Read Dikateny Iombonana Eto Madagasikara 1 Makabeo 14 Bible Online

1 Makabeo 14 - Dikateny Iombonana Eto Madagasikara bible

1 Makabeo 14

¹Tamin’ny taona faha-172[230] dia novorîn’i Demetry mpanjaka ny tafiny; ary nankany Media[231] izy haka miaramila mpanampy mba hoentiny miady amin’i Trifôna.

²Nony ren’i Arsaky[232], mpanjakan’i Persia sy i Media, fa niditra ny faritaniny i Demetry, dia nirahiny hanao azy sambo-belona ny iray tamin’ireo jeneraliny.

³Dia roso ilay iraka; ka ny tafik’i Demetry noreseny, ny tenan’ny mpanjaka kosa nosamboriny ary nentiny ho any amin’i Arsaky sy nataon’io an-tranomaizina.

⁴Nandry feizay ny tanin’i Jodea nandritra ny andro rehetra nitondran’i Simôna. Nikely aina tokoa izy hampandroso ny fireneny; ka nankasitrahin’ny vahoaka ny fahefana amam-boninahitra nananany tamin’izany androny rehetra izany.

⁵Vao mainka nitombo voninahitra izy fony nahazo an’i Jôpa hataony fitodian-tsambo ka hifandraisany amin’ireo nosin-dranomasina.

⁶Nampitatra ny sisintanim-pireneny i Simôna sady nahatazona mafy ny faritra nofeheziny

⁷ary nampiverina Jiosy maro voasambo-belona an’ady. Azony ny tanàna Gezera sy Bety-Tsoro ary koa ny toera-mafin’i Jerosalema, ka nesoriny avokoa ny fahalotoana ara-pivavahana tamin’ireo toerana ireo; ary tsy nisy olona nahatohitra azy.

⁸Samy niasa ny taniny amim-piadanana ny vahoaka; ka ny saha nanome vokatra ary ny hazo teny an-demaka nanome voa.

⁹Ny anti-dahy, nipetraka teny an-kianja, dia samy niresaka fitomboan-karena; ny tovolahy miakanjo ny fanamiana fanaova-matso sy fitondra an’ady.

¹⁰Namatsy hanina ireo tanàna i Simôna, ary namonona fitaovam-panamafisana azy, hany ka niely hatrany am-paravazantany ny laza be voninahitra nananany.

¹¹Namerenany fiadanana indray ny tanin-drazany, ka nifaly tamin-karavoana lehibe i Israely.

¹²Samy nipetraka nilamina teny ambany voalobony aman’aviaviny avy ny tsirairay, fa tsy nisy olona nampitahotra azy intsony[233].

¹³Nandao ny tanin’i Jodea ny mpanani-bohitra; ary resy avokoa ny mpanjaka fahavalo, tamin’izany andro izany.

¹⁴Notohanan’i Simôna ny mahantra rehetra teo amin’ny vahoakany; notandremany ny lalànan’Andriamanitra ary nofongoriny avokoa izay mpanohitra izany sy izay olon-dratsy.

¹⁵Nataony mamirapiratra indray ny tempoly ary nohamaroiny ny fanaka masina.

¹⁶Rehefa re tany Rôma sy hatrany Sparta mihitsy aza fa hoe maty i Jônatàna, dia nalahelo mafy ny mponin’ireo tanàna ireo.

¹⁷Ary nony fantany fa hoe i Simôna rahalahiny no mpisorombe nandimby azy sy nifehy ny tanin’i Jodea mbamin’ny tanàna ao aminy,

¹⁸dia naka takelaka halimo ireo ary nanoratra ho any aminy hanavao ny fanekem-pivavahana nataony tamin’i Joda sy tamin’i Jônatàna rahalahiny[234]

¹⁹Novakîna teo anatrehan’ny vahoaka rehetra tafangona tao Jerosalema ny taratasy;

²⁰ary izao no kopian’ireo nalefan’ny Sparsiata: — Izahay, lehiben’ny Sparsiata sy mpiray tanàna, no manoratra aminareo sy miarahaba anareo, ry Simôna mpisorombe sy ry loholona mbamin’ny mpisorona sy ny vahoaka jiosy manontolo mpiray firenena aminy.

