Read Dikateny Iombonana Eto Madagasikara Marka 15 Bible Online

Marka 15 - Dikateny Iombonana Eto Madagasikara bible

Marka 15

¹Raha vao maraina ny andro, dia nivory hanapa-kevitra ny lohandoha-mpisorona niaraka tamin’ny loholona sy ny mpahay lalàna, izany hoe ny Fitsarana ambony manontolo; dia nampamatotra an’i Jesoa ry zareo sy nitondra Azy ary nanolotra Azy an’i Pilato.

²Dia nanontany an’i Jesoa i Pilato hoe: — Ianao ve no Mpanjakan’ny Jiosy? Fa novalian’i Jesoa hoe: — Anao izany teny izany!

³Ary nisy zavatra maro niampangan’ireo lohandoha-mpisorona Azy;

⁴ka nanontany Azy indray i Pilato nanao hoe: — Tsy mamaly akory ve Ianao? He ireto zavatra maro iampangany Anao!

⁵Fa tsy namaly na inona na inona intsony i Jesoa, ka gaga i Pilato.

⁶Isaky ny fankalazana ny Paska dia fombàn’i Pilato ny mandefa mpigadra anankiray, izay angatahin’ny olona.

⁷Ary nisy lehilahy atao hoe Barabasy, niara-nigadra tamin’ireo mpikomy nahafaty olona tamin’ny fikomiana nataony.

⁸Dia niakatra ny vahoaka, nangataka an’i Pilato hanao araka ny fanaony aminy.

⁹Fa novalian’i Pilato hoe: — Tianareo ve raha ny Mpanjakan’ny Jiosy no alefako ho anareo?

¹⁰Fantatr’i Pilato manko fa fialonana no nanoloran’ireo lohandoha-mpisorona an’i Jesoa,

¹¹kanefa nampirisihin’ireo lohandoha-mpisorona ny vahoaka hangataka ny handefasana an’i Barabasy toy izay i Jesoa.

¹²Ary dia niteny tamin’ny vahoaka indray i Pilato nanao hoe: — Inona àry no tianareo hataoko an’Ilay antsoinareo hoe Mpanjakan’ny Jiosy?

¹³Fa hoy indray ny antsoantson’ny vahoaka hoe: — Homboy amin’ny hazofijaliana ilay iny!

¹⁴Dia hoy i Pilato tamin’ny vahoaka: — Fa inona àry no ratsy nataony? Fa vao mainka koa niantsoantso mafy ny vahoaka nanao hoe: — Homboy amin’ny hazofijaliana ilay iny!

¹⁵Te hanome fahafaham-po ny vahoaka i Pilato, ka dia i Barabasy no nalefany ho azy; fa i Jesoa kosa nasainy nokapohina sy natolony hohomboana amin’ny hazofijaliana.

¹⁶Nentin’ireo miaramila teo an-tokotany i Jesoa, izany hoe tao amin’ny lapan’ny governora, ary nantsoiny hankeo ny miaramila tarika iray manontolo.

¹⁷Dia nampitafîn-dry zareo lamba jaky[123] Izy ary nasiany fehiloha tsilo norandranina ny lohany,

¹⁸dia noarahabainy Izy hoe: — Arahaba, ry Mpanjakan’ny Jiosy!

¹⁹Ary nokapohiny tamin’ny volotara ny lohany sady nororany Izy, dia nandohalihany sy niankohofany teo anatrehany.

²⁰Rehefa avy nanao Azy toy izany ry zareo, dia nesoriny ilay lamba jaky teny aminy ary nampanaoviny Azy indray ny akanjony; dia nentiny nivoaka ny lapa Izy hohomboana amin’ny hazofijaliana.

²¹Sendra nandalo avy any an-tsaha ity olona atao hoe Simôna, lehilahy sireneanina, rain-dry i Aleksandra sy i Rofosy[124], ka noteren’ireo miaramila hitondra ny hazofijalian’i Jesoa.

²²Tao amin’ny toerana atao hoe Gôlgôtà, izay midika hoe toerana sahala amin’ny karandoha, no nitondrany an’i Jesoa.

²³Nomeny divay mifangaro miora i Jesoa fa tsy nety nisotro.

²⁴Dia nohomboany tamin’ny hazofijaliana Izy; ary nifampizarany ny fitafiany, ka nanaovany loka hahitana izay anjaran’ny tsirairay[125].

²⁵Tamin’ny sivy maraina no nanomboana an’i Jesoa tamin’ny hazofijaliana.

²⁶Ary ny soratra napetraka hilaza ny nanamelohana Azy dia ny hoe: «Mpanjakan’ny Jiosy».

