Read Dikateny Iombonana Eto Madagasikara Matio 5 Bible Online

Matio 5 - Dikateny Iombonana Eto Madagasikara bible

Matio 5

¹Nony nahita ny vahoaka i Jesoa, dia niakatra teo an-tendrombohitra; ary rehefa tafapetraka Izy, dia nohatonin’ny mpianany.

²Dia niteny i Jesoa ka nampianatra azy rehetra hoe:

³— Sambatra izay miaiky ao am-po ho mahantra, fa azy ny Fanjakàn’ny lanitra!

⁴Sambatra izay mitomany, fa izy no hampiononin’Andriamanitra!

⁵Sambatra izay malemy fanahy, fa izy no handova ny tany nampanantenain’Andriamanitra!

⁶Sambatra izay maniry mafy hanao ny marina nosoritan’Andriamanitra, fa izy no homen’Andriamanitra fahafaham-po!

⁷Sambatra izay mamindra fo, fa izy no hamindran’Andriamanitra fo!

⁸Sambatra izay mahitsy fo, fa izy no hahita an’Andriamanitra!

⁹Sambatra izay mpampihavana, fa izy no hantsoin’Andriamanitra hoe zanany!

¹⁰Sambatra izay enjehina noho izy manao ny marina nosoritan’Andriamanitra, fa azy ny Fanjakàn’ny lanitra!

¹¹Sambatra ianareo raha tevatevain’ny olona sy enjehiny ary ampangaina lainga amin’ny ratsy isan-karazany noho ny maha mpianatro anareo.

¹²Mifalia sy miravoravoa ianareo fa lehibe ny valisoa miandry anareo any an-danitra, satria toy izany no nanenjehany ireo mpaminanin’Andriamanitra talohanareo[29]!

¹³— Ianareo no sira hanasoa ny tany; fa raha ny sira no tonga matsatso, hatao ahoana indray no fanome hasina azy? Tsy misy antony intsony izy fa dia ariam-potsiny any ivelany hohitsakitsahin’ny olona.

¹⁴Ianareo no fahazavana ho an’izao tontolo izao; tsy azo afenina ny tanàna miorina eo an-tampon-tendrombohitra.

¹⁵Ary tsy misy mampirehitra jiro ka hametraka azy ao ambany vata famarana; fa eo ambony fitoeran-jiro no apetrany mba hanazava izay rehetra ao an-trano[30].

¹⁶Aoka hamiratra eo imason’ny olona toy izany koa ny fahazavanareo, mba hahitany ny asa soa ataonareo ka hanomezany voninahitra ny Rainareo Izay any an-danitra.

¹⁷— Aza heverinareo fa hanafoana ny lalànan’i Mosesy mbamin’ny fampianaran’ny mpaminany no nahatongavako. Tsy hanafoana no nahatongavako fa handavorary.

¹⁸Eny, lazaiko marina aminareo fa mandra-pahalevon’ny tany amana habakabaka dia tsy hisy ho foana akory amin’ny lalàna, na dia ny zavatra antsipiriany sy zavatra faran’izay madinika indrindra aza, fa ho tanteraka avokoa[31].

¹⁹Koa na iza na iza handika ny anankiray amin’ny didy madinika indrindra sy hampianatra ny olona hanao toy izany, dia ho kely indrindra ao amin’ny Fanjakàn’ny lanitra; fa na iza na iza hanatanteraka ny didy sy hampianatra ny olona hanao toy izany, dia izy no ho lehibe ao amin’ny Fanjakàn’ny lanitra!

²⁰Eny, lazaiko aminareo fa raha toa tsy tsara kokoa noho ny an’ny mpahay lalàna sy ny Farisianina no anaovanareo ny marina voasoritr’Andriamanitra, dia tsy hiditra any amin’ny Fanjakàn’ny lanitra ianareo.

²¹— Efa renareo fa voalaza tamin’ny ntaolo hoe: «Aza mamono olona[32]»; ary izay mamono olona dia mendrika hatolotra ny fitsarana!

²²Izaho koa milaza aminareo hoe: izay rehetra tezitra amin’ny namana iray finoana dia mendrika hatolotra ny fitsarana isan-tanàna; izay hanao ny namana iray finoana hoe: misy kely, dia mendrika hatolotra ny Fitsarana ambony; izay hanao azy hoe: foka, dia mendrika havarina any amin’ny lohasahan’afo.

²³Koa raha manolotra ny fanatitrao amin’Andriamanitra eo amin’ny alitara ianao ary eo no mahatsiaro fa manana alahelo aminao ny namanao iray finoana,

²⁴dia avelao eo anoloan’ny alitara ny fanatitrao, ka mandehana aloha mihavana amin’ilay namanao; izay vao miverina manolotra ny fanatitrao.

