Read Dikateny Iombonana Eto Madagasikara Matio 24 Bible Online

Matio 24 - Dikateny Iombonana Eto Madagasikara bible

Matio 24

¹Dia niala teo an-kianjan’ny tempoly i Jesoa ka lasa nandeha; fa nanatona Azy kosa ny mpianany hampizaha Azy ny rafitry ny tempoly.

²Ary niteny i Jesoa nanao tamin’ny mpianany hoe: — Hitanareo moa ireo rehetra ireo? Lazaiko marina aminareo fa tsy havela hisy vato mifanongoa eo ka tsy harodana!

³Ary nipetraka teo an-tendrombohitra Analanôliva i Jesoa; dia nanatona Azy manokana ireo mpianany ka nanao hoe: — Lazao aminay izay fotoana hahatongavan’izany ary izay hamantarana ny fiavianao sy ny fiafaran’izao tontolo izao.

⁴Fa novalian’i Jesoa hoe: — Tandremo fandrao hisy hamitaka anareo.

⁵Fa maro no ho avy hisandoka ny anarako ary hiteny hoe: «Izaho no ilay Mesia»; ary maro ny olona ho voafitany.

⁶Handre ady sy filazana ady ianareo, koa fadio izay hatahotra; eny, tsy maintsy ho tonga izany, kanefa tsy mbola izany no farany.

⁷Fa hisy firenena hitsangana hamely firenena, hisy koa fanjakana hitsangana hamely fanjakana; ary hisy mosary sy horohorontany amin’ny toerana samihafa.

⁸Izany rehetra izany no toy ny santatry ny fanaintainam-piterahana.

⁹Amin’izany andro izany, dia hatolotry ny olona ianareo hampijalîna sy hovonoina; ary ho halan’ny firenen-drehetra ianareo, satria miandany amiko.

¹⁰Amin’izany andro izany koa, dia maro ny olona ho voatarika amin’ny ratsy ka hifampiampanga sy hifankahala.

¹¹Betsaka ireo mpisandoka ho mpaminany no hijoro, ka hamitaka olona maro.

¹²Ary dia hihanaka tokoa ny ratsy ka hihamangatsiaka ny fitiavana an’Andriamanitra ao am-pon’ny maro;

¹³Kanefa izay maharitra hatramin’ny farany no ho voavonjy.

¹⁴Ary dia hatao antso avo eran’izao tontolo izao ity Vaovao Mahafaly momba ny Fanjakàn’Andriamanitra ity, mba ho vavolombelona amin’ny firenen-drehetra; izay vao ho tonga ny farany.

¹⁵— Ho hitanareo tafajoro ao amin’ny Toeramasina ilay fanimbazimbana mahatsiravina, voalazan’i Daniela mpaminanin’Andriamanitra[174]. (Aoka hahazo tsara izay mamaky!)

¹⁶Koa amin’izany, izay any Jodea aoka handositra any an-tendrombohitra;

¹⁷izay any an-tampon-trano aoka tsy hidina haka izay zavatra ao an-tranony;

¹⁸izay any an-tsaha, aoka tsy hiverina haka ny lambany.

¹⁹Loza no hanjo ny bevohòka sy ny mitaiza kely amin’ireo andro ireo!

²⁰Mivavaha mba tsy ho amin’ny ririnina na ho amin’ny sabata no handosiranareo.

²¹Amin’izany mantsy, dia hisy fijaliana lehibe izay tsy mbola nisy toa azy hatramin’ny niandohan’izao tontolo izao ka mandraka ankehitriny, sady tsy hisy toa azy intsony koa[175].

²²Raha tsy efa nanapa-kevitra hanafohy ireo andro ireo Andriamanitra, dia tsy hisy olona ho voavonjy; fa noho ny olom-boafidiny, dia hohafohezin’Andriamanitra ireo andro ireo.

²³Amin’izany, raha misy olona milaza aminareo hoe: «Indro atỳ ny Mesia», na hoe: «Arỳ Izy», dia aza mino.

²⁴Olona misandoka ho Mesia sy ho mpaminany manko no hijoro, ka haneho famantarana lehibe sy zava-mahagaga hamitahany na dia ny olom-boafidin’Andriamanitra aza raha azony natao.

²⁵Izay àry, fa efa voalazako mialoha taminareo izany.

²⁶Koa raha misy olona milaza aminareo hoe: «Indro any an-taniefitra ny Mesia», dia aza mankany; na hoe: «Indro ato amin’ny toera-miafina ato Izy», dia aza mino.

