Read Dikateny Iombonana Eto Madagasikara Marka 11 Bible Online

Marka 11 - Dikateny Iombonana Eto Madagasikara bible

Marka 11

¹Ary nanakaiky an’i Jerosalema i Jesoa mbamin’ny mpianany sy ny vahoaka tafaraka taminy, ka mby tao amin’ny faritr’i Betifage sy i Betania, teo akaikin’ny tendrombohitra atao hoe Analanôliva[73]. Dia naniraka roa lahy tamin’ny mpianany i Jesoa

²ka nanao taminy hoe: — Mankanesa amin’itsy tanàna manoloana anareo itsy. Raha vao tafiditra ao ianareo, dia hahita zana-boriky mifatotra mbola tsy nitaingenan’olona; vahao izy dia ento atỳ.

³Ary raha misy olona manontany anareo hoe: «Ahoana no anaovanareo izao?», dia valio hoe: «Misy ilàn’ny Tompo azy, fa vetivety foana dia haveriny eto[74].»

⁴Dia lasa izy roa lahy ka nahita zana-boriky mifatotra eo alatrano akaiky varavarana teo amoron-dalana, dia novahany.

⁵Fa ny sasany tamin’ny olona nijoro teo nanontany azy roa lahy hoe: — Hataonareo inona no vahanareo ity zana-boriky?

⁶Dia novaliany araka ny nanafaran’i Jesoa azy, ka navelan’ny olona.

⁷Nentin’izy roa lahy nankeo amin’i Jesoa ilay zana-boriky, ka nametrahan’ny mpianatra rehetra ny lambany teo amboniny ary dia nitaingenan’i Jesoa[75].

⁸Maro ny olona namelatra ny lambany teny amin’ny lalana; ny an’ny sasany kosa rantsan-kazo tinapaka teny an-tsaha[76].

⁹Ary ireo olona nialoha an’i Jesoa na ireo nanaraka Azy dia samy niantsoantso hoe: — Dera anie ho an’Andriamanitra! Hombam-pitahiana amin’ny anaran’ny Tompo anie Ilay avy!

¹⁰Hombam-pitahiana anie ity Fanjakana tonga, dia ny Fanjakan’i Davida raintsika! Dera anie ho an’Andriamanitra any amin’ny avo indrindra[77]!

¹¹Dia niditra tao Jerosalema i Jesoa ka namantana tao an-kianjan’ny tempoly; ary nony avy nijerijery ny zavatra rehetra Izy, sady efa hariva ny andro, dia lasa nankany Betania niaraka tamin’ny 12 lahy.

¹²Ny ampitson’iny, raha niala tao Betania i Jesoa sy ny mpianany, dia nahatsiaro noana i Jesoa.

¹³Nahatazana aviavy anankiray nandrobona Izy; ka lasa nankeo nizaha raha sendra nisy voany; kanjo nony tonga teo Izy, dia tsy nahita na inona na inona afa-tsy raviny fotsiny, satria tsy fotoanan’ny aviavy.

¹⁴Dia niteny i Jesoa ka nanao tamin’ilay aviavy hoe: — Tsy hisy olona hihinana voa avy aminao intsony na oviana na oviana! Ary ren’ny mpianany izany.

¹⁵Dia tonga tao Jerosalema ry zareo. Ary namantana tao an-kianjan’ny tempoly i Jesoa; ka ireo mpivarotra sy mpividy teo noroahiny, ny latabatr’ireo mpanakalo vola[78] sy ny sezan’ireo mpivaro-boromahailala nazerany,

¹⁶ary tsy nisy olona navelany hitondra fitaovana hamakivaky ny kianjan’ny tempoly.

¹⁷Dia nampianatra ny olona i Jesoa ary nanao taminy hoe: — Tsy izao ve no voalazan’ny Soratra Masina: «Ny tranoko dia hantsoina hoe trano fivavahana ho an’ny firenena rehetra»? Nefa he ity izy ataonareo zohy fieren’ny mpangalatra[79]!

¹⁸Ary nahare izany ny lohandoha-mpisorona sy ny mpahay lalàna, ka nitady izay fomba hamonoana an’i Jesoa; fa natahotra Azy manko ry zareo satria nahatalanjona ny vahoaka rehetra ny fampianarany.

¹⁹Ary nony hariva[80] ny andro, dia niala tao an-tanàna i Jesoa sy ny mpianany.

²⁰Nandalo teo amin’ilay aviavy ry zareo ny ampitso maraina, ka nahita ity hazo maina hatramin’ny fakany.

²¹Dia nahatsiahy i Petera ka nanao tamin’i Jesoa hoe: — Mpampianatra ô, jereo fa maina ilay aviavy nozoninao!

²²Namaly i Jesoa ka nanao tamin’ireo mpianany hoe: — Manàna finoana an’Andriamanitra!

²³Lazaiko marina aminareo fa na iza na iza hilaza amin’ity tendrombohitra ity hoe: «Mialà eo, ary mianjerà any an-dranomasina», ka tsy misalasala ao am-po, fa mino hoe ho tonga izay lazainy, dia ho tanteraka aminy tokoa.

²⁴Koa izao no teniko aminareo: na inona na inona hangatahinareo amin’ny vavaka ataonareo, inoy fa efa azonareo, dia hotanteraka aminareo tokoa.

²⁵Ary raha mijoro mivavaka ianareo, ka misy olona anananareo alahelo dia mamelà ny hadisoany mba havelan’ny Rainareo Izay any an-danitra koa ny hadisoanareo. [

²⁶Fa raha tsy mamela ianareo, dia tsy havelan’ny Rainareo Izay any an-danitra koa ny hadisoanareo[81].]

²⁷Dia tonga tao Jerosalema indray i Jesoa sy ny mpianany. Ary nandehandeha teo an-kianjan’ny tempoly i Jesoa no nanatona Azy ny lohandoha-mpisorona sy ny mpahay lalàna ary ny loholona.

²⁸Dia hoy ireo taminy: — Fahefana ahoana moa no anaovanao an’izao zavatra izao? Ary iza no nanome Anao izany fahefana izany, ka ahazoanao manao an’izao?

²⁹Fa novalian’i Jesoa hoe: — Hanontany anareo zavatra anankiray monja aho ka valio, dia holazaiko anareo koa ny fahefana anaovako an’izao zavatra izao.

³⁰Iza no naniraka an’i Jôhany hanao batisa[82], Andriamanitra sa olombelona? Valio Aho!

³¹Dia velona ady hevitra ry zareo ka nifampiresaka hoe: — Raha lazaintsika hoe: «Andriamanitra no naniraka azy», dia hanontany Izy hoe: «Koa nahoana no tsy ninoanareo i Jôhany?»

³²Raha lazaintsika hoe: «Olombelona no naniraka azy...» (Natahotra ny vahoaka ry zareo satria neken’ny olona rehetra fa mpaminanin’Andriamanitra tokoa i Jôhany).

³³Koa dia izao no navaliny an’i Jesoa: — Tsy hitanay izay holazaina! Ary hoy i Jesoa taminy: — Izaho koa tsy hilaza aminareo ny fahefana anaovako an’izao zavatra izao.