Read Dikateny Iombonana Eto Madagasikara Matio 18 Bible Online

Matio 18 - Dikateny Iombonana Eto Madagasikara bible

Matio 18

¹Tamin’izay dia nanatona an’i Jesoa ny mpianatra ka nanontany Azy hoe; — Iza moa no lehibe indrindra ao amin’ny Fanjakan’ny lanitra?

²Dia niantso zazakely i Jesoa napetrany teo afovoan’izy rehetra

³ka hoy Izy: — Lazaiko marina aminareo fa raha tsy miova ianareo ka tonga tahaka ny zazakely, dia tsy hiditra mihitsy ao amin’ny Fanjakàn’ny lanitra.

⁴Koa izay hanetry tena tahaka ity zazakely ity no ho lehibe indrindra ao amin’ny Fanjakàn’ny lanitra.

⁵Ary na iza na iza handray zazakely anankiray tahaka ity amin’ny anarako dia Izaho no raisiny.

⁶— Na iza na iza mitarika ny anankiray amin’itony madinika mino Ahy itony hanao ratsy, dia aleo izy anantonana vatobe fikoseham-bary eo amin’ny vozony, ka halentika any anaty ranomasina mangitsokitsoka.

⁷Tataovan-doza izao tontolo izao satria betsaka ny toe-javatra mitarika amin’ny ratsy! Eny, tsy maintsy hisy ny toe-javatra mitarika amin’ny ratsy, kanefa mampalahelo izay olona hahatonga izany!

⁸Raha mitarika anao amin’ny ratsy ny tananao ila na ny tongotrao ila, dia tapaho ka ario lavitra anao; fa aleo ianao tokan-tanana na tokan-tongotra nefa tafiditra any amin’ny fiainana toy izay ary tanan-droa na tongotra roa nefa atsipy any amin’ny afo maharitra mandrakizay.

⁹Ary raha mitarika anao amin’ny ratsy ny masonao ila, dia esory ka ario lavitra anao; fa aleo ianao toka-maso nefa tafiditra any amin’ny fiainana toy izay ary maso roa nefa atsipy any amin’ny lohasahan’afo.

¹⁰— Tandremo fandrao ataonareo tsinontsinona na dia ny anankiray amin’itony madinika itony aza. Eny, lazaiko aminareo fa ny anjelin’izy ireny, any an-danitra, dia manatrika lalandava ny Raiko Izay any an-danitra.

¹¹[Satria ny hitady sy hamonjy ny very no nahatongavan’ny Zanak’olona[131].]

¹²Ahoana no hevitrareo? Raha misy olona manana ondry zato ka mania ny anankiray, moa tsy hamela ny 99 eo an-tampon-kavoana ve izy ary hiezaka hitady ilay nania?

¹³Ary raha tàhiny ilay nania ka hitan’ny tompony, dia lazaiko marina aminareo fa hifaliany bebe kokoa noho ny 99 tsy nania.

¹⁴Toy izany koa, tsy sitraky ny Rainareo[132] Izay any an-danitra hisy very na dia ny anankiray amin’itony madinika itony aza!

¹⁵— Raha diso taminao ny havana iray finoana, dia hatony; ary ianao sy izy mitokana iny no asehoy azy ny hadisoany. Raha mihaino anao izy, dia efa azonao ny havanao[133].

¹⁶Fa raha tsy mihaino anao izy, dia makà olona iray na roa hiaraka aminao mba «hitombenan’ny raharaha rehetra noho ny tenin’ny vavolombelona roa na telo[134]», araka ny voalazan’ny Soratra Masina.

¹⁷Fa raha tsy mihaino azy ireo izy, dia ambarao amin’ny iray Fiangonana; ary raha tsy mihaino ny iray Fiangonana koa izy, dia ataovy toy ny hafa firenena sy toy ny mpamory hetra.

¹⁸Lazaiko marina aminareo fa na inona na inona hofehezinareo etỳ an-tany dia ho voafehy koa any an-danitra; ary na inona na inona hovahanareo etỳ an-tany dia ho voavaha koa any an-danitra[135].

¹⁹— Lazaiko marina aminareo koa fa raha misy roa aminareo mifanaiky etỳ an-tany fa hangataka zavatra na inona na inona am-bavaka, dia ho azony avy amin’ny Raiko Izay any an-danitra izany.

²⁰Satria na aiza na aiza iangonan’olona roa na telo amin’ny anarako, dia eo afovoany Aho.

²¹Tamin’izay dia nanatona an’i Jesoa i Petera ka nanontany Azy hoe: — Tompo ô, impiry moa aho no tokony hamela ny havana iray finoana raha diso amiko izy? Hatramin’ny impito ve?

²²Dia hoy i Jesoa taminy: — Tsy hatramin’ny impito ihany no lazaiko aminao fa hatramin’ny impitopolo impito[136]!

²³Koa amin’izany, ny Fanjakàn’ny lanitra dia tahaka ny amin’ny mpanjaka anankiray izay te hampamoaka ireo mpanompony momba ny kaontim-bolany.

²⁴Raha vao natomboka ny fampamoahana, dia nentina teo anatrehan’ny mpanjaka ity mpanompo izay nananany trosa denàry enimpolo tapitrisa.

²⁵Ary noho izy tsy nanan-kaloa, dia nasain’ny tompony hamidy ho andevo ny tenan’ilay mpanompo mbamin’ny vady aman-janany ary hamidy koa ny fananany rehetra, mba handoavana ny trosa.

²⁶Dia niantoraka sy niankohoka teo anoloan’ny mpanjaka ilay mpanompo sady nanao hoe: «Mba omeo andro re aho fa haloako avokoa ny anao!»

²⁷Onena azy kosa ilay tompony ka namoy ny trosa taminy ary nandefa azy.

²⁸Vao tafavoaka anefa ilay mpanompo, dia tojo ity mpanompo namany izay nananany trosa denàry zato. Noraisin’ilay mpampitrosa teo am-bozona izy, ka nokendainy sady nataony hoe: «Aloavy izay trosako aminao.»

²⁹Dia niantoraka teo anoloan’ilay mpampitrosa izy sady nifona taminy nanao hoe: «Mba omeo andro re aho, fa haloako ny anao!»

³⁰Tsy nety anefa ilay mpampitrosa fa lasa nampanao azy am-ponja mandra-pandoany ny trosa.

³¹Nalahelo mafy ireo mpanompo namany nony nahita ny zava-nitranga, ka lasa nitantara izany rehetra izany tamin’ny tompony.

³²Dia nampanalain’ny tompony tamin’izay ilay mpanompo nananany trosa be ka noteneniny hoe: «Mpanompo ratsy fanahy ianao! Efa nafoiko avokoa ny trosako taminao, noho ianao nifona tamiko.

³³Ka moa tsy tokony mba hamindranao fo koa ve ilay mpanompo namanao tahaka ny namindrako fo taminao?»

³⁴Dia tezitra ny tompony ka nanolotra an’ilay mpanompo ratsy fanahy mba hatao am-ponja sy hampijalîna mandra-pandoany ny trosany manontolo.

³⁵Dia nofaranan’i Jesoa hoe: — Ho tahaka izany koa no hataon’ny Raiko Izay any an-danitra aminareo, raha tsy samy mamela ny havanareo amin’ny fonareo tokoa ianareo.