²¹Voaresak’ireo masoivoho nalefanareo ho aty amin’ny firenenay ny haja amam-boninahitra anananareo; sady nahafaly anay ny famangiany anay.

²²Ary ny teniny dia nosoratanay ao amin’ny raki-tsoratry ny firenenay toy izao: «I Nomeniôsa zanakalahin’i Antiôkôsa ary koa i Antipatera[235] zanakalahin’i Jasôna dia masoivohon’ny Jiosy, ka tonga taty aminay hanavao ny fisakaizana aminay.

²³Sitraky ny vahoakanay ny nandray an’ireo lehilahy ireo tamim-pomba manetriketrika sy ny nametraka ny kopian’ny lahateniny ao anatin’ny bokim-panjakana mba hitazonan’ny vahoaka sparsiata ny fahatsiarovana azy. Ary ny kopian’izao zavatra izao dia nosoratana ho an’i Simôna mpisorombe.

²⁴Taorian’izany[236] no nalefan’i Simôna ho any Rôma i Nomeniôsa mba hanamafy ny fiaraha-miasa amin’ny Rômanina; nitondra ampinga volamena lehibe milanja 44 kilao i Nomeniôsa tamin’izay.

²⁵Nony nandre ireo zava-nitranga ireo ny vahoaka jiosy, dia nanao hoe: — Inona no mari-pankasitrahana hatolotsika an’i Simôna sy ireo zanany?

²⁶Fa samy naneho herimpo tsy mety ketraka na ny tenan’i Simôna na ireo rahalahiny na ny ankohonan-drainy ka niady tamin’ny fahavalon’i Israely mba hampiala azy ary nanao izay hahazoantsika fahafahana. Dia nisy teny nosokirin’ny Jiosy tamina takelaka halimo maromaro ka nahantony tamin’ireo andry tao an-tendrombohitra Tsiôna;

²⁷ary izao no kopian’ireo teny ireo: — Tamin’ny andro faha-18-n’ny volana Elola, taona faha-172, na hoe taona fahatelo nanapahan’i Simôna mpisorombe tao amin’ny kianjan’ny vahoakan’Andriamanitra,

²⁸dia nisy fivoriambe nataon’ny mpisorona mbamin’ny sarambabem-bahoaka sy ny lohandoham-pirenena ary ny loholom-paritany. Ka teo no nampahalalana anay ireto zavatra ireto.

²⁹Tamin’ny ady maro natao teto amin’ny tanintsika, i Simôna zanakalahin’i Matatià sady mpisorona anisan’ny antokon’i Jôiariba ary koa ireo rahalahin’i Simôna dia samy nanao vy very ny ainy; nanohitra ny fahavalom-pirenena ireo mba hijoroan’ny tempoly mbamin’ny lalàna, ka nampahazo voninahitra lehibe ny fireneny.

³⁰I Jônatàna no namory ny firenentsika sy tonga mpisorombe teo amintsika, vao nodimandry.

³¹Dia nitady hanafika ny tanin’i Jodea ny fahavalo mba handrava azy sy handroba ny tempoly.

³²Fa nitsangana kosa tamin’izay i Simôna ka niady ho an’ny fireneny; vola aman-karena betsaka no nafoin’ny tenany sy nolaniny mba hamononana fiadiana ho an’ny vatan-dehilahin’ny tafi-pirenena sy hanomezan-karama azy.

³³Nohamafisiny ny tanànan’i Jodea ary koa i Bety-Tsoro izay miorina eo amin’ny sisin-tany sady fitahirizam-piadiana teo aloha ho an’ny fahavalo; dia nametrahany andia-miaramila jiosy tao.

