Read Dikateny Iombonana Eto Madagasikara Matio 25 Bible Online

Matio 25 - Dikateny Iombonana Eto Madagasikara bible

Matio 25

¹Amin’izay ny Fanjakàn’ny lanitra dia ho tahaka ny amin’ny tovovavy folo izay nitondra ny fanàlany ka lasa hitsena ny mpampakatra.

²Ny dimy tamin’ireo tovovavy ireo dia adala; fa ny dimy kosa hendry.

³Ireo adala dia nitondra ny fanalany, kanefa tsy nitondra solika;

⁴fa ireo hendry kosa nitondra ny fanalany sady nitondra solika tamin’ny tavoahangin-tsolika.

⁵Andrasana ela ny fiavian’ny mpampakatra, ka dia samy rendremana avokoa izy folo vavy ary natory.

⁶Nony mamatonalina, dia nisy niantso mafy hoe: «Intỳ tamy ny mpampakatra! Mandehana ianareo mitsena azy!»

⁷Tamin’izay dia samy niarina avokoa ireo tovovavy ary samy namboatra ny fanalany.

⁸Ka hoy ireo adala tamin’ny hendry: «Mba omeo kely amin’ny solikareo izahay, fa efa ho faty ny fanalanay.»

⁹Dia novalian’ny hendry hoe: «Sao tsy ampy ho anay sy ho anareo; fa aleo mankany amin’ny mpivarotra ianareo mividy ho anareo.»

¹⁰Raha mbola nandeha nividy solika ireo adala, dia tonga ny mpampakatra; ka ireo tovovavy dimy efa vonona no niara-niditra tamin’ny mpampakatra tao amin’ny fanasambe fampakaram-bady ary nohidiana ny varavarana.

¹¹Taorian’izany, dia tonga ireo tovovavy sasany ka nanao hoe: «Tompoko, tompoko, vohay izahay!»

¹²Fa novalian’ny mpampakatra hoe: «Lazaiko marina aminareo fa tsy fantatro ianareo.»

¹³Dia nofaranan’i Jesoa hoe: — Miambena àry ianareo fa tsy fantatrareo na ny andro na ny ora.

¹⁴Ny Fanjakàn’ny lanitra dia tahaka ny amin’ny lehilahy handeha any an-tany hafa, ka niantso ny mpanompony ary nametraka ny fananany taminy.

¹⁵Koa ny anankiray dia nomeny denàry 30 000, ny anankiray denàry 12 000 ary ny anankiray denàry 6 000, samy araka izay fahaizany avy[184]. Dia lasa ralehilahy tompom-pananana nandeha any an-tany hafa.

¹⁶Avy hatrany ilay nandray denàry 30 000 dia nampiasa izany ka nahazo tombony denàry 30 000.

¹⁷Toy izany koa no nataon’ilay nandray ny denàry 12 000 ka nahazo tombony denàry 12 000.

¹⁸Fa ilay nandray denàry 6 000 kosa dia lasa nihady tany ka nandevina ny volan’ny tompony.

¹⁹Nony ela, dia niverina ny tompon’ireo mpanompo ireo ka nampamoaka azy telo lahy ny amin’ny petra-bolany.

²⁰Dia nanatona ilay nandray denàry 30 000 ka nanolotra denàry 30 000 hafa koa sady nilaza hoe: «Denàry 30 000, tompoko, no napetrakao tamiko; indro fa nahazo denàry 30 000 hafa tombony aho.»

²¹Dia hoy ny tompony taminy: «Mahafinaritra izany, ry mpanompo tsara sy mahatoky! Nahatoky tamin’ny zava-madinika ianao ka dia tendreko hiandraikitra zava-dehibe; avia hiombon-kafaliana amiko tomponao!»

²²Dia nanatona koa ilay nandray denàry 12 000 ary nilaza hoe: «Denàry 12 000, tompoko, no napetrakao tamiko; indro fa nahazo denàry 12 000 hafa tombony aho.»

²³Dia hoy ny tompony taminy: «Mahafinaritra izany, ry mpanompo tsara sy mahatoky! Nahatoky tamin’ny zava-madinika ianao, ka dia tendreko hiandraikitra zava-dehibe; avia hiombon-kafaliana amiko tomponao!»

