Read Dikateny Iombonana Eto Madagasikara Matio 4 Bible Online

Matio 4 - Dikateny Iombonana Eto Madagasikara bible

Matio 4

¹Ary dia notarihin’ny Fanahin’Andriamanitra hankany an-taniefitra i Jesoa, mba halain’ny devoly fanahy.

²Rehefa avy nifady hanina efapolo andro sy efapolo alina i Jesoa, dia noana;

³ary nohatonin’ny mpaka fanahy Izy ka nataony hoe: — Raha Zanak’Andriamanitra tokoa Ianao[19], teneno ireo vato ireo hanjary mofo.

⁴Fa novalian’i Jesoa hoe: — Izao no voalazan’ny Soratra Masina: «Tsy ny mofo ihany no hiveloman’ny olona, fa ny teny rehetra aloaky ny vavan’Andriamanitra[20].»

⁵Avy eo dia nentin’ny devoly ho any Jerosalema tanàna masina i Jesoa, ka najorony teo an-tendron’ny zoron’ny tempoly

⁶sady nataony hoe: — Raha Zanak’Andriamanitra tokoa Ianao, mianjerà any ambany any, fa izao no voalazan’ny Soratra Masina: «Homen’ny Tompo baiko ireo anjeliny noho ny aminao, ka ny anjely hitondra Anao eny an-tanany mba tsy ho tafintohim-bato ny tongotrao[21].»

⁷Fa hoy i Jesoa taminy: — Izao koa no voalazan’ny Soratra Masina: «Aza maka fanahy ny Tompo Andriamanitrao[22].»

⁸Ary nentin’ny devoly ho any amin’ny tendrombohitra avo dia avo indray i Jesoa, ka nasehony Azy ny fanjakana rehetra eo amin’izao tontolo izao mbamin’ny voninahiny

⁹sady nataony hoe: — Homeko Anao avokoa ireo, raha miankohoka eto anoloako Ianao ho fanajana ahy!

¹⁰Tamin’izay dia hoy i Jesoa taminy: — Mialà, ry Satàna, satria izao no voalazan’ny Soratra Masina: «Ny Tompo Andriamanitrao no hiankohofanao, ary Izy irery no hivavahanao[23]!»

¹¹Izay vao nandao Azy ny devoly, ary indreo nisy anjely tonga teo amin’i Jesoa ka nanompo Azy.

¹²Nony ren’i Jesoa fa naiditra am-ponja i Jôhany[24], dia lasa nankany Galilea Izy.

¹³Ary nilaozany i Nazareta ka lasa Izy niorim-ponenana tao Kafarnahòma, tanàna amoron’ny farihin’i Galilea, anatin’ny faritanin’i Zebolòna sy i Naftalỳ[25].

¹⁴Ka tanteraka ilay voalazan’ny Tompo tamin’ny alalan’i Isaià mpaminany hoe:

¹⁵«Ry tanin’i Zebolòna sy i Naftalỳ, ry lalana amoron’ny farihy, ry faritra ampitan’i Jôrdàna, ry Galilea onenan’ny hafa firenena,

¹⁶ny vahoaka izay mihitsoka amin’ny maizina dia nahita hazavana lehibe, ary ny olona izay mihitsoka amin’ny toerana alofan’ny fahafatesana dia niposahan’ny hazavana[26].»

¹⁷Hatramin’izay i Jesoa dia nanomboka nitoriteny ka nanao hoe: — Ialao ny toe-dratsy[27], fa efa akaiky ny Fanjakàn’ny lanitra.

¹⁸Nitsangantsangana teny amoron’ny farihin’i Galilea i Jesoa ka nahita olona mirahalahy, dia i Simôna ilay atao hoe Petera sy i Andrea rahalahiny; nanipy harato tao anaty farihy izy roa lahy fa mpanarato no raharahany.

¹⁹Dia hoy i Jesoa taminy: — Andao hiaraka amiko fa hataoko mpanarato olona ianareo!

²⁰Dia nilaozany avy hatrany ny haratony ka lasa izy roa lahy niaraka tamin’i Jesoa.

²¹Ary nandroso ihany i Jesoa ka nahita olona mirahalahy hafa koa, dia i Jakôba sy i Jôhany zanak’i Zebedeo; tafaraka tamin’i Zebedeo rainy teo an-tsambokely izy roa lahy ary nanamboatra harato.

²²Nantsoin’i Jesoa izy mirahalahy; ary nilaozany avy hatrany ny sambokely sy ny rainy fa lasa izy roa lahy niaraka tamin’i Jesoa.

²³Ary nitety an’i Galilea manontolo i Jesoa, ka nampianatra tany amin’ny sinagôgan-dry zareo ary nanao antso avo ny Vaovao Mahafaly momba ny Fanjakàn’ny lanitra sady nanasitrana ny aretina mbamin’ny rofy rehetra teo amin’ny vahoaka.

²⁴Ary niely eran’i Siria manontolo ny lazany, ka nentin’ny olona teo aminy avokoa izay mety ho marary ianjadian’ny aretina sy fanaintainana isan-karazany, dia ny azon’ny demony sy ny mararin’ny androbe[28] ary ny malemy ka nositraniny avokoa.

²⁵Vahoaka marobe no nanaraka Azy avy any Galilea sy Dekapôly, avy tany Jerosalema sy Jodea ary avy any andafin’i Jôrdàna.