Read Dikateny Iombonana Eto Madagasikara 1 Makabeo 2 Bible Online

1 Makabeo 2 - Dikateny Iombonana Eto Madagasikara bible

1 Makabeo 2

¹Tamin’izany vaninandro izany i Matatià, zanakalahin’i Jôhany sy zafin’i Simehôna sady mpisorona anisan’ny taranak’i Jôiariba[11], dia nanapa-kevitra hiala tao Jerosalema ka lasa niorim-ponenana tao Môdîna[12].

²Nanan-janaka dimy lahy izy, dia i Jôhany natao hoe Gadỳ,

³i Simehôna natao hoe Tasy,

⁴i Joda natao hoe Makabeo[13],

⁵i Elehazara natao hoe Avaràna, ary i Jônatàna natao hoe Afosy.

⁶Nahita ny fanimbazimbana nafitsoka eran’i Joda sy tao Jerosalema i Matatià

⁷ka nanao hoe: Indrisy ity manjo ahy! Teraka hahita ny faharavàn’ny fireneko sy ny faharavàn’ny tanàna masina ve aho? Teraka hijanom-poana eto ve aho, kanefa ity tanàna eo am-pelatanan’ny fahavalo, ity toeramasina eo am-pelatanan’ny hafa firenena?

⁸Ny tempoly dia tonga tahaka ny olona very haja;

⁹ny fanaka izay taratry ny voninahiny dia lasan-ko babo[14]. ny zazakely naripaka teny amin’ny kianja; ny zatovo nalavon’ny sabatry ny fahavalo.

¹⁰Nifandimby naka fanjakana teto ny hafa firenena ary nitondra ny anjara babony tamin’ity tanàna ity.

¹¹Ny haingony rehetra nesorina taminy; nahaleo tena izy fahiny, kanefa andevozina ankehitriny.

¹²Kanto sy be voninahitra ny toeramasina nanananay, saingy noravan’ny hafa firenena sy nozimbazimbainy.

¹³Ka inona intsony no mbola mahavelona anay?

¹⁴Tamin’izay i Matatià mbamin’ireo zanany lahy dia nandriatra ny fitafiany sy nisalotra akanjo fisaonana ary nitomany mafy dia mafy.

¹⁵Tamin’izay ny iraky ny mpanjaka, nomena andraikitra hanery ny olona hivadi-pinoana, dia tonga tao Môdîna mba hampanao sorona amin’ny sampy.

¹⁶Israelita maro no niainga hitsena azy; fa i Matatià mbamin’ireo zanany lahy dia niray hina tsy niavaka.

¹⁷Niteny tamin’i Matatià ny irak’i Antiôkôsa, ka nanao hoe: — Ianao no filoha voahaja sy lehibe eto amin’ity tanàna ity, sady tsara tohan’ireo zanakao aman-kavanao.

¹⁸Koa ianao no aoka hanatona voalohany hanatanteraka ny didin’ny mpanjaka, toraka ny efa nataon’ny hafa firenena rehetra sy ny vatan-dehilahin’i Jodea, mbamin’ireo tafajanona any Jerosalema. Dia ho anisan’ny «sakaizan’ny mpanjaka»[15] ianao sy ny zanakao; firavaka volamena amam-bolafotsy sy fanomezana maro no hanomezam-boninahitra anareo.

¹⁹Dia namaly tamim-peo avo i Matatià ka nanao hoe: — Na dia hanaiky an’i Antiôkôsa aza ny hafa firenena rehetra anatin’ny fanjakany, ka samy hahafoy ny fivavahan-drazana sy hanaraka an-tsitrapo ny didiny,

²⁰izaho sy ireo zanako aman-kavako dia hanaraka ny fanekempihavanana notanan’ny razanay.

²¹Sanatriavinay ny hanary ny lalànan’Andriamanitra amam-pitsipiny!

²²Tsy hanaiky ny didin’ny mpanjaka izahay, ka tsy hiala amin’ny fivavahanay na hiankavia na hiankavanana.

²³Vao tapitra niteny i Matatià, dia nisy lehilahy jiosy anankiray nandroso teo imason’ny besinimaro mba hanao sorona, araka ny didin’ny mpanjaka, eo amin’ny alitara natsangana tao Môdîna.

²⁴Nony nahita izany i Matatià, dia nirehitra zotompo sady indray niontana ny tenany. Hatezerana araka ny lalàna no nisondrotra tao aminy ka nampiantoraka azy namono an-dralehilahy teo amin’ny alitara.