²⁵Mihavàna faingana amin’izay manana ady aminao dieny samy mbola eny an-dalana ho any amin’ny fitsarana ianareo; fandrao ilay manana ady aminao hanolotra anao amin’ny mpitsara; ny mpitsara kosa hanolotra anao amin’ny miaramila, ka hatao am-ponja ianao.

²⁶Lazaiko marina aminao fa tsy ho afaka ao mihitsy ianao ambara-panèfanao ny iraimbilanja farany.

²⁷— Efa renareo fa voalaza hoe: «Aza maka vadin’olona[33]!»

²⁸Izaho kosa milaza aminareo hoe: izay lehilahy mijery vehivavy vadin’olona ka mitsiriritra azy dia efa naka azy sahady tao am-pony.

²⁹Koa raha mitarika anao amin’ny ratsy ny masonao ankavanana, dia esory ka ario lavitra anao; fa aleonao zavatra anankiray monja anisan’ny tenanao no very toy izay ny tenanao manontolo no arian’Andriamanitra any amin’ny lohasahan’afo.

³⁰Ary raha mitarika anao amin’ny ratsy ny tananao ankavanana, dia tapaho ka ario lavitra anao; fa aleonao zavatra anankiray monja anisan’ny tenanao no very toy izay ny tenanao manontolo no halefa any amin’ny lohasahan’afo.

³¹— Efa voalaza koa hoe: «Izay lehilahy manary ny vadiny dia aoka hanome taratasy fisarahana[34]!»

³²Izaho kosa milaza aminareo hoe: izay lehilahy manary ny vadiny, afa-tsy noho ny fifandraisana mamoafady[35], dia mandrisika azy hanitsakitsa-bady; ary izay lehilahy hampakatra vehivavy nariana dia maka vadin’olona.

³³— Efa renareo koa fa voalaza tamin’ny ntaolo hoe: «Aza mivadika amin’ny teny napetrakao tamin’ny Tompo fa tanteraho ny teny napetrakao[36]!»

³⁴Izaho kosa milaza aminareo hoe: aza mianiana mihitsy! Aza mianiana: na amin’ny lanitra, satria sezafiandrianan’Andriamanitra izany;

³⁵na amin’ny tany, satria fitoeran-tongotr’Andriamanitra izany; na amin’i Jerosalema, satria tanànan’ny mpanjaka lehibe izany;

³⁶na amin’ny lohanao, satria tsy hainao ny mahafotsy na mahamainty singam-bolo iray akory.

³⁷Fa aoka ny teninareo, rehefa eny, dia ho eny; rehefa tsia, dia ho tsia; ny ankoatra izany kosa dia avy amin’*ilay Ratsy.

³⁸— Efa renareo fa voalaza hoe: «Maso efai-maso, nify efai-nify[37]!»

³⁹Izaho kosa milaza aminareo hoe: aza mamaly ratsy izay manisy ratsy anao; fa raha misy mamely tehamaina ny takolakao ankavanana, atolory azy koa ny ilany!

⁴⁰Raha misy mila ady aminao any amin’ny fitsarana mba hahazoany ny akanjonao, avelao ho azy koa ny lambanao.

⁴¹Raha misy manery anao hitondra entana mandritra ny lalana iray kilaometatra[38], miaraha aminy mandritra ny lalana roa kilaometatra.

⁴²Omeo izay mangataka aminao ary aza andosirana izay te hisambotra aminao.

⁴³— Efa renareo fa voalaza hoe: «Tiavo ny namanao[39]» ary ankahalao ny fahavalonao!

⁴⁴Izaho kosa milaza aminareo hoe: tiavo ny fahavalonareo ary mivavaha ho an’izay manenjika anareo,

⁴⁵mba ho tonga zanaky ny Rainareo Izay any an-danitra ianareo; fa Izy mampiposaka ny masoandrony amin’ny ratsy fanahy sy ny tsara fanahy ary mandatsaka ny ranonorana amin’ny marina sy ny tsy marina.

⁴⁶Fa raha izay manam-pitiavana anareo ihany no tiavinareo, inona no valisoa[40] manokana azonareo andrandraina avy amin’Andriamanitra? Na dia ny mpamory hetra aza ve tsy manao toraka izany koa?

⁴⁷Ary raha ny namana iray finoana ihany no arahabainareo, inona no tombony amin’ny ataonareo? Na dia ny hafa firenena aza ve tsy manao toraka izany koa?

⁴⁸Tanteraka ny Rainareo Izay any an-danitra: noho izany àry, aoka ianareo ho tanteraka tahaka Azy koa[41].