Read Dikateny Iombonana Eto Madagasikara Mikà 6 Bible Online

Mikà 6 - Dikateny Iombonana Eto Madagasikara bible

Mikà 6

¹«Mitsangàna Ianao, ry TOMPO! Mandahara eo anoloan’ny tendrombohitra.» Mihainoa ny adin’ny TOMPO, ianareo ry tendrombohitra sy ianareo ry fanorena-matezan’ny tany, fa manana ady amin’ny vahoakany ny TOMPO; ny Israelita no ifandaharany. Henoinareo àry izay lazain’ny TOMPO:

³«Ry vahoakako, inona moa no nataoko anareo? ary inona no nanasarako anareo? Valio Aho!

⁴Fa nampiakariko avy tany Ejipta ianareo ary nafahako avy tamin’ny fanandevozana, ka nirahiko hitarika anareo i Mosesy sy i Aharôna ary i Miriama[25].

⁵Ry vahoakako, mba tsarovy izay nokasain’i Balàka mpanjakan’i Môaba hatao sy ny navalin’i Bilehama zanakalahin’i Behôra azy, ary izay niseho hatreo Sitima ka hatrany Gilgala[26], mba hahafantaranareo asa nanasoavako anareo.»

⁶«Inona àry no hoentiko, rehefa manatona aho hiankohoka eo anatrehan’ny TOMPO, Andriamanitra avo indrindra? Moa zanak’omby iray taona hatao sorona dorana manontolo ve no hoentiko rehefa manatona Azy aho?

⁷Ho sitraky ny TOMPO ve ny ondrilahy an’arivony na ny menaka mikoriana toy ny renirano? Hatolotro Azy ve ny zazalahy voalohan-terako ho fanalana ny heloka amam-pahotàko?»

⁸Tsia, ry olombelona, fa efa nampianarina anao ny fitondrantena tsara sy izay tadiavin’ny TOMPO aminao: dia ny hanao ny rariny sy handala ny fitiavana ary ny hanaraka an’Andriamanitrao amim-panetrentena[27].

⁹Fahendrena ny manaja ny TOMPO! Miantso ny ao an-drenivohitra Izy manao hoe: «Mihainoa, ianareo ry fokon’i Joda sy ry loholona mivory eto an-drenivohitra[28]!

¹⁰Moa hohadinoiko ve ny harena maloto nangonin’ny ratsy fanahy ao an-tranony sy ny famarana tsy ampy? Zavatra mahatsiravina izany!

¹¹Moa heveriko ho madio izay mampiasa mizana mandainga sy mitondra an-kitapo ny vato tsy marina?

¹²Mpanao herisetra ny mpanan-karena amin’ity renivohitra ity; ary mandainga sy mamitaka ny hafa ireo mponina ao aminy.

¹³Izaho kosa nanomboka nikapoka anareo, mba handringanana anareo noho ny fahotanareo[29].

¹⁴Hihinana ianareo nefa tsy ho voky, fa mbola eo aminareo ihany ny mosary, Hampirina ianareo nefa tsy hahatahiry; ary izay voatahirinareo aza dia holevoniko amin’ny ady.

¹⁵Hamafy ianareo, nefa tsy hijinja; hanery ôliva, nefa tsy hihosotra menaka; hanosihosy voaloboka, nefa tsy hisotro divay.

¹⁶Fa tandremanareo fatratra ny ohatra ratsy nasehon’i Hômrỳ mpanjaka sy ny fihetsiky ry i Ahaba mianakavy, ka narahinareo ny fomba amam-panaony. Noho izany, dia hatolotro horavana ity renivohitrareo ity ary ho fihomehezana ianareo mponina ao aminy; ka ianareo no hitondra ny latsa mianjady amin’ny vahoakako[30].»