Read Dikateny Iombonana Eto Madagasikara Mikà 1 Bible Online

Mikà 1 - Dikateny Iombonana Eto Madagasikara bible

Mikà 1

¹Teny nampitain’ny TOMPO tamin’i Mikà izay avy any Môreseta, fony mpanjaka tao Joda ry i Jôtama sy i Ahaza ary i Hezekià. Fahitana no nampahafantaran’ny Tompo azy ny teniny momba ny tanàna Samaria sy Jerosalema[1].

²Mihainoa ianareo, ry firenena rehetra. Mandrenesa tsara, ry tany sy izay rehetra ao aminy! Ny Tompo ANDRIANANAHARY no ho tonga eo anivonareo mba ho vavolombelona hiampanga, dia ny Tompo avy ao amin’ny tempoliny masina.

³Fa indro ny TOMPO mivoaka ny toerany, ary midina ka mandeha eny am-paratampon’ny tany;

⁴miempo eo ambany tongony ny tendrombohitra tahaka ny savoka taninin’ny afo; ary loadoaka ny lohasaha tahaka ny rehefa misy riaka mivarimbarina eny an-kilahila.

⁵Nikomy tamin’Andriamanitra ny taranak’i Jakôba, eny, nanota ny vahoakan’i Israely[2], ka mahatonga izany rehetra izany. Fa iza no nampikomy ny taranak’i Jakôba? Moa tsy i Samaria renivohiny ve? Ary iza no toeram-panasinana ao Joda? Moa tsy i Jerosalema renivohiny ve?

⁶Noho izany, dia hoy ny Tompo hoe: «Hataoko antontan-korontam-bato eny an-tsaha i Samaria, hataoko tany fambolena voaloboka; ary havariko any an-dohasaha ny vatony, ka hampihanjahanjaiko ny fototra iorenany.

⁷Hotorotoroina ny sampiny voasokitra rehetra hodorana amin’ny afo ny tamby rehetra azony ary hopotehiko ny sarin-tsampiny rehetra; satria tambin’ny vehivavy janga[3] no nanangonany azy, dia hanambazana vehivavy janga any an-kafa indray ireny.»

⁸Hoy kosa i Mikà hoe: Noho izany, dia hitomany sy hidradradradra aho, ary handeha tsy mitafy sady tsy mikiraro. Hikonainaina toy ny amboadia aho ary hikiakiaka toy ny vorombe;

⁹satria tsy mety sitrana ny ratran’i Samaria fa mitatra hatrany Joda aza, ka tonga hatreo am-bavahadin’i Jerosalema izay tanànan’ny mpiray firenena amiko.

¹⁰Aza ambara any Gata izany fa tazony ny ranomasonareo[4]! Ry mponina ao Bety-Hafrà, mihosinkosena amin’ny vovoka ianareo.

¹¹Ry mponina ao Safira, mandehana hatao sesi-tany ombàn-kenatra sady tsy mitafy. Tsy mahavoaka ny tanàna ireo mponina eo Tsanàna. Misaona ny ao Bety-Etsela, ka tsy azo ampiasaina hierena intsony.

¹²Mangovitra ny amin’ireo tombon-tsoany ny mponina ao Marôta, satria efa nidina ho ao am-bavahadin’i Jerosalema ny loza avy tamin’ny TOMPO.

¹³Ry mponina ao Lakisy, rohizo amin’ny soavaly haingam-pandeha ny kalesy handosiranareo; satria naka tahaka ny fahadisoan’i Israely ianareo, ka nahatonga ny mponina ao Tsiôna hanota.

¹⁴Noho izany, ry mponina ao Tsiôna, afoizo i Môreseta-Gata; ny tanàna Akziba dia toky manodoka ho an’ny mpanjakan’i Israely.

¹⁵Mpanafika handresy anareo no halefan’ny TOMPO aminareo, ry mponina ao Maresà, ka hisitrika hatrany an-johin’i Hadolama ireo filoha tabihan’i Israely.

¹⁶Hetezo ny volonareo ary kakaso ny lohanareo, ry mponina ao Tsiôna; halehibiazo ho tahaka ny an’ny fanindry[5] ny sola eo an-dohanareo, noho ny amin’ireo zanaka malalanareo: satria nentina ho babo lavitra anao izy.