Read Dikateny Iombonana Eto Madagasikara Zakarià 12 Bible Online

Zakarià 12 - Dikateny Iombonana Eto Madagasikara bible

Zakarià 12

¹Hafatry ny Tompo momba an’i Israely. Izao no teny hentitra ambaran’ny Tompo Izay namelatra ny lanitra sy namorona ny tany, ary nanome aina ny olona:

²— Indro Aho hanao an’i Jerosalema ho tsatokaty feno ny divaim-pahatezerako, ka hahafanina ny firenena rehetra manodidina. Ary hahafanina an’i Joda koa izany, rehefa ho voafahirano i Jerosalema[44].

³Ary amin’izany andro izany i Jerosalema dia hataoko toy ny vongam-bato mavesatra eo anoloan’ny firenena rehetra; ka haratra tokoa izay mitady hanainga izany. Koa ny firenena rehetra ambonin’ny tany hiray no hiady hamely ny tanàna.

⁴Amin’izany andro izany, hoy ny teny hentitra ambarako, dia hataoko mandraingiraingy ny tahotra avokoa ny soavaliny, ary ny mpitaingina azy ho lasa adala; hiambina tsara ny vahoakan’i Joda Aho, kanefa hampahajamba ny soavaly rehetra izay an’ny fahavalo.

⁵Ary ny firenen’i Joda hanao anakampo hoe: «Ao amin’ilay Tompon’izao rehetra izao sady Andriamaniny no ahitan’ny mponin’i Jerosalema ny heriny».

⁶Amin’izany andro izany, ny firenen’i Joda dia hataoko tahaka ny afo mihanaka amin’ny ala na mirehitra ao ambanin’ny antontan’amboara, ka handevona ny firenena rehetra manodidina azy na eo ankavanany na eo ankaviany. Ary ny mponin’i Jerosalema dia mbola hijanona ao an-tanànany ihany.

⁷Hovonjen’ny Tompo aloha ny fianakaviamben’i Joda, mba tsy hihevi-tena ho ambonin’ny olona sisa eran’i Joda ny taranak’i Davida sy ny mponin’i Jerosalema.

⁸Amin’izany fotoana izany dia harovan’ny Tompo ireo mponin’i Jerosalema; ka ny osa indrindra ao aminy dia hatanjaka tahaka an’i Davida, ary ny taranak’i Davida ho tahaka an’Andriamanitra, dia tahaka ny anjelin’ny Tompo mitarika azy eo aloha.

⁹Amin’izany andro izany, hoy ny Tompo, dia hirotsaka an-tsehatra Aho handringana ny hafa firenena rehetra izay ho avy hamely an’i Jerosalema.

¹⁰Fanahim-pangorahana sy fanahim-bavaka no hanentanako ny taranak’i Davida sy ny mponin’i Jerosalema. Ka hijery Ahy ireo noho ny amin’Ilay nolefoniny[45], ary hisaona azy toy ny fisaonana zanakalahy tokana sady hitomany azy toy ny fitomaniana lahimatoa.

¹¹Amin’izany andro izany dia hisy fisaonana lehibe ao Jerosalema, dia tahaka izay niseho tao Hadadrimôna[46] teo amin’ny lohasahan’i Megidao.

¹²Ary hisaona ny firenena, dia ny isam-pianakaviany avy: ny an’ny taranak’i Davida, lahy sy vavy samy mitokana; ny an’ny taranak’i Natàna, lahy sy vavy samy mitokana;

¹³ny an’ny taranak’i Levỳ, lahy sy vavy samy mitokana; ny an’ny taranak’i Simey, lahy sy vavy mitokana;

¹⁴ary ny fianakaviana sisa rehetra, lahy sy vavy samy mitokana hisaona avokoa.