²⁴Dia nanatona kosa ilay nandray denàry 6 000 ary nilaza hoe: «Fantatro, tompoko, fa lehilahy mila voatsiary ianao, ka mijinja amin’izay tsy namafazanao ary manangona amin’izay tsy nanelezanao.

²⁵Dia natahotra aho ka lasa nandevina ny volanao tao anaty tany; koa indro fa averiko aminao ny fanananao.»

²⁶Dia hoy ny tompony taminy: «Mpanompo ratsy sady kamo raha ianao! Fantatrao fa mijinja amin’izay tsy namafazako aho ary manangona amin’izay tsy nanelezako.

²⁷Noho izany, tokony ho napetrakao tany amin’ny banky ny volako ary ho noraisiko mbamin’ny zana-bola ny fananako rehefa tafaverina aho.

²⁸Koa alao ny denàry 6 000 eny aminy, dia omeo an’ilay manana denàry 60 000.

²⁹Eny, izay rehetra manana no homena hatrany ary hanam-be; fa izay tsy manana kosa, na izay kely ananany aza dia halàna aminy.

³⁰Ary io mpanompo tsy misy ilana azy io, roahy any amin’ny haizina any ivelany; ka any izy no hitomany sy hikitro-nify.»

³¹— Rehefa ho avy amin’ny voninahitra maha mpanjaka Azy ny Zanak’olona sady hotronin’ny anjely rehetra, dia hipetraka eo amin’ny sezafiandrianany mamirapiratra.

³²Ary hangonina eo anatrehan’ny Zanak’olona ny firenena rehetra. Dia hanavaka ny olona ho roa tonta ny Zanak’olona, tahaka ny mpiandry manavaka ny ondry amin’ny osy;

³³ka ny ondry no hataon’ny Zanak’olona eo ankavanany fa ny osy hataony eo ankaviany.

³⁴Ary dia izao no holazain’ny Mpanjaka amin’izay eo ankavanany: «Avia ianareo nombàn’ny Raiko fitahiana; raiso ho lova ny Fanjakana izay voavoatra ho anareo hatrizay nahariana an’izao tontolo izao.

³⁵Fa noana Aho, dia nomenareo hanina; nangetaheta Aho, dia nomenareo hosotroina; nivahiny Aho, dia nampiantranoinareo;

³⁶tsy nitafy Aho, dia notafînareo; narary Aho, dia nokarakarainareo; tany am-ponja Aho, dia novangianareo.»

³⁷Ary dia hanontany Azy ny olo-marina ka hanao hoe: «Tompo ô, oviana Ianao no hitanay noana ka nomenay hanina; na nangetaheta ka nampisotroinay?

³⁸Oviana Ianao no hitanay nivahiny ka nampiantranoinay, na tsy nitafy ka notafînay?

³⁹Oviana Ianao no hitanay narary na tany am-ponja ka novangianay?»

⁴⁰Dia hovalian’ny Mpanjaka hoe: «Lazaiko marina aminareo fa araka izay nataonareo tamin’ny anankiray amin’ireto havako madinika indrindra ireto no nataonareo tamiko.»

⁴¹Ary dia izao kosa no holazain’ny Mpanjaka amin’izay eo ankaviany: «Mialà amiko ianareo voaozona, mandehana any amin’ny afo maharitra mandrakizay izay voavoatra ho an’ny devoly sy ny anjeliny.

⁴²Fa noana Aho, dia tsy nomenareo hanina; nangetaheta Aho, dia tsy nomenareo hosotroina;

⁴³Nivahiny Aho, dia tsy nampiantranoinareo; tsy nitafy Aho, dia tsy notafînareo; narary sy tany am-ponja Aho, dia tsy nokarakarainareo.»

⁴⁴Ary dia hanontany Azy kosa ireo ka hanao hoe: «Tompo ô, oviana Ianao no hitanay noana na nangetaheta, na nivahiny, na tsy nitafy, na narary, na tany am-ponja ka tsy nampianay?»

⁴⁵Dia hovalian’ny Mpanjaka hoe: «Lazaiko marina aminareo fa araka izay tsy nataonareo tamin’ny anankiray amin’ireto havako madinika indrindra ireto no tsy nataonareo tamiko.»

⁴⁶Dia hiroso ho any amin’ny fijaliana maharitra mandrakizay ireo fa ny olo-marina kosa ho any amin’ny fiaina-maharitra mandrakizay[185].