Read Dikateny Iombonana Eto Madagasikara 1 Makabeo 7 Bible Online

1 Makabeo 7 - Dikateny Iombonana Eto Madagasikara bible

1 Makabeo 7

¹Tamin’ny taona faha-151[121] dia nitsoaka avy tao Rôma i Demetry zanakalahin’i Seleokôsa, ka teo amin’ny tanàna anankiray amoron-dranomasina[122] no nitodiany nomban’olona vitsivitsy ary teo no nitononany tena ho mpanjaka.

²Fony i Demetry nizotra ho any amin’ny lapan’ireo mpanjaka razany, dia nosamborin’ny miaramila i Antiôkôsa sy i Lisià mba hoentina mankeo aminy.

³Kanjo nony nampandrenesina izany i Demetry, dia nilaza hoe: Aza atao mifanatri-tava amiko ireo.

⁴Ka dia novonoin’ny miaramila ireo, fa i Demetry no nipetraka eo amin’ny sezafiandrianam-panjakàny.

⁵Nirohotra nankao amin’ny mpanjaka ireo Israelita rehetra mpanohitra ny lalàna sy mpankahala ny fivavahana; ary i Alkima, izay naniry ho mpisorombe[123], no nitarika azy.

⁶Teo anatrehan’ny mpanjaka no niampangan’ireo ny vahoaka jiosy hafa toy izao: — Novonoin’i Joda sy ireo rahalahiny ny olona rehetra mpiandany aminao ary noroahiny hiala amin’ny taninay izahay.

⁷Koa ankehitriny maniraha olona iray mahatoky anao mba handeha hizaha ny fanimbana rehetra nafitsok’i Joda taminay sy tamin’ny faritaninao, ry mpanjaka. Dia asaovy faiziny mafy i Joda sy ireo rahalahiny mbamin’izay rehetra manampy azy.

⁸Nofidin’i Demetry mpanjaka tamin’ireo antsoina hoe «sakaizan’ny mpanjaka[124]» i Bakida governoran’ny faritra andrefan’ny ony Eofrata sady lehilahy ambony tao anatin’ny fanjakana no niraiki-po tamin’ny mpanjaka; io no nirahiny miaraka amin’i Alkima izay mpankahala ny fivavahana[125].

⁹Ity Alkima ity dia notendren’i Demetry ho mpisorombe sy nodidiany hamaly ny ratsy nataon’ny Israelita.

¹⁰Nony nandeha izy roa lahy, dia niaraka tamina tafika goavana; vao tonga tany Jodea ireo, dia nandefa iraka nitondra tenim-pihavanana ho any amin’i Joda mbamin’ireo rahalahiny hamitahana azy.

¹¹Saingy noho i Bakida sy i Alkima hita fa tonga nomban-tafika lehibe, dia tsy nohenoin’ny Jiosy ny teniny.

¹²Kanefa nanatona an’i Alkima sy i Bakida ihany, ny mpahay lalàna andiany anankiray mba hitady izay vahaolana ara-drariny;

¹³ary ny Hasidianina[126], teo amin’ny samy Israelita, no lohalaharana nila fihavanana,

¹⁴fa hoy ireo hoe: «Mpisorona taranak’i Aharôna io Alkima tonga niaraka tamin’ny tafi-panjakana io, ka tsy hanisy ratsy antsika.»

¹⁵Dia nanao tenim-pihavanana tamin’ireo mpahay lalàna tokoa i Alkima, sady nianiana hoe: — Tsy mihevitra akory ny hanisy ratsy anareo na ny sakaizanareo izahay.

¹⁶Dia natoky an’i Alkima ireo, kanjo nasain’io nosamborina ny enimpolo tamin’ny mpahay lalàna, ka nasainy novonoina tamin’ny indray andro ihany, araka ny voalazan’ny Soratra Masina hoe:

¹⁷«Nanely ny fatin’ireo mpivavaka aminao izy ary nampandriaka ny rany manodidina an’i Jerosalema, ary tsy nisy olona handevina an’ireny akory.»

¹⁸Koa raiki-tahotra sy nivadi-po ny vahoaka jiosy rehetra tamin’izay sady loa-bolana hoe: «Tsy misy rariny sy hitsiny ao amin’ireo olona ireo, satria ny fifanekena amam-pianianana nataony no nivadihany.»

¹⁹Niala tao Jerosalema kosa i Bakida, dia nandeha nampitoby tafika tao Bety-Zeta[127]; ary nampisambotra olona maro niandany taminy sy Jiosy hafa sasantsasany izy, ka nampamono azy sy nampamarina ny fatiny tao amin’ilay lava-drano lehibe.

²⁰Avy eo i Alkima no nanankinan’i Bakida ny faritany sady namelany miaramila hanampy azy; izay vao niverina ho any amin’ny mpanjaka i Bakida.

²¹Nanao izay tratry ny ainy kosa i Alkima mba hankatoavam-bahoaka ny maha mpisorombe azy.

²²Nivory teo aminy avokoa ireo mpanabataba ny vahoaka jiosy, dia nahazo nitantana ny tanin’i Jodea ary nampidi-doza lehibe tamin’i Israely.

²³Hitan’i Joda ny ratsy isan-karazany nafitsok’i Alkima sy ireo mpiandany aminy, dia ratsy mangidy kokoa noho izay nataon’ny hafa firenena aza;

²⁴koa nitety ny faritra Jodea manontolo izy, ary namay ny mpivadika sy nisakana azy tsy hivezivezy eran’ny faritany.

