Read Dikateny Iombonana Eto Madagasikara Matio 20 Bible Online

Matio 20 - Dikateny Iombonana Eto Madagasikara bible

Matio 20

¹Fa ny Fanjakàn’ny lanitra dia tahaka ny amin’ity lehilahy anankiray tompona tanimboaloboka. Niainga vao maraina be ralehilahy hanakarama mpiasa ho any an-tanimboalobony.

²Ka rehefa nifanekeny denàry anankiray avy isan’andro ireo mpiasa, dia nirahiny hiasa any an-tanimboalobony.

³Niainga indray izy tamin’ny sivy maraina ka nahita mpiasa hafa nidonana-poana teo an-kianja

⁴ary niteny taminy hoe: «Ndeha koa ianareo miasa any an-tanimboaloboko fa homeko izay karama ara-drariny.» Dia nankany ireo.

⁵Niainga koa izy tamin’ny 12 antoandro sy tamin’ny telo tolakandro, ary dia nanao toy izany.

⁶Niainga farany izy tamin’ny dimy hariva ka mbola nahita mpiasa hafa nidonana-poana ary nanontany azy hoe: «Nahoana ianareo no midonana-poana eto mandritra ny andro tontolo?»

⁷Fa hoy ireo taminy: «Satria tsy nisy nanakarama anay!» Dia hoy ralehilahy taminy: «Ndeha koa ianareo miasa any amin’ny tanimboaloboko.»

⁸— Nony hariva ny andro, dia hoy ny tompon’ilay tanimboaloboka tamin’ny mpitandrim-pananany hoe: «Antsoy ny mpiasa ary aloavy ny karamany, ka aseseo avy amin’ireo nilatsaka farany ka hatramin’ireo nilatsaka voalohany.»

⁹Dia tonga ireo nilatsaka tamin’ny dimy hariva ka nandray denàry anankiray avy.

¹⁰Tonga kosa ireo nilatsaka voalohany ary nanampo handray bebe kokoa, kanjo denàry anankiray avy ihany koa no voarainy.

¹¹Teo am-pandraisana izany, dia nimonomonona tamin’ny tompon’ilay tanimboaloboka ireto mpiasa ireto

¹²nanao hoe: «Ireo nilatsaka farany ireo dia ora iray monja no niasany, kanefa nampitovînao karama aminay nisasatra nandritra ny andro sady niaritra ny hafanana.»

¹³Dia novalian’ilay tompon’ny tanimboaloboka ny anankiray tamin’ireo ka nilazany hoe: «Ry sakaiza, tsy manao zavatra tsy an-drariny aminao aho. Moa tsy denàry anankiray ve no nifanekenao tamiko?

¹⁴Raiso ny anao, dia mandehana; fa ilay nilatsaka farany dia tiako homena toraka ny anao koa.

¹⁵Tsy azoko anaovana izay tiako ve ny fananako? Sa mialona ianao satria mazava fo aho?»

¹⁶Dia nofaranan’i Jesoa hoe: — Dia toy izany, ny farany ho voalohany ary ny voalohany ho farany!

¹⁷Tamin’i Jesoa niakatra ho any Jerosalema dia nalainy nitokana ny mpianatra 12 lahy ka teny am-pandehanana no nilazany hoe:

¹⁸— Indro miakatra ho any Jerosalema isika. Ary ny Zanak’olona dia hatolotra an’ireo lohandoha-mpisorona sy mpahay lalàna ka hohelohiny ho faty;

¹⁹ry zareo kosa hanolotra Azy amin’ny hafa firenena mba hoesoiny sy hokapohiny ary hohomboany amin’ny hazofijaliana. Kanefa hitsangana velona Izy amin’ny andro fahatelo.

²⁰Tamin’izay dia nanatona an’i Jesoa ny vadin’i Zebedeo mbamin’ireo zanany lahy. Sady niankohoka nanoloana Azy ravehivavy no nangata-javatra taminy.

²¹Ka hoy i Jesoa tamin-dravehivavy: — Inona no irînao? Dia novaliany hoe: — Omeo teny ireto zanako roa lahy ireto fa hipetraka eo ankavananao ny anankiray ary eo ankavianao ny anankiray, rehefa tonga mpanjaka Ianao.

²²Fa hoy i Jesoa: — Tsy fantatrareo mirahalahy izay angatahinareo; vitanareo ve ny hiaritra fijaliana tahaka ny hiaretako? Dia novalian’izy mirahalahy hoe: — Vitanay!

²³Ary hoy i Jesoa tamin’izy roa lahy: — Ny fijaliana hiaretako, dia hiaretanareo tokoa[147]; fa izany hoe hipetraka eo ankavanako sy eo ankaviako izany kosa dia tsy miankina amiko, fa ho an’izay nanomanan’ny Raiko azy!

²⁴Nony nandre izany izy folo lahy, dia tezitra tamin’i Jakôba sy i Jôhany.

²⁵Fa nantsoin’i Jesoa izy rehetra ka nilazany hoe: — Fantatrareo fa, eo amin’ny hafa firenena, ny filoha dia manjakazaka; ary ny lehibe dia manampatra fahefana.

²⁶Tsy mba toy izany kosa eo aminareo; fa na iza na iza te ho lehibe eo aminareo dia ho mpanomponareo;

²⁷ary na iza na iza te ho voalohany eo aminareo dia ho mpiasanareo.

²⁸Dia tahaka ny Zanak’olona izany: tsy hotompoina manko no nahatongavany fa hanompo ary hanolotra ny ainy ho fanavotana ny besinimaro[148]!

²⁹Nony niala tao Jerikao i Jesoa mbamin’ny mpianany, dia nisy vahoaka betsaka nanaraka an’i Jesoa.

³⁰Ary indreo nisy jamba roa lahy nipetraka teo amoron-dalana. Reny fa hoe i Jesoa no nandalo, ka niantsoantso mafy izy roa lahy nanao hoe: — Ry Tompo, Zanak’i Davida ô, mamindrà fo aminay!

³¹Norahonan’ny vahoaka izy roa lahy hangina, kanefa vao mainka koa niantsoantso mafy hoe: — Ry Tompo, Zanak’i Davida ô, mamindrà fo aminay!

³²Dia nijanona i Jesoa sady niantso azy roa lahy ka nanao hoe: — Inona no tianareo hataoko aminareo?

³³Ary hoy ireo taminy: — Tompo ô, ny mba hampahiratra ny masonay!

³⁴Onena i Jesoa ary nikasika ny mason’ireto jamba. Dia nahiratra niaraka tamin’izay izy roa lahy, ka lasa nanaraka an’i Jesoa.