²⁷Eny, ho tahaka ny tselatra, mipoitra avy any atsinanana ka manazava hatrany andrefana, no fiavian’ny Zanak’olona.

²⁸Fa na aiza na aiza misy ny faty dia any no hifamotoanan’ny voromahery.

²⁹Raha vao afaka ny fijaliana amin’ireo andro ireo, dia hihamaizina ny masoandro, tsy handefa taratra intsony ny volana, hiraraka avy eny amin’ny habakabaka ny kintana ary ho voahozongozona ny herin’ny habakabaka[176].

³⁰Amin’izay dia hiseho eny amin’ny habakabaka ny famantarana momba ny Zanak’olona; ka handon-tratra avokoa ny firenena rehetra eto an-tany ary hahita ny Zanak’olona tamy eo amin’ny rahon’ny habakabaka sady ombàn-kery sy voninahitra lehibe[177].

³¹Dia hisy trompetra haneno mafy; ary hirahin’ny Zanak’olona ireo anjeliny, ka ireo no hanangona ny olom-boafidiny avy any amin’ny vazan-tany efatra, manomboka amin’ny faravodilanitra ankilany ka miafara amin’ny faravodilanitra andaniny[178].

³²— Raiso ho anatra ity fanoharana avy amin’ny aviavy ity: Raha vao manaroka ny rantsany ka mandravina, dia fantatrareo fa efa akaiky ny fahavaratra.

³³Toy izany koa, raha vao hitanareo izany rehetra izany, dia fantaro fa efa akaiky ny Zanak’olona ary mby eo am-baravarana[179].

³⁴Lazaiko marina aminareo fa mbola tsy ho tapitra akory ity taranaka ity, dia ho tonga izany rehetra izany.

³⁵Ho levona ny tany amana habakabaka, fa ny teniko tsy mba ho levona.

³⁶— Ny amin’izay andro sy ora hahatongavan’izany dia tsy misy mahalala na ny anjely any an-danitra na ny Zanaka[180], fa izy Ray irery ihany.

³⁷Eny, tahaka ny tamin’ny andron’i Noà, dia ho tahaka izany koa ny fiavian’ny Zanak’olona.

³⁸Fa tamin’ireo andro nialoha ny safodrano dia nihinana sy nisotro ary nampaka-bady na nampakarina ny olona, mandra-pigadon’ny andro nidiran’i Noà tao amin’ny sambofiara[181],

³⁹ary tsy nanampo na inona na inona ny olona mandra-pahatongan’ny safodrano izay nandringana azy rehetra[182]. Dia ho tahaka izany koa ny fiavian’ny Zanak’olona.

⁴⁰Amin’izany, hisy roa lahy tafaraka eny an-tsaha; ka ny iray halaina, ny iray havela;

⁴¹hisy roa vavy miara-mikoso-bary: ka ny iray halaina, ny iray havela.

⁴²Koa miambena àry, fa tsy fantatrareo izay andro hiavian’ny Tomponareo.

⁴³Izao no ataovy ao an-tsaina: raha fantatry ny tompon-trano ny vanim-potoana hiavian’ny mpangalatra amin’ny alina, dia ho niambina izy ary tsy ho namela ny tranony hotamîna.

⁴⁴Noho izany, aoka ho vonona hatrany koa ianareo, fa ho avy amin’ny ora tsy ampoizinareo ny Zanak’olona.

⁴⁵— Iza moa no mpanompo mahatoky sy mato-tsaina notendren’ny tompony ho mpandraharaha hifehy ireo mpanompony sady hanome azy ny anjara sakafony ara-potoana?

⁴⁶Sambatra io mpanompo io raha tonga ny tompony ka mahita azy manao raharaha toy izany.

⁴⁷Lazaiko marina aminareo fa hotendren’ny tompony hiadidy ny fananany rehetra izy.

⁴⁸Raha ho ratsy fanahy kosa io mpanompo io ka hanao anakampo hoe: «Mbola haharitra ela ny tompoko»,

⁴⁹ary hihetraketraka amin’ireo mpanompo namany sady hanaram-po hihinana sy hisotro miaraka amin’ny mpimamo,

⁵⁰dia ho tonga ilay tompony amin’ny andro tsy ampoiziny sy amin’ny ora tsy fantany.

⁵¹Hosazîny mafy tokoa io mpanompo io[183] ary hataony miombona anjara amin’ny mpihatsaravelatsihy; any izy no hitomany sy hikitro-nify.