Read Dikateny Iombonana Eto Madagasikara Marka 5 Bible Online

Marka 5 - Dikateny Iombonana Eto Madagasikara bible

Marka 5

¹Nandeha sambokely i Jesoa sy ny mpianany ka tonga teny ampitan’ny farihin’i Galilea, teo amin’ny faritanin’i Gergesà[30].

²Raha vao niala tao an-tsambokely i Jesoa, dia indro nisy lehilahy nipoitra avy eny amin’ny fasana[31], tonga nitsena Azy. Azon’ny fanahy maloto ralehilahy,

³ka teny amin’ny fasana no niorim-ponenana ary tsy nisy olona nahafatotra azy intsony na dia tamin’ny rojo vy aza.

⁴Matetika tokoa manko dia nasiana gadra ny tongony sady nofatorana rojo vy ny tanany; fa ny rojo vy notapahiny, ary ny gadra nopotehiny, ka dia tsy nisy olona nahafolaka an-dralehilahy.

⁵Na andro na alina dia teny amin’ny fasana sy tany an-tendrombohitra tany foana izy, niantsoantso sy nandratra tena tamin’ny vato.

⁶Nony nahatazana an’i Jesoa ralehilahy, dia nihazakazaka nanatona Azy ka niankohoka teo anatrehany,

⁷ary niantsoantso ka niteny tamin’ny feo mahery hoe: — Fa hataonao inona aho, ry Jesoa Zanak’Andriamanitra avo indrindra? Miangavy Anao amin’ny anaran’Andriamanitra aho, aza dia ampijalîna re!

⁸(Satria i Jesoa efa nandidy azy hoe: «Mialà amin’io lehilahy io, ry fanahy maloto!»)

⁹Dia nanontany an-dralehilahy i Jesoa nanao hoe: — Iza no anaranao? Ka namaly izy hoe: — Tafika no anarako, satria maro izahay!

¹⁰Dia nitalaho mafy tamin’i Jesoa ralehilahy mba tsy horoahiny lavitra an’io tany io ireo fanahy maloto ireo.

¹¹Ary nisy kisoa[32] maro, andiany iray, nandrasana teny amin’ny kisolosolon’ny havoana.

¹²Koa nitalaho tamin’i Jesoa ireo fanahy maloto nanao hoe: — Alefaso amin’iretsy kisoa iretsy izahay, hiditra ao aminy.

¹³Neken’i Jesoa ny fangatahany. Koa dia niala tamin-dralehilahy ireo fanahy maloto ka lasa niditra tao amin’ny kisoa. Ary nirifatra ny andian-kisoa, tokony ho kisoa roa arivo, ka nivarimbarina tan-kilahila ho any anaty farihy, dia maty tao.

¹⁴Nandositra ireo mpiandry kisoa ka lasa nilaza ny vaovao tao an-tanàna sy teny ambanivohitra. Koa avy ny olona hijery ny zava-niseho,

¹⁵dia tonga teo akaikin’i Jesoa ary nandinika ilay lehilahy azon’ny demony antsoina hoe Tafika teo, efa mipetraka tsara, mitafy lamba sady ary saina; ka nihoron-koditra izy rehetra.

¹⁶Ry zareo nanatri-maso kosa nitantara tamin’ireo vao tonga ny zava-niseho tamin’ilay azon’ny demony sy ny nanjo ny kisoa teo.

¹⁷Tamin’izay dia nitalahoan’ny olona i Jesoa hiala teo amin’ny taniny.

¹⁸Raha ilay niondrana an-tsambokely iny i Jesoa, dia niangavy taminy kosa ilay azon’ny demony teo aloha nanao hoe: — Avelao aho hiaraka aminao!

¹⁹Tsy nanaiky i Jesoa fa niteny taminy hoe: — Andeha mody any an-tranonao, any amin’ireo havanao; ka lazao azy izay rehetra nataon’ny Tompo taminao noho ny famindrampony.

²⁰Dia lasa ralehilahy nanao antso avo, eran’ny faritany atao hoe Dekapôly, izay rehetra nataon’i Jesoa taminy; ka dia gaga avokoa ny olona.

²¹Nony tafaverina an-tsambokely teny ampita i Jesoa, dia vahoaka maro no nitangorona nanatona Azy, fa Izy kosa nijanona teo amoron’ny farihy ihany.

