Read Dikateny Iombonana Eto Madagasikara Matio 14 Bible Online

Matio 14 - Dikateny Iombonana Eto Madagasikara bible

Matio 14

¹Tamin’izany andro izany, dia ren’i Herôda mpanjaka ny lazan’i Jesoa,

²ary hoy izy tamin’ny mpanompony: — I Jôhany Mpanao batisa izay: efa maty izy no velona indray, ka izany no ananany hery ahavitany asa mahagaga.

³I Herôda manko no nampisambotra an’i Jôhany ary nampigadra azy sy nampanao azy am-ponja; ny amin’i Herôdiada, vadin’i Filipo rahalahin’i Herôda, no antony.

⁴Fa hoy i Jôhany tamin’i Herôda: — Tsy azonao atao ny manambady an’i Herôdiada[103]!

⁵Dia nifofo ny ain’i Jôhany i Herôda, saingy natahotra ny vahoaka jiosy, satria noheverin-dry zareo ho mpaminanin’Andriamanitra i Jôhany.

⁶Nony tonga anefa ny fitsingerenan’ny andro nahaterahan’i Herôda, dia nandihy teo anatrehan’ny olona nasaina ny zanakavavin’i Herôdiada ka nahafaly an’i Herôda.

⁷Noho izany, dia niozonozona mihitsy ity mpanjaka fa hanome an-drazazavavy ny zavatra hangatahiny na inona na inona.

⁸Rehefa nomen-dreniny hevitra razazavavy, dia niteny hoe: — Omeo ahy etoana an-dovia ny lohan’i Jôhany Mpanao batisa!

⁹Nalahelo ny mpanjaka; saingy noho izy niozonozona teo anatrehan’ny olona niara-nisakafo taminy, dia nasainy homena an-drazazavavy izany.

¹⁰Ary naniraka olona i Herôda hanapa-doha an’i Jôhany tany am-ponja.

¹¹Dia nentina an-dovia ny lohan’i Jôhany; ka nomena an-drazazavavy, ary nentina tany amin-dreniny.

¹²Tonga kosa ny mpianatr’i Jôhany, ka naka ny faty sy nandevina azy, ary lasa nilaza tamin’i Jesoa ny zava-nitranga.

¹³Nony nahare izany i Jesoa, dia niala teo ka niondrana an-tsambokely mba hitokana any an-taniefitra. Vao nandre ny foto-dian’i Jesoa ny vahoaka, dia niainga avy amin’ny tanàna samihafa ka nizotra ny moron-drano nanaraka Azy.

¹⁴Rehefa nidina avy ao an-tsambokely i Jesoa, dia nahita vahoaka marobe, ka onena azy ka nanasitrana ny marary teo aminy.

¹⁵Nony hariva ny andro, dia nanatona an’i Jesoa ny mpianany ka nanao hoe: — Taniefitra ity toerana ity ary ny andro efa hariva; koa ravao ny vahoaka mba hamonjy tanàna hividy sakafo.

¹⁶Fa novalian’i Jesoa hoe: — Tsy tokony handeha izy; ianareo no aoka hanome hanina azy.

¹⁷Dia hoy ny mpianatra taminy: — Tsy misy afa-tsy mofo dimy sy trondro anankiroa atỳ aminay.

¹⁸Ary hoy i Jesoa: — Ento atỳ amiko izany.

¹⁹Dia nasain’i Jesoa nipetraka teny amin’ny ahitra ny vahoaka. Noraisin’i Jesoa tamin’izay ny mofo dimy sy ny trondro anankiroa; ary rehefa niandrandra ny lanitra ka nisaotra an’Andriamanitra Izy, dia nanapaka ny mofo sy nanome azy ny mpianatra; ny mpianatra kosa nandroso izany tamin’ny vahoaka.

²⁰Dia samy nihinana avokoa izy rehetra ka voky. Ary nentin’ireo mpianatra ny tapa-mofo aman-trondro[104] ambiny ka nahafeno sobika 12.

²¹Nefa dia tokony ho dimy arivo ny vatan-dehilahy nihinana teo, afa-tsy ny zaza amam-behivavy[105].

²²Vetivety foana taorian’izay, dia noteren’i Jesoa hiditra tao an-tsambokely ireo mpianatra ary nasainy hialoha Azy eny ampita; fa Izy mbola handefa ny vahoaka hody.

²³Rehefa avy nandefa ny vahoaka i Jesoa, dia niakatra tany an-tendrombohitra mba hitokana hivavaka. Nony maizina ny andro, dia i Jesoa irery sisa teo.

²⁴Ny sambokely tamin’izay dia efa kilaometatra vitsivitsy[106] avy eny amorona ary natopatopan’ny alon-drano, satria notohain’ny rivotra.

²⁵Ary tamin’ny maraina efa naneno akoho, dia lasa nanatona ny mpianany i Jesoa, nandeha teny ambony rano.

²⁶Kanjo nahatazana an’i Jesoa nandeha teny ambony rano ireo mpianatra ka raiki-tahotra sady nanao hoe: — Matoatoa io! Niantsoantso mafy ny mpianatra noho ny tahotra.

²⁷Avy hatrany anefa dia niteny i Jesoa nanao taminy hoe: — Mahereza, fa Izaho ity; aoka izay ny tahotra!

²⁸Dia hoy i Petera tamin’i Jesoa: — Tompo ô, raha Ianao tokoa, dia asaovy mankeny aminao eny ambony rano aho.

²⁹Dia novalian’i Jesoa hoe: — Avia! Ary niala tao an-tsambokely i Petera ka nandeha teny ambony rano hankeny amin’i Jesoa.

³⁰Kanjo nony hitan’i Petera fa nahery ny rivotra, dia natahotra izy; ary raha nanomboka nilentika izy, dia niantsoantso mafy hoe: — Tompo ô, vonjeo aho!

³¹Avy hatrany i Jesoa dia nanatsotra tanana ka nandray an’i Petera ary nanao taminy hoe: — Ry kely finoana, nahoana no nisalasala ianao?

³²Ary rehefa tafakatra tao an-tsambokely i Jesoa sy i Petera, dia nitsahatra ny rivotra.

³³Ry zareo tao an-tsambokely kosa niankohoka teo anatrehan’i Jesoa sady niteny hoe: — Tena Zanak’Andriamanitra tokoa Ianao!

³⁴Nony tafita ny rano i Jesoa mbamin’ny mpianany, dia tonga teo amin’ny faritanin’i Genesareta[107].

³⁵Nahafantatra an’i Jesoa ny tompon-tany tao, ka nandefa iraka teny amin’ny tany rehetra manodidina hilaza ny fahatongavany; ary dia nentin’ny olona teo amin’i Jesoa ny marary rehetra.

³⁶Niangavian’ny olona Izy mba hamela ny marary hikasika na dia ny somotraviavin-dambany ihany aza; ary izay rehetra nikasika dia sitrana avokoa.