Read Dikateny Iombonana Eto Madagasikara Tsefanià 1 Bible Online

Tsefanià 1 - Dikateny Iombonana Eto Madagasikara bible

Tsefanià 1

¹Izao no teny nomen’ny TOMPO an’i Tsefanià tamin’ny andro nanjakan’i Jôsià zanakalahin’i Amôna sady mpanjakan’i Joda. I Tsefanià dia zanakalahin’i Kosỳ, zafikelin’i Gedalià, zafiafin’i Amarià ary zafindohalik’i Hezekià[1].

²Izao no teny hentitra ataon’ny TOMPO: «Holevoniko avokoa ny aina rehetra eto ambonin’ny tany.

³Hopotehiko ny olona sy ny biby ary ny vorona mbamin’ny trondro; haringako ny ratsy fanahy sy ny asa manafintohina ataony. Tsy avelako hisy olona na dia iray aza eto ambonin’ny tany. Teny hentitra avy amiko TOMPO izany».

⁴«Hirotsaka hamely ny mponin’i Jerosalema sy ny vahoaka rehetra ao Joda Aho. Hofoanako tsy hisy amin’ity toerana ity ny zavatra sisa rehetra tamin’ny fanompoana an’i Bahala; eny, hofoanako hatramin’ny fahatsiarovana ireo mpisoron’io andriamani-tsiizy io koa aza.

⁵Hopotehiko izay miakatra an-tafon-trano mba hivavaka amin’ireo zavatra eny amin’ny lanitra, dia izay mivavaka sy mianiana amiko TOMPO nefa manao izany koa amin’i Milkôma[2].

⁶Holevoniko izay mihataka miala amiko TOMPO ka tsy mitady AHY sady tsy mila hevitra amiko.»

⁷Mangina eo anatrehan’ny Tompo ANDRIANANAHARY fa efa akaiky ny andro hirotsahany an-tsehatra! Efa nanomana sorona ny TOMPO, ary efa nanadio ireo olona nasainy[3].

⁸Izao no teny hentitra ataon’ny TOMPO: «Amin’izany andro hanaovako sorona izany dia hofaiziko ny mpitondra sy ny zanaky ny mpanjaka ary izay rehetra manaraka fomba fitafy vahiny[4].

⁹Amin’izany andro izany dia hofaiziko avokoa izay rehetra mandingana ny tokonan-tempoliny sy izay rehetra mameno ny tranon’ny tompony[5] amin’ny harena azo an-kosoka sy an-keriny.

¹⁰Amin’izany andro izany, hoy ny teny hentitra lazaiko, ao Jerosalema dia handrenesana kiaka mafy eo am-bavahadin-trondro sy fitomaniana ao Antanambao[6] ary firodanan-trano eny amin’ny havoana.

¹¹Midradradradrà ianareo, ry mponina an-tanàna ambany[7], fa ho faty avokoa ny mpivarotra, ho lany ringana avokoa ny mpandranto.

¹²Amin’izay fotoana izay dia handray fanala Aho ary hosavaiko ny tanànan’i Jerosalema; ka hofaiziko ny olona izay mandry fahalemana toy ny faikan-divay efa mifetaka, dia izay manao anakampo hoe: «Sady tsy hanao soa ny TOMPO no tsy hanao ratsy!»

¹³Koa dia hobaboina ny hareny ary horavana ny tranony; hanao trano izy nefa tsy hitoetra ao; hamboly voaloboka izy, nefa tsy hisotro ny divay avy aminy.

¹⁴Manakaiky ilay andro lehibe hiavian’ny TOMPO[8], manakaiky sady ho tamy faingana tokoa. Vao migadona izany dia kiakam-pahakiviana, fa na ny lehilahy mahery fo aza dia hiantsoantso mafy vonjeo!

¹⁵Ho androm-pahatezeran’ny TOMPO izany, ho androm-pahoriana sy tebiteby, ho androm-paharavana sy fahapotehana, eny, ho andro maizina mikitroka, ho andro rako-drahona sy zavona.

¹⁶Izany andro izany no handrenesana ny miaramila hitsoka trompetra sy hanao akoran’ady hamelezana ireo tanàna mimanda sy ny tilikambo avo eny amin’ny zorony.

¹⁷Hoy ny TOMPO hoe: «Hampahorîko ny olona ka hitsapatsapa toy ny jamba, noho izy efa nanota tamiko; ka ny rany dia hiraraka toy ny vovoka, ary ny fatiny ho lo tahaka ny zezika.»

¹⁸Amin’ny androm-pahatezeran’ny TOMPO, dia samy tsy hahavonjy ny olona na ny volafotsiny na ny volamenany. Fa hiredareda ny fahasaro-piaron’ny TOMPO ka handevona ny tany tontolo. Eny, hahatsiravina tokoa izany, satria haringan’ny TOMPO ny mponina rehetra amin’ny tany.