²⁵Niaraka tamin’izay koa no namonoany an’ilay iraky ny mpanjaka, nanery hanao sorona; ary dia nazerany ny alitara.

²⁶Toy izany no nirehetan’ny zotompon’i Matatià hiaro ny lalànan’i Mosesy, tahaka ny nataon’i Pinehasa izay namono an’i Zimry, zanakalahin’i Salò[16].

²⁷Avy eo dia nandeha eran’ny tanàna i Matatià niantso tamim-peo avo hoe: — Izay rehetra mirehitra zotompo hiaro ny lalànan’i Mosesy sy hitana ny fanekempihavanana nataon’Andriamanitra, samia miainga hanaraka ahy avokoa.

²⁸Taorian’izany i Matatià sy ireo zanany lahy dia nandositra nankany an-tendrombohitra, ary nandao izay rehetra nananany tao an-tanàna.

²⁹Tamin’izay koa dia nisy Jiosy marobe izay nikatsaka ny fahamarinana sy nilofo tamin’ny lalànan’i Mosesy, ka nidina ho any an-taniefitra[17];

³⁰tapa-kevitra honina tany izy ireo mbamin’ny vady aman-janany sy ny biby fiompiny, satria efa nitambesaran’ny lozam-panenjehana nanjo azy.

³¹Nilazana ny manamboninahitry ny mpanjaka mbamin’ny miaramila tao Jerosalema, teo amin’ny Tanànan’i Davida, fa nisy olona nitsipaka ny didin’ny mpanjaka, ary lasa nidina any amin’ny toeram-pierena any an-taniefitra.

³²Dia nirohotra nanenjika azy ny andia-miaramila; ka rehefa nahatratra azy kosa ireo, dia nitoby tandrify azy sy nivonon-kamely amin’ny andro sabata.

³³Hoy izy tamin’ireo mpandositra: — Ampy izay! Mivoaha tao ianareo; tanteraho ny didin’ny mpanjaka, dia ho velona ianareo.

³⁴Fa novalian’ny Jiosy hoe: — Tsy hivoaka tato izahay ary tsy hanatanteraka ny didin’ny mpanjaka, mampandika ny fepetran’ny andro sabata[18].

³⁵Niaraka tamin’izay ny miaramila dia nandraikitra ady taminy;

³⁶kanefa tsy namaly azy ny Jiosy na nitora-bato iray akory hanoherana azy na nanampina toeram-pierena.

³⁷Fa hoy izy hoe: «Aoka izahay rehetra ho faty avokoa amin’ny hitsimponay! Ny lanitra sy ny tany no vavolombelona mahita anay, fa vonoinareo ho faty tsy an-drariny izahay.»

³⁸Dia nasian’ny fahavalo tamin’ny andro sabata izy ireo mbamin’ny vady aman-janany sy ny biby fiompiny. Tokony ho arivo no isan’ny olona maty.

³⁹Nalahelo mafy i Matatià sy ireo sakaizany nandre izany famonoana ho faty izany,

⁴⁰ka nifampilaza hoe: «Raha samy manao toy izany nataon’ny mpiray firenena amintsika izany avokoa isika, ka tsy miady amin’ny hafa firenena mba hiaro ny aintsika sy ny fomba amam-panaontsika, dia hofongorany vetivety eto ambonin’ny tany isika.»

⁴¹Koa tamin’izany andro izany ihany no nanaovany izao fanapahan-kevitra izao: «Na iza na iza tonga hamely antsika amin’ny andro sabata, dia hasiantsika; fa tsy hety hovonoina ho faty fotsiny isika, tahaka ny nahafatesan’ireo mpiray firenena amintsika tao amin’ny toeram-piereny.»

⁴²Tamin’izay ny antokon’ny Hasidianina[19] dia nomba an-dry Matatià koa: lehilahy mahery fo tao Israely ireo sady niraiki-po avokoa tamin’ny lalànan’i Mosesy.

⁴³Ankoatra izany, nanatevina isa sy nampitombo hery azy koa izay rehetra nitady ho afaka amin’ny lozam-panenjehana.

⁴⁴Dia nampijoro tafika iray izy mitambatra, ka namely tamin-katezerana sy tamin-kavinirana ireo mpivadika sy tsy mpivavaka; ny sisa tsy azony kosa dia nandositra any amin’ny hafa firenena mba hanavotra aina.