³⁴Nohamafisin’io Simôna io koa i Jôpa[237] izay miorina eo amoron-dranomasina sy i Gezera[238] izay eo amin’ny sisintanin’i Asdôda[239] sady nonenan’ny fahavalo teo aloha; ka Jiosy no namponeniny tao sy namononany ny zavatra rehetra ilainy hivelomany.

³⁵Hitan’ny vahoaka ny toetra mahatoky nananan’i Simôna sy ny voninahitra kendreny ho azon’ny firenena; ka dia natsangany ho lehibeny sy ho mpisorombeny izy noho ny zavatra rehetra vitany ary ny toetra mitandro ny rariny sady mahatoky nasehony tamin’ny fireneny. Niezahany tamin’ny fomba isan-karazany koa ny hanandratra ny fireneny.

³⁶Nandritra ny androm-piainany, dia nahomby izy tamin’ny nataony handroahana tao Joda ny hafa firenena sy ireo namahatra teo amin’ny Tanànan’i Davida tao Jerosalema; nahavita toera-mafy teo manko ireo ka nivoaka avy ao mba hanimbazimba ny manodidina ny tempoly sy haniratsira lozan-tany ny fahamasinany.

³⁷Miaramila jiosy no namponenin’i Simôna tao amin’io toera-mafy io sady nohateveniny ny toerana mba handry feizay ny faritany sy ny renivohitra; ary nasondrony ho avo ny mandan’i Jerosalema.

³⁸Izany no nanamafisan’i Demetry mpanjaka ny maha mpisorombe an’i Simôna

³⁹sy nanendreny azy ho anisan’ny «sakaizan’ny mpanjaka» ary nanomezany azy voninahitra ambony.

⁴⁰Ren’i Demetry manko fa hoe ny Rômanina dia niantso ny Jiosy ho sakaiza sy mpifarimbona ary havana sady nandray tamim-pomba manetriketrika ny irak’i Simôna.

⁴¹Reny koa fa sitraky ny Jiosy sy ny mpisorony ny haha filoha sy mpisorombe an’i Simôna mbamin’ny taranany mandra-pisehon’izay mpaminany mahatoky;

⁴²izy koa no ho tonga mpitari-tafiky ny Jiosy, hikarakara ny zavatra momba ny tempoly, hanendry ny lehiben’orinasa sy ny mpandraharaham-panjakana ary ny mpiandraikitra fitaovam-piadiana sy tanànamimanda.

⁴³I Simôna tokoa no mpikarakara ny zavatra momba ny tempoly, ka hanaiky azy ny olona rehetra; ny taratasim-panjakana rehetra ao Jodea dia hosoratana amin’ny anarany; ary ny tenany hitondra akanjo jaky sy mari-boninahitra volamena.

⁴⁴Na iza na iza amin’ny vahoaka na amin’ny mpisorona dia tsy misy mahazo manafoana ireo zavatra tinapaka ireo na dia iray aza; tsy misy mahazo miantso fivoriana eo amin’ny tanin’i Jodea raha tsy nomen’i Simôna lalana; tsy misy mahazo mitondra akanjo jaky aman-jaigrafy volamena[240].

⁴⁵Na iza na iza manao zavatra mifanohitra amin’ireo didy ireo, na manafoana ampahany aminy, dia hiharam-pamaizana.

⁴⁶Sitraky ny vahoaka rehetra ny anomezana fahefana an’i Simôna hanao araka ireo didy ireo.

⁴⁷Neken’i Simôna sady nankasitrahiny rahateo ny hanao ny raharaha maha mpisorombe sy mpitari-tafika ary mpifehy ny Jiosy mbamin’ny mpisorona, izany hoe ny ho eo ambonin’ny olon-drehetra.

⁴⁸Notapahin’ny Jiosy fa hosoratana amin’ny takelaka halimo izany teny izany, ka hapetraka amina toerana miharihary eo amin’ny kianjan’ny tempoly;

⁴⁹ary hasiana kopian’izany koa ao amin’ny efitrano firaketana mba hampiasain’i Simôna sy ny zanany.