²⁵Nony tsapan’i Alkima fa nihanahery i Joda sy ny namany ka tsy ho zakany toherina intsony, dia niverina ho any amin’ny mpanjaka izy sady niampanga iretsy ho nanao ratsy lozan-tany.

²⁶I Nikanôra, iray amin’ireo mpitari-tafika malaza tokoa ho an’i Demetry, dia nankahala sy nanohitra ny Israelita. Koa nirahin’ny mpanjaka izy sady nomeny didy handringana izany vahoaka izany.

²⁷Nony tonga tany Jerosalema i Nikanôra nomban-tafika goavana, dia nandefa tenim-pihavanana tamin’i Joda sy ireo rahalahiny mba hamitahany azy izy nanao hoe:

²⁸«Aoka re tsy hisy ady aminareo sy amiko; mba te ho avy aho miaraka amin’olona vitsivitsy hahita tava anareo amim-pihavanana!»

²⁹Rehefa tonga teo amin’i Joda i Nikanôra, dia nifampiarahaba tamim-pihavanana izy roa lahy; kanjo iretsy fahavalo efa nivonon-kisambotra an’i Joda.

³⁰Nisy nampandre an’i Joda kosa fa fikendrena hamadika no nankanesan’i Nikanôra teo aminy; ka natahotra izy sady nihataka tsy nety nihaona taminy intsony.

³¹Fantatr’i Nikanôra tamin’izay fa vaky ny tetik’adiny; ka niala tao Jerosalema izy mba hifanehatra sy hiady amin’i Joda teo akaikin’i Kafarsalamà[128].

³²Nahafatesana vatan-dehilahy andiany dimy eo ho eo ny tafik’i Nikanôra tamin’izay, ary nandositra nankao an-Tanànan’i Davida ny sisa.

³³Taorian’izany no niakatra tao an-tendrombohitra Tsiôna i Nikanôra; ka nivoaka ny tempoly ireo mpisorona sasantsasany nomban’ny ampahan’ny loholom-bahoaka mba hiarahaba azy tamim-pihavanana sy haneho aminy ny sorona dorana manontolo natolotra tamin’Andriamanitra ho an’ny mpanjaka.

³⁴I Nikanôra kosa anefa naniratsira sy namingavinga an’ireo olona ireo ka nandrora taminy sy nahatonga azy ho voaloto ara-pivavahana, ary koa nanao teny avonavona taminy,

³⁵sady nanonona tamin-kavinirana izao fianianana izao: — Raha tsy atolotra ho eo an-tanako izao ankehitriny izao i Joda mbamin’ny tafiny, dia hodorako ity tempoly ity raha vao tafaverina avy nampandry tany aho.

³⁶Dia lasa nandeha tamin-katezerana mafy i Nikanôra; fa ny mpisorona kosa niditra ny tempoly ka nitsangana teo anoloan’ny alitara sy ny Toeramasina sady nanao tamin-dranomaso hoe:

³⁷— Ianao, ry Tompo, no nifidy ity trano ity hiantsoana ny anaranao eo aminy mba ho trano fivavahana amam-pitarainana ho an’ny vahoakanao.

³⁸Koa valio ny ratsy nafitsok’iny lehilahy iny mbamin’ny tafiny. Tsarovy fa nanao teny fanimbazimbana ireo, ka aza avela hiaina intsony.

³⁹Niala tao Jerosalema i Nikanôra, dia lasa nampitoby tafika teo akaikin’i Bety-Hôrôna[129]; ary nisy antoko miaramila avy any Siria nanatevin-daharana azy.

⁴⁰I Joda kosa niaraka tamina miaramila andiany telo no nitoby teo akaikin’i Hadakà[130], ary nivavaka nanao hoe:

⁴¹— Tompo ô, rehefa nanevateva Anao fahiny ireo iraky ny mpanjaka asirianina[131], dia tonga ny anjelinao namono andiany 185 tamin’ny miaramilany.

⁴²Koa mba aringano toraka izany koa ity tafika eto anatrehanay ity anio, mba hieken’izay rehetra sisa velona fa niteny ratsy ny tempoly tokoa i Nikanôra; araka ny haratsiam-panahiny no itsarao io lehilahy io.

⁴³Dia nanomboka ady ireto tafika roa tonta tamin’ny volana Adara, andro faha-13; ka montsana mihitsy ny miaramilan’i Nikanôra, ary ny tenany aza no maty voalohany teo amin’ny ady.

⁴⁴Rehefa nahita an’i Nikanôra maty ireo miaramilany, dia nanary fiadiana ka lasa nandositra.

⁴⁵Ary nenjehin’ny Jiosy lalana indray andro ireny, hatreo Hadasà ka hatrany Gezera[132], sady nampitatatatainy ny trômpetra fanairana.

⁴⁶Koa ny olona avy amin’ny tanàna manodidina rehetra tany Jodea no niainga nanarona ny fahavalo ka nampiverina azy hifanehatra; dia lavon-tsabatra avokoa ireo, ka tsy nisy niangana na iray aza.

⁴⁷Nendahan’ny Jiosy ireto resy ary nobaboiny fananana. Ny lohan’i Nikanôra kosa mbamin’ny tanany havanana izay faninjiny tamim-pireharehana dia samy notapahiny ka nentiny hahantona nanatrika an’i Jerosalema.

⁴⁸Feno hafaliana tokoa ny vahoaka ary nankalaza io andro io toy ny androm-pifaliana lehibe.

⁴⁹Dia naraikitra hankalazaina isan-taona koa izany amin’ny volana Adara, andro faha-13[133].

⁵⁰Ary nandry feizay nandritra ny fotoana kelikely ny tanin’i Jodea.