⁴⁵Nanao fitetezana hatraiza hatraiza i Matatià sy ireo sakaizany mba handrava ny alitaran-tsampy.

⁴⁶Noforany avokoa ny zazalahy rehetra hitany tsy voafora teo amin’ny tanin’i Israely,

⁴⁷ary noroahiny ny mpiavonavona amin’Andriamanitra; ka nahomby ny raharaha izay notarihiny.

⁴⁸Ny lalànan’i Mosesy no narovany tamin’ny famelezana nafitsok’ireo hafa firenena sy ireo mpanjaka; ka tsy navelany hahazo vahana ilay mpanjaka mivoana.

⁴⁹Nony efa antomotra ny andro hahafatesan’i Matatià, dia hoy izy tamin’ireo zanany: — Ankehitriny, manjaka ny avonavona sy faniratsirana, ka andro fandravana sy fahatezerana mirehitra izao.

⁵⁰Anaka, aoka ianareo hanana zotompo hiaro ny lalànan’i Mosesy ary hahafoy aina ho an’ny fanekempihavanana notanan’ny razantsika.

⁵¹Tsarovy ny asa nataon’ny razantsika tamin’ny androny, fa hahazo voninahitra sy laza maharitra mandrakizay ianareo manahaka azy.

⁵²Hita ho nahatoky i Abrahama[20] tamin’ny fizahan-toetra, ka nankatoavana azy ho marina izany.

⁵³Nitandrina ny didin’Andriamanitra i Jôsefa[21] tamin’ny androm-pahoriany, ka tonga tompon’i Ejipta izy.

⁵⁴Nanana zotompo nirehidrehitra i Pinehasa razantsika[22], ka nahazo antoka izy fa ho mpisorona hatrany ny taranany.

⁵⁵Nanatanteraka ny teny nanirahana azy i Josoa[23], ka tonga mpitsara nitondra an’i Israely izy.

⁵⁶Nijoro ho vavolombelona i Kaleba[24] teo anatrehan’ny Israelita tafangona, ka nahazo zaratany anankiray ho lovany.

⁵⁷Niraiki-po tamin’Andriamanitra i Davida[25], ka nahazo sezafiandrianana maha mpanjaka ho azy sy ho an’ny taranany mifandimby.

⁵⁸Nanana zotompo nirehidrehitra i Elià[26], hiarovana ny lalànan’Andriamanitra, ka nopaohina ho any an-danitra izy.

⁵⁹Natoky an’Andriamanitra i Hananià sy i Hazarià ary i Misaela[27], ka novonjena tsy ho azon’ny lelafo.

⁶⁰Nahitsy fo i Daniela[28], ka novonjena tsy ho azon’ny vavan’ny liona.

⁶¹Koa dinidiniho amin’izay fa isaky ny taranaka mifandimby dia tsy mba hiketraka izay rehetra manantena an’Andriamanitra.

⁶²Aza matahotra ny rahom-bava ataon’io mpanjaka mivoana io, fa ho fahalòvana aman-kankana no hiafaran’ny voninahiny.

⁶³Anio izy manandra-tena fa rahampitso izy tsy ho hita intsony, satria miverina amin’ny vovoka niaviany; ka levona ny tetikadiny.

⁶⁴Koa matanjaha sy mahereza fo ianareo, anaka, hiorina amin’ny lalànan’Andriamanitra satria izany no hanananareo voninahitra.

⁶⁵Indro i Simehôna rahalahinareo! Fantatro fa lehilahy tsara torohevitra izy, ka henoy mandrakariva, fa dia hanjary ray ho anareo izy.

⁶⁶Aoka i Joda Makabeo, lehilahy tomady sy mahery fo hatramin’ny fahatanorany, no ho filohan’ny tafikareo sy hitarika ny ady amin’ny hafa firenena!

⁶⁷Ianareo kosa, mamoria izay rehetra mitandrina ny lalàna mba homba anareo ary mamalia ny ratsy natao tamin’ny mpiray firenena aminareo.

⁶⁸Atsingereno amin’ny hafa firenena ny nafitsony taminareo ary tandremo ny didy raketin’ny lalànan’Andriamanitra.

⁶⁹Nony avy nitsodrano ireo zanany i Matatià, dia voaangona any amin’ny razany.

⁷⁰Tamin’ny taona faha-146[29] no nahafatesany; ary tao amin’ny fasan-drazany no nandevenan’ireo zanany azy. Fisaonana lehibe no nataon’i Israely manontolo taminy.