²⁷Nisy jiolahy roa nohomboana tamin’ny hazofijaliana niaraka tamin’i Jesoa, ka ny anankiray teo ankavanany ary ny anankiray teo ankaviany. [

²⁸Koa tanteraka ny Soratra Masina manao hoe: «Natao ho isan’ny mpanao ratsy Izy[126].»]

²⁹Dia nanevateva an’i Jesoa ny mpandalo sady nanifikifi-doha ka nanao hoe: — Sakoizay, ry Ilay hoe mandrava ny tempolin’Andriamanitra ary manangana azy ao anatin’ny telo andro[127]!

³⁰Vonjeo ny tenanao, ka midîna avy eo amin’ny hazofijaliana!

³¹Naneso Azy toy izany koa ireo lohandoha-mpisorona mbamin’ny mpahay lalàna ka nifampilaza hoe: — Namonjy olon-kafa Izy, fa ny tenany tsy hainy vonjena!

³²Aoka ilay Mesia, Mpanjakan’i Israely, hidina avy eo amin’ny hazofijaliana ankehitriny, mba ho hitantsika ka hinoantsika! Dia naneso an’i Jesoa koa ireo niara-nohomboana taminy.

³³Tamin’ny mitataovovonana, dia rakotra haizina ny faritany manontolo, ka naharitra hatramin’ny telo tolakandro izany.

³⁴Ary tamin’ny telo tolakandro i Jesoa dia niantso tamin’ny feo mahery nanao hoe: — Elôỳ, Elôỳ, lemà sabaktàny? (izany hoe raha adika: «Andriamanitro ô, Andriamanitro ô, nahoana no dia nilaozanao Aho[128]?»)

³⁵Ny sasany tamin’ireo olona nijanona teo, raha nandre izany, dia niteny hoe: — Indro fa niantso an’i Elià ny anao!

³⁶Tamin’izay dia nisy olona anankiray nihazakazaka nanatsoboka spaonjy tao anaty vinaingitra; dia notohiziny volotara ilay spaonjy ka natohony an’i Jesoa mba hotsentsefiny[129], sady hoy izy: — Avelao hoe hojerentsika raha ho avy hampidina Azy tokoa i Elià!

³⁷Fa i Jesoa kosa niantso tamin’ny feo mahery, dia niala aina.

³⁸Ary nitriatra nizara roa hatrany ambony ka hatrany ambany ny efitra lamba tao amin’ny Toeramasina[130].

³⁹Fa ilay kapiteny nijoro tandrifin’i Jesoa, raha nahita Azy niala aina toy izany[131], dia loa-bolana hoe: — Tena Zanak’Andriamanitra tokoa io Lehilahy io!

⁴⁰Nisy vehivavy maromaro koa nitazana avy eny lavidavitra teny ka anisan’ireo i Maria avy any Magdalà, sy i Salôme ary i Maria renin-dry i Jakôba kely sy i Jôsèta mirahalahy.

⁴¹Niaraka tamin’i Jesoa tany Galilea ireo vehivavy ireo, nanampy Azy tamin’izay nilainy; ary nisy vehivavy maro hafa koa izay niara-niakatra tamin’i Jesoa tany Jerosalema.

⁴²Efa hariva ny andro no tonga i Jôsefa avy any amin’ny tanàna atao hoe Harimatia[132]. Lehilahy manan-kaja tao amin’ny Fitsarana ambony izy sady fatra-piandry ny Fanjakàn’Andriamanitra. Andro fiomanana tamin’io, izany hoe andro mialoha ny sabata; koa lasa i Jôsefa niditra tamim-pahasahiana tao an-tranon’i Pilato ary nangataka ny vatan’i Jesoa.

⁴³

⁴⁴Fa gaga i Pilato raha hoe maty sahady i Jesoa, ka dia nampiantso ny kapiteny ary nanontany azy raha efa ela no nahafatesany.

⁴⁵Nony reny ny filàzan’ilay kapiteny, dia navelany homena an’i Jôsefa ny faty.

⁴⁶Dia nividy lamba sarobidy i Jôsefa, ary nampidininy avy teo amin’ny hazofijaliana ny vatan’i Jesoa ka nofonosiny lamba sarobidy ary napetrany tao amin’ny fasana nolavahana tamin’ny vatolampy; dia nanakodiavany vato teo amin’ny vavafasana.

⁴⁷Ary nataon’i Maria avy any Magdalà sy i Maria renin’i Jôsèta tsara jery ny toerana nametrahan’i Jôsefa an’i Jesoa.