran’ny Israelita.

⁸Ny tovovavy rehetra, izay handova eo amin’ny foko israelita anankiray, dia hanambady lehilahy ao amin’ny tarika nisy an-drainy ihany. Izay no hitazonan’ny Israelita tsirairay avy ny zara tany azon’ny razany;

⁹ary tsy hisy zara tany hifindra foko, fa samy ho eo amin’ny zara taniny avy no hifikiran’ny foko israelita.

¹⁰Dia nataon’ny zanakavavin’i Tselôfehada araka izay nandidian’ny TOMPO an’i Mosesy izany,

¹¹ka i Mahelà sy i Tiritsà, i Hôglà sy i Milkà ary i Nôhà dia samy nanambady ny zanakalahin-drahalahin-drainy avy;

¹²izany hoe lehilahy taranak’i Manase, zanakalahin’i Jôsefa, ihany no fanambadian’ireo; ka tafajanona tamin’ny fokon-drainy ihany ny zara tany izay nolovany.

¹³Ireo no didy amam-pitsipika nomen’ny TOMPO ny Israelita tamin’ny alalan’i Mosesy tao amin’ny lemak’i Môaba, teo amoron’i Jôrdàna tandrifin’i Jerikao.