Read Dikateny Iombonana Eto Madagasikara Marka 3 Bible Online

Marka 3 - Dikateny Iombonana Eto Madagasikara bible

Marka 3

¹Niditra tao amin’ny sinagôga indray i Jesoa ary nisy lehilahy maty tanana anila tao.

²Dia nizaha taratra an’i Jesoa ny olona raha hanasitrana an’io marary io amin’ny andro sabata Izy, mba hahazoany miampanga Azy.

³Fa hoy i Jesoa tamin’ilay lehilahy maty tanana: — Ndeha mijoro etsy afovoan’ny olona.

⁴Dia hoy i Jesoa tamin’ny olona nizaha taratra Azy: — Inona moa no azo atao amin’ny andro sabata, ny manao soa sa ny manao ratsy? ny mamonjy ain’olona sa ny mamono olona? Fa tsy nisy niteny ny olona.

⁵Dia tezitra i Jesoa nanopy maso manodidina nijery azy ireo, sady nalahelo tokoa noho ny hamafin’ny fony, ka niteny tamin-dralehilahy hoe: — Atsory ny tananao! Dia natsotran’ilay marary ny tanany ka sitrana.

⁶Fa lasa nivoaka ny sinagôga avy hatrany kosa ny Farisianina, ary niara-nioko tamin’ny Herôdianina ny amin’izay hamonoana an’i Jesoa.

⁷Dia lasa i Jesoa nihataka teny amoron’ny farihin’i Galilea niaraka tamin’ny mpianany. Vahoaka maro no nanaraka Azy avy ao Galilea; toy izany koa ny avy any Jodea

⁸sy avy any Jerosalema, avy any Idomea[21] sy andafin’ny ony Jôrdàna, ary avy amin’ny faritra manodidina an’i Tiro sy i Sidôna. Samy nandre izay nataon’i Jesoa izy rehetra ka nanatona Azy.

⁹Ary dia hoy i Jesoa tamin’ny mpianany: — Anomany sambokely eto akaikiko Aho fandrao hifanosehan’ny vahoaka.

¹⁰Fa maro tokoa ny olona nositraniny, ka nifanesika mba hikasika Azy izay rehetra nanana aretina.

¹¹Ary ireo fanahy maloto, isaky ny mahita an’i Jesoa, dia niankohoka teo anatrehany sady niantsoantso hoe: — Ianao no ilay Zanak’Andriamanitra!

¹²Fa i Jesoa niteny mafy azy ireo hoe: — Aza manao izay hahafantarana Ahy!

¹³Ary niakatra teo an-tendrombohitra i Jesoa, ka niantso izay tiany hantsoina; ary niala teo amin’ny vahoaka ireo ka nanatona Azy.

¹⁴Ary nanendry 12 lahy izay nomeny anarana hoe apôstôly Izy, mba hiaraka aminy sy hirahiny hitoriteny

¹⁵ka hanam-pahefana handroaka ny demony.

¹⁶Ireto no voatendriny ho isan’ny 12 lahy: i Simôna izay nampian’i Jesoa anarana hoe Petera[22];

¹⁷i Jakôba sy i Jôhany mirahalahy zanak’i Zebedeo ary nampian’i Jesoa anarana hoe Boanerjesy, izany hoe olona mahery setra tahaka ny varatra[23];

¹⁸i Andrea, i Filipo, i Bartôlômeo, i Matio, i Tômà, i Jakôba zanak’i Halfeo, i Tadeo, i Simôna Kananeanina,

¹⁹ary i Jodasy Iskariôta ilay nanolotra an’i Jesoa.

²⁰Dia niverina tao an-trano i Jesoa; ary vory maro teo indray ny vahoaka, hany ka tsy afaka nisakafo Izy sy ny mpianany.

²¹Ren’ny fianakavian’i Jesoa izany ka niainga ireo mba haka Azy an-keriny satria hoe[24] lasa adala Izy.

²²Ary hoy ireo mpahay lalàna nidina avy tany Jerosalema hoe: — I Belzeboba no ao amin’ilay io ary fahefana avy amin’ny filohan’ny demony no androahany ny demony.

²³Fa nantsoin’i Jesoa iretsy mpahay lalàna ka fanoharana no nitenenany taminy hoe: — Ahoana no hahafahan’i Satàna mandroaka an’i Satàna?

²⁴Raha misy fanjakana miady an-trano, dia tsy haharitra izany fanjakana izany;

²⁵ary raha misy fianakaviana miady an-trano, dia tsy haharitra izany fianakaviana izany.

²⁶Koa raha i Satàna no mitsangana hanohitra ny tenany sy miady an-trano, dia tsy haharitra izy fa ho vita eo ny aminy.

²⁷Kanefa tsy misy olona afaka hiditra ao an-tranon’olona matanjaka mba handroba ny fananany, raha tsy voafatony aloha ilay olona matanjaka; dia izay izy vao mandroba ny ao an-trano.

²⁸Ary lazaiko marina aminareo fa havelan’Andriamanitra avokoa ny heloka rehetra vitan’ny olombelona ary koa ny fanevatevana rehetra ataony an’Andriamanitra;

²⁹fa na iza na iza manevateva ny Fanahy Masina, dia tsy mba hahazo famelan-keloka na oviana na oviana, satria fahotana raiki-tampisaka aminy mandrakizay no mahameloka azy.

³⁰Nilaza manko ireo mpahay lalàna fa hoe fanahy maloto no ao amin’i Jesoa.

³¹Tamin’izay dia tonga ny renin’i Jesoa sy ireo rahalahiny, nijanona teo alatrano ary naniraka olona hiantso Azy.

³²Vahoaka be no nipetraka nanodidina an’i Jesoa; ary nisy nilaza taminy hoe: — Indreo mitady Anao ao alatrano ao ny reninao sy ny rahalahinao.

³³Fa hoy ny navalin’i Jesoa: — Iza moa no reniko sy rahalahiko?

³⁴Dia natopiny tamin’ireo olona nipetraka nanodidina Azy ny masony ka hoy Izy: — Ireto no reniko sy rahalahiko.

³⁵Fa na iza na iza manao ny sitrapon’Andriamanitra, dia izany no rahalahiko, anabaviko na reniko.