Read Dikateny Iombonana Eto Madagasikara 1 Makabeo 8 Bible Online

1 Makabeo 8 - Dikateny Iombonana Eto Madagasikara bible

1 Makabeo 8

¹Ren’i Joda Makabeo ny laza nananan’ny Rômanina fa hoe mahery an’ady ireo, manisy soa an’izay rehetra miandany aminy, ary manao fihavanana amin’izay rehetra manatona azy. Eny, mahery an’ady tokoa ireo

²fa notantarain’olona tamin’i Joda ny ady nataony sy ny herim-po nasehony tany amin’ny Gôloà izay nampanekeny azy sy tongany mpandoa hetra ho azy.

³Teo koa izay rehetra vitan’ny Rômanina tany Espaina mba hahazoany ny toerana fihadiam-bolamena sy volafotsy tao;

⁴ny fahamalinana amam-paharetany no nampanekeny manontolo io tany io, na dia lavitra an’i Rôma tokoa aza. Nataony toy izany koa ny mpanjaka avy tany am-paravazan-tany tonga nanafika azy; noreseny sy nampitondrainy faisana ireny, ary ny sisa velona kosa nampandoaviny hetra ho azy isan-taona.

⁵Resiny an’ady sy nampanekeny azy avokoa i Filipo sy i Persea[134] mpanjaka masedônianina mbamin’izay nandray fiadiana hamely azy.

⁶Resin’ny Rômanina koa i Antiôkôsa Lehibe[135] mpanjakan’i Azia[136], izay tonga hiady taminy, nitondra elefanta 120, mpitaingin-tsoavaly, kalesy ary tafika goavana tokoa:

⁷Nataony sambo-belona ilay io, dia notereny handoa hetra be dia be ho azy ny tenany mbamin’ny dimbiny sady hametraka olona ho antoka.

⁸Farany notereny izy hamoy ny ampahan’ny taniny, dia i India sy i Media[137] ary i Lidia mbamin’ny faritany sasany tsara indrindra; ka rehefa voarain’ny Rômanina avy amin’i Antiôkôsa Lehibe ireo dia natolony ho an’i Eomena[138] mpanjaka.

⁹Nanapa-kevitra hamely sy handrava ny Rômanina ny Grika; fa nony nandre izany ireo,

¹⁰dia naniraka jeneraly iray monja hamely azy, ary niady taminy ka be no matiny; dia nobaboiny ny vady aman-janany, norobainy ny fananany, nampanekeny ny taniny, noravany ny mandany ary nandevoziny mandraka androany ny mponina[139].

¹¹Ny fanjakana hafa rehetra mbamin’ny nosy, izay nanohitra ny Rômanina, dia noravany sy nampanekeny avokoa; fa izay sakaizany sy izay nametra-pitokiana taminy kosa dia nitandroany fihavanana.

¹²Nampaneken’ny Rômanina ireo mpanjaka na ny akaiky na ny lavitra azy, ary natahotra azy avokoa izay nandre ny lazany.

¹³Izay rehetra tiany hampiana sy homem-panjakana, dia manjaka; izay tiany halàm-pahefana kosa dia alany; nahery dia nahery ny Rômanina.

¹⁴Na eo aza izany rehetra izany, tsy mba nisy nisatroka satroboninahitra izy na nitafy jaky hanambony tena;

¹⁵namorona antenimieran-doholona nisy solotena 320 lahy izy, ka isan’andro ireo loholona ireo no miara-nidinika sy mikarakara tsy tapaka ny raharaham-bahoaka mba ho fanasoavana azy.

¹⁶Lehilahy iray[140] no ametrahany ny fahefana isan-taona mba hifehy azy Rômanina sy hanapaka ny fanjakany manontolo; dia samy manaiky izany lehilahy iray izany ny besinimaro, ary tsy mba misy fitsiriritana na fialonana eo aminy.

¹⁷I Eopôlema zanakalahin’i Jôhany sady zafin’i Hakôsa ary koa i Jasôna zanakalahin’i Elehazara no voafidin’i Joda Makabeo sy nirahiny ho any Roma mba hamitrana fisakaizana sy fifarimbonana amin’ny Rômanina.

¹⁸Ny zava-kendren’i Joda dia ny hanafahana ny Jiosy amin’ny jioga, satria hitan’ny Rômanina ny fanandevozan’ny fanjakana grika an’i Israely.

¹⁹Dia lasa nankany Rôma i Eopôlema sy i Jasôna, nandeha lalan-davitra dia lavitra. Nony tafiditra teo anoloan’ny antenimieran-doholona izy roa lahy, dia nandaha-teny toy izao:

²⁰— Naniraka anay ho aty aminareo i Joda Makabeo sy ireo rahalahiny mbamin’ny vahoaka jiosy hamitrana fifarimbonana sy fihavanana aminareo, ka ho voasoratra ho anisan’ny mpifarimbona aminareo sy sakaizanareo.

²¹Dia nankatoavin’ireo loholona izany fangatahana izany;

²²ka ny kopian’ny fifanekena nosoratan’ny Rômanina tamin’ny takelaka halimo sy nalefany ho any Jerosalema, mba hampahatsiarovana amin’ny Jiosy izany famitranam-pihavanana sy fifarimbonana izany, dia toy izao:

²³— Hambinina mandrakizay anie ny Rômanina sy ny firenena jiosy, na an-dranomasina na an-tanety! Ho lavitra azy roa tonta anie ny sabatra amam-pahavalo!

²⁴Raha misy ady atao hamelezana ny Rômanina aloha na ny anankiray amin’ireo firenena mpifarimbona aminy, ao anatin’ny fanjakany manontolo,

²⁵dia hazoto fo hifarimbona aminy tokoa ny firenena jiosy, araka izay takîn’ny toe-javatra aminy.

²⁶Ka izay mpamely ny Rômanina dia tsy homen’ny Jiosy na hampindraminy vary na fiadiana na vola na sambo, araka izay tinapak’i Rôma; ary hotanterahin’ny Jiosy ny zavatra nekeny, ka tsy handraisany setriny na inona na inona izany.

²⁷Toraka izany koa, raha misy ady apoaka hamelezana ny firenena jiosy aloha, dia hazoto fanahy hifarimbona aminy tokoa ny Rômanina, araka izay takin’ny toe-javatra aminy.

²⁸Tsy homen’ny Rômanina vary na fiadiana na vola na sambo ireo fahavalon’ny Jiosy, araka izay tinapak’i Rôma; ary hotanterahiny amin-kitsimpo ny zavatra nekeny.

²⁹Araka izany rindran-teny izany no nanaovan’ny Rômanina fifanarahana tamin’ny vahoaka jiosy.

³⁰Any aoriana, raha misy te hanampy na hanala amin’izany izy roa tonta, dia azony atao araka izay tiany izany; ka hanan-kery izay zavatra nanampy na nalana.

³¹Ny amin’ny fampahoriana nafitsok’i Demetry mpanjaka tamin’ny Jiosy kosa dia nanoratra ho any amin’io izahay nanao hoe: «Nahoana no ampitondrainao fampahoriana mavesatra ny Jiosy sakaizanay sy mpifarimbona aminay.

³²Raha mbola torîny aminay indray àry ianao, dia hiaro ny rariny ananany izahay ary hiady aminao na an-dranomasina na an-tanety.»