Read Dikateny Iombonana Eto Madagasikara Mikà 5 Bible Online

Mikà 5 - Dikateny Iombonana Eto Madagasikara bible

Mikà 5

¹Dia hoy ny Tompo hoe: «Ianao, ry Betlehema Efratà, isan’ireo tanàna kely indrindra ao Joda ianao! Kanefa avy aminao no hamoahako ilay ho Mpanjaka an’i Israely[19]. Efa hatramin’ny fahagola no niandohany, dia hatramin’ny andro taloha elabe.»

²— Noho izany, ny Tompo dia hanolotra ny vahoakany amin’ny fahavalo mandra-piavin’ny andro hahatera-dahy ny vehivavy iray; ka izay sisa velona, amin’ireo rahalahiny voasesi-tany, dia hiverina ho any amin’ireo Israelita namany.

³Ary hitsangana hitondra ny vahoaka izany mpanapaka nampanantenaina izany, hombàn’ny hery sy heniky ny famirapiratana avy amin’ny TOMPO Andriamaniny. Dia handry feizay ny vahoakany, satria ho lehibe hatrany am-paran’ny tany izany mpanapaka izany:

⁴izy no hitondra fiadanana! — Raha tonga hanafika ny tanintsika ny Asirianina ka hitsofoka hatraty an-dapantsika, dia hanangana mpitari-tafika marobe hamelezana azy isika.

⁵Ary handresy amin’ny sabatra sy lefom-pohy ireo mpitari-tafika ireo ka hifehy an’i Asiria, tanin’i Nimrôda. Izany mpanapaka izany mihitsy no hanafaka antsika[20] amin’ny Asirianina izay hihoatra sisitany ka ho tonga hanafika ny tanintsika.

⁶Amin’izay ny sisa velona amin’ny taranak’i Jakôba[21], eo anivon’ny vahoaka marobe, dia ho tahaka ny ando avy amin’ny TOMPO sy ho tahaka ny ranonorana latsaka amin’ny ahitra; ka tsy olombelona fa Andriamanitra no antenainy sy iankinany.

⁷Amin’izay, ny sisa velona amin’ny taranak’i Jakôba, eo anivon’ny vahoaka marobe any amin’ny firenen-kafa, dia ho tahaka ny liona mihaza amin’ny biby anaty ala sy ho tahaka ny liona tanora mihaza amin’ny andian’ondry; rehefa mandalo ny liona, dia manosihosy sy mamiravira, ka tsy misy afaka mamonjy.

⁸Dia toy izany koa, aoka ny tananareo hiainga hamely izay manohitra anareo ary aoka ho ringana avokoa ny fahavalonareo[22]!

⁹Ary hoy ny TOMPO hoe: «Izao no ho tonga amin’izany andro izany. Haringako tsy ho eo afovoanareo ny soavalinareo[23], ary holevoniko ny kalesinareo.

¹⁰Horavako ny tanàna eo amin’ny taninareo, ary harodako avokoa ny mandanareo.

¹¹Hofoanako tsy ho eo an-tanànanareo ny fanaovana ody ratsy ary tsy hisy eo aminareo intsony ny mpanandro.

¹²Hofoanako tsy ho eo afovoanareo intsony ny sampinareo sy ny tsangambaton-tsampinareo, ka tsy hiankohoka amin’ny zavatra izay nataon’ny tananareo intsony ianareo.

¹³Hongotako tsy ho eo afovoanareo ny tsatokazo ho an’i Aserà[24] ary hofongorako ireo sampinareo.

¹⁴Fahatezerana mirehitra mafy no hanatanterahako valifaty amin’ny firenena izay tsy nihaino Ahy.»