²²Dia avy ny anankiray tamin’ireo lehiben’ny sinagôga, atao hoe Jaîro; raha vao nahita an’i Jesoa izy, dia niankohoka teo an-tongony

²³sady niangavy azy mafy nanao hoe: — Eo ambavahoanan’ny fahafatesana ny zanako vavy; koa tongava hametra-tanana aminy, dia ho sitrana izy ka ho velona.

²⁴Dia lasa niaraka tamin’i Jaîro i Jesoa. Vahoaka nifanitsa-kitro no nitanjozotra nanaraka Azy, ka nifanety taminy.

²⁵Ary nisy vehivavy marary mitsi-dra nandritra ny 12 taona;

²⁶efa niaritra zavatra mafy maro tamin’ny dokotera maro izy io ka lany fananana tamin’izany rehetra izany, nefa tsy nihatsara velively fa vao mainka niharatsiratsy kokoa aza.

²⁷Nandre ny amin’i Jesoa ravehivavy, dia lasa nifanjevo tamin’ny vahoaka avy tao ivoho, ka nikasika ny lamban’i Jesoa

²⁸fa hoy mantsy izy: «Na dia ny lambany ihany aza no voakasiko, dia ho sitrana aho.»

²⁹Dia ritra niaraka tamin’izay ny loharanon’aretiny, ka tsapany tao amin’ny tenany fa sitrana tsy nandeha ra intsony izy.

³⁰Niaraka tamin’izay koa dia tsapan’i Jesoa fa nisy hery niala avy tao aminy; ka niherikerika teo afovoan’ny vahoaka Izy nanontany hoe: — Iza no nikasika ny lambako teo?

³¹Ary hoy ny mpianany taminy: — Hitanao ireto vahoaka mifanety aminao, ka hoy indray Ianao hoe: Iza no nikasika Ahy?

³²Dia nanopy maso manodidina Azy i Jesoa mba hijery ilay vehivavy izay efa nanao izany.

³³Dia raiki-tahotra sady nangovitra ravehivavy satria nahalala tsara ny zavatra nitranga tao aminy; ka tonga niankohoka teo anatrehan’i Jesoa izy ary nilaza taminy ny marina rehetra.

³⁴Dia hoy i Jesoa taminy: — Ny finoanao, anaka, no nahasitrana anao[33]! Ndeha àry ka veloma finaritra, mitohiza fahasalamana soa aman-tsara!

³⁵Raha mbola niteny i Jesoa, dia nisy iraka tonga avy tany an-tranon’ity lehiben’ny sinagôga ka nanao tamin’i Jaîro hoe: — Efa maty ny zanakao vavy, ka nahoana ianao no mbola manahirana ny Mpampianatra ihany?

³⁶Fa tsy nahoan’i Jesoa izany teny izany[34], ka hoy Izy tamin’ilay lehiben’ny sinagôga: — Aza matahotra, minoa fotsiny ihany!

³⁷Dia tsy nisy olona navelan’i Jesoa hiaraka aminy afa-tsy i Petera sy i Jakôba ary i Jôhany rahalahin’i Jakôba.

³⁸Nankao an-tranon’ilay lehiben’ny sinagôga izy efa-mianaka, ary hitan’i Jesoa ireto olona misomaritaka sy mitomany ary mikiakiaka.

³⁹Koa sady niditra tao an-trano i Jesoa no niteny tamin’ireo olona tao nanao hoe: — Nahoana ianareo no misomaritaka sy mitomany tahaka izao? Tsy maty akory ny zaza, fa matory!

⁴⁰Dia nihomehezan’ny olona i Jesoa; nefa noroahiny any alatrano izy rehetra ka ny ray aman-drenin-jaza sy ireo mpianatra niaraka taminy no nentiny nankao amin’ny toerana nisy ny zaza.

⁴¹Dia noraisin’i Jesoa ny tanan’ilay zaza ka hoy Izy taminy: — Talità komỳ[35]! (Izany hoe: «Razazavavy, mandidy anao Aho, mifohaza!»)

⁴²Dia nitsangana niaraka tamin’izay razazavavy, ka nandehandeha, fa efa feno 12 taona. Ary dia talanjona aoka izany ny olona teo;

⁴³fa i Jesoa kosa namepetra mafy mba tsy hisy hahalala izao zavatra izao; ary dia nasainy nomena sakafo razazavavy.