Read Dikateny Iombonana Eto Madagasikara 1 Makabeo 16 Bible Online

1 Makabeo 16 - Dikateny Iombonana Eto Madagasikara bible

1 Makabeo 16

¹Niakatra avy any Gezera[252] i Jôhany, ka nilaza tamin’i Simôna rainy ny nataon’i Kendebeo.

²Dia nantsoin’i Simôna i Joda sy i Jôhany zanany roa lahy zokiny indrindra, ka nitenenany hoe: — Izaho sy ireo rahalahiko ary ny ankohonan-draiko dia nandresy ny fahavalon’i Israely hatramin’ny fahatanoranay ka mandraka androany; ary matetika izahay no nahomby tamin’ny fanafahana ny Israelita.

³Ankehitriny ny tenako efa antitra, ianareo kosa efa ampy taona noho ny fitahian’Andriamanitra; ka aoka ianareo handimby ahy sy ny rahalahiko. Mandehana miady ho an’ny firenentsika, ary homba anareo anie ny fanampiana avy amin’Andriamanitra!

⁴Dia nifantenan’i Jôhany mpiantafika andiany roapolo ary koa mpitaingin-tsoavaly teo amin’ny tany, ka niainga ireo mba hamely an’i Kendebeo ary nitoby alina tao Môdina.

⁵Nifoha maraina ireo miaramila ireo, dia niroso ho eo amin’ny tany lemaka; ary indro tafika marobe an-tongotra sy an-tsoavaly no tamy hifanehatra aminy. Ranon-driaka anankiray no nanelanelana azy roa tonta.

⁶Niorin-toby tandrifin’ny fahavalo i Jôhany sy ny tariny. Hitan’i Jôhany fa natahotra ny hiampita ny ranon-driaka ny miaramilany, ka dia ny tenany no nita voalohany; rehefa nahita izany ireto mpiantafiny, vao nita nanaraka azy.

⁷Nozarain’i Jôhany ho antokony roa ary nalahany teo anelanelan’ny miaramila an-tongotra ny an-tsoavaly, satria maro dia maro ny mpitaingin-tsoavalin’ny fahavalo.

⁸Dia notsofin’ny Israelita ny trômpetra fanaingana hiady, ka nitodi-doha nitsoaka i Kendebeo sy ny tafiny; fahavalo maro no nitsingidina maty, ary ny sisa nitady fialofana tao amin’ny tanànamimandan’i Kedrôna[253].

⁹I Joda rahalahin’i Jôhany dia naratra tamin’izay, fa i Jôhany kosa no nanenjika ny mpandositra ambara-pipakany tany Kedrôna, izay vao naorin’i Kendebeo indray.

¹⁰Nisy nandositra hatrany amin’ireo tilikambo teo akaikin’i Asdôda[254]; fa nodoran’i Jôhany kosa ny tanàna ka nahafatesana vatan-dehilahy andiany roa ny fahavalo. Izay i Jôhany vao niverina soa aman-tsara ho any Jodea.

¹¹I Ptôlemeo, zanakalahin’i Abobôsa, no voatendry ho mpitari-tafika teo amin’ny lemak’i Jerikao; nanam-bolamena sy volafotsy betsaka izy,

¹²satria vinantolahin’i Simôna mpisorombe.

¹³Nahatonga an’i Ptôlemeo hiavonavona am-po sy haniry ho tompon’ny tany izany; dia nisain-dratsy izy hamely an’i Simôna mbamin’ireo zanany lahy ka hahafaty azy am-pitaka.

¹⁴Tamin’izay i Simôna dia nitsiditsidika ireo tanànan’i Jodea ary nilofo nitantana azy; ka nidina tany Jerikao izy sy ny zanany roa lahy Matatià sy Joda, tamin’ny taona faha-177, volana faha-11 na hoe volana Sebata.

¹⁵Noraisin’ity zanakalahin’i Abobôsa izy telo mianaka, tao amin’ilay tanànamimanda kely nampanaoviny ka nantsoina hoe Dôka; nanomanan’i Ptôlemeo fanasana lehibe ny vahiny, kanefa nanafenany miaramila tao.

¹⁶Nony mamo i Simôna sy ireto zanany lahy, dia nitsangana i Ptôlemeo sy iretsy miaramilany ka nandray fiadiana sy niantoraka tamin’i Simôna tao an-trano fanasana, ary namono nahafaty azy sy ny zanany roa lahy mbamin’ny mpanompony vitsivitsy.

¹⁷Fivadihana mahatsiravina sady famalian-dratsy ny soa no nataon’i Ptôlemeo tamin’izany.

¹⁸Avy eo dia tatitra an-tsoratra momba ny zava-nitranga no nalefan’i Ptôlemeo ho an’i Antiôkôsa mpanjaka; sady nangatahany koa izy handefa miaramila hanampy azy mba hanolorany aminy ny tany aman-tanànan’ny Jiosy.

¹⁹Nisy olon-kafa koa nirahin’i Ptôlemeo ho any Gezera[255] mba hamono hahafaty an’i Jôhany; ary nandefasany taratasy ireo komandin-tafika jiosy ka nasainy hiandany aminy sady nampanantenainy homena volafotsy sy volamena ary fanomezana.

²⁰Mbola nisy olona hafa koa nirahin’i Ptôlemeo mba hanao izay hakana an’i Jerosalema sy ny tendrombohitry ny tempoly;

²¹saingy nisy nisosoka mialoha handeha hampandre an’i Jôhany tao Gezera ny namonoana ho faty an-drainy mbamin’ireo rahalahiny sady nanampy hoe: — Naniraka olona i Ptôlemeo mba hamono hahafaty anao koa.

²²Tohina mafy i Jôhany nony nandre izany vaovao izany; dia nosamboriny kosa ireo olona tonga hamono azy, dia novonoiny ho faty, satria fantany tsara ny fikasany hahafaty azy.

²³Ny sisa amin’ny tantaran’i Jôhany, ny ady nataony, ny herimpo nasehony, ny manda nampanaoviny mbamin’ny zavatra hafa rehetra vitany

²⁴dia efa voasoratra avokoa ao anatin’ny boky mitantara ny vaninandro naha mpisorombe azy, nanomboka tamin’ny andro nandimbiasany an-drainy.