Read Dikateny Iombonana Eto Madagasikara Matio 15 Bible Online

Matio 15 - Dikateny Iombonana Eto Madagasikara bible

Matio 15

¹Tamin’izay dia nisy Farisianina sy mpahay lalàna avy tany Jerosalema, nanatona an’i Jesoa ary nanontany Azy hoe:

²— Nahoana ny mpianatrao no mandika ny fomba amam-panao nampitain’ny razantsika? Tsy mba manasa tanana araka ny fomba ara-pivavahana manko ny mpianatrao raha hihinan-kanina[108]!

³Dia novalian’i Jesoa hoe: — Nahoana kosa ianareo no mandika ny didin’Andriamanitra mba hifikiranareo amin’ny fomba amam-panaonareo?

⁴Fa hoy Andriamanitra hoe: «Hajao ny rainao sy ny reninao», ary koa hoe: «Izay miteny ratsy ny rainy na ny reniny dia aoka hovonoin-ko faty[109].»

⁵Ianareo kosa manao hoe: «Na iza na iza hilaza amin’ny rainy na ny reniny hoe: Efa nataoko fanatitra ho an’Andriamanitra ny zavatra tokony hanasoavako anao,

⁶dia tsy mahazo manolotra mari-panajana ho an’ny rainy na ny reniny intsony[110].» Koa ny fomba amam-panaonareo no nanafoananareo ny tenin’Andriamanitra.

⁷Ry mpihatsaravelatsihy, marina tokoa ny naminanian’i Isaià anareo hoe:

⁸«Ity vahoaka ity, hoy Andriamanitra, tendro-molotra no anajany Ahy fa ny fony kosa lavitra Ahy mihitsy;

⁹ka poaka àty ny fivavahana ataony amiko, satria didin’olombelona no ambarany ho fampianarako[111].»

¹⁰Dia nantsoin’i Jesoa hankeo aminy kosa ny vahoaka sady nilazany hoe: — Mihainoa ka mahafantara:

¹¹Tsy izay miditra ao am-bavan’ny olona no mahaloto azy; fa izay aloaky ny vavan’ny olona no mahaloto azy.

¹²Tamin’izay dia nanatona an’i Jesoa ny mpianany, ka nanao taminy hoe: — Fantatrao ve fa tezitra mafy ny Farisianina raha nandre izany teny izany?

¹³Fa novalian’i Jesoa hoe: — Ny voly rehetra tsy nambolen’ny Raiko Izay any an-danitra dia hongotana.

¹⁴Avelao any ireo, fa jamba mitantana jamba; ary raha misy jamba mifampitantana, dia hifamarina an-kady.

¹⁵Dia niteny i Petera ka nanao taminy hoe: — Hazavao aminay ny hevitr’ilay fanoharana teo.

¹⁶Dia hoy i Jesoa: — Ianareo koa ve tsy mahafantatra mandrak’izao?

¹⁷Tsy takatrareo ve fa izay rehetra miditra ao am-bava dia lasa any an-kibo ka alefa any amin’ny fanariana azy.

¹⁸Fa izay aloaky ny vava kosa dia mipoitra avy ao am-po, ary izany no mahaloto ny olona.

¹⁹Satria avy ao am-pon’ny olona no ipoiran’ny sain-dratsy mahatonga azy hamono olona, haka vadin’olona, hijangajanga, hangalatra, hanao vavolombelona tsy marina, ary hanao vava ratsy.

²⁰Izany no mahaloto ny olona; fa ny mihinana tsy misasa tanana, tsy mba mahaloto ny olona.

²¹Dia niala teo i Jesoa ary nankany amin’ny faritanin’i Tiro sy i Sidôna.

²²Ary indro nisy vehivavy kanahanita[112], avy amin’izany faritany izany, tonga teo amin’i Jesoa sady niantsoantso mafy hoe: — Mamindrà fo amiko, ry Tompo, Zanak’i Davida ô; fa ampahorîn’ny demony mafy loatra ny zanako vavy!

²³Tsy namaly teny azy i Jesoa, ka nohatonin’ny mpianany ary nangatahany hoe: — Omeo an-dramatoa io izay tadiaviny[113], satria miantsoantso mafy manjohy antsika izy.

²⁴Fa novalian’i Jesoa hoe: — Tsy nirahina Aho afa-tsy amin’ireo ondry very, dia ny vahoaka Israely[114]!

²⁵Tonga niankohoka teo anatrehan’i Jesoa anefa ravehivavy ka nanao hoe: — Tompo ô, ampio re aho!

²⁶Dia novalian’i Jesoa hoe: — Tsy mety raha mofon-jaza no alaina ka atsipy ho an’ny amboakely.

²⁷Fa hoy kosa ravehivavy: — Marina izany, Tompoko, kanefa na ny amboakely aza dia mba mihinana ny sombintsombiny latsaka avy amin’ny latabatry ny tompony ihany.

²⁸Tamin’izay dia niteny i Jesoa nanao taminy hoe: — Lehibe ny finoanao, ramatoa; aoka ho tonga aminao araka izay irînao. Ary nanomboka tamin’io ora io dia sitrana ilay zanany vavy.

²⁹Niainga avy teo i Jesoa dia lasa nankany amoron’ny farihin’i Galilea, ary niakatra nankeo an-tendrombohitra ka nipetraka teo.

³⁰Ary nisy vahoaka betsaka nanatona Azy sady nitondra ny mandringa, ny jamba, ny kilemaina, ny moana, mbamin’ny maro hafa koa; napetraka teo an-tongotr’i Jesoa ireo marary ireo ka nositraniny.

³¹Gaga ny vahoaka raha nahita ny moana niteny, ny kilemaina nanjary tomady, ny mandringa nandeha tsara sy ny jamba nahiratra, ka dia nanome voninahitra an’ilay Andriamanitr’i Israely.

³²Dia nantsoin’i Jesoa ny mpianany hankeo aminy ka nilazany hoe: — Mahonena Ahy ireto vahoaka, satria efa telo andro izao no teto amiko, ka tsy manan-kohanina intsony; ary tsy tiako halefa mody tsy misakafo, fandrao reraka eny an-dalana.

³³Dia hoy ny mpianatra taminy: — Aiza no hahitantsika mofo hahavoky vahoaka be toy izao atỳ an-taniefitra atỳ?

³⁴Hoy kosa i Jesoa tamin’ny mpianany: — Misy mofo firy any aminareo? Dia novaliany hoe: — Fito, ary koa trondro madinika vitsivitsy!

³⁵Dia nasain’i Jesoa nipetraka tamin’ny tany ireto vahoaka.

³⁶Ary noraisin’i Jesoa ny mofo fito sy ny trondro; ka rehefa avy nisaotra an’Andriamanitra Izy, dia nanapaka ny mofo sy ny trondro ary nanome azy ny mpianatra; ny mpianatra kosa nandroso izany tamin’ny vahoaka.

³⁷Dia samy nihinana avokoa izy rehetra ka voky. Ary nangonina ny tapa-mofo aman-trondro ambiny ka nahafeno harona fito.

³⁸Nefa dia efatra arivo ny vatan-dehilahy nihinana teo, afa-tsy ny zaza amam-behivavy.

³⁹Dia nalefan’i Jesoa hody ny vahoaka. Avy eo niondrana an-tsambokely Izy ary lasa nankany amin’ny faritany atao hoe Magadàna[115].