Read Dikateny Iombonana Eto Madagasikara Lioka 19 Bible Online

Lioka 19 - Dikateny Iombonana Eto Madagasikara bible

Lioka 19

¹Tafiditra tao Jerikao i Jesoa ary namakivaky ny tanàna.

²Ary indro nisy lehilahy atao hoe Zakeo, sady lehiben’ny mpamory hetra no mpanankarena.

³Mba nitady hahita izany Jesoa izany izy, saingy fohy ka tsy afa-nanoatra satria nifanety ny vahoaka.

⁴Dia nilomay nialoha izy ka nianika hazo amontana mba hitazana an’i Jesoa, fa akaikin’izany no efa handalovany.

⁵Nony tonga teo i Jesoa, dia nitraka ary niteny tamin’i Zakeo hoe: — Ry Zakeo, midîna faingana fa any aminao Aho anio no tsy maintsy miantrano.

⁶Nidina faingana i Zakeo ary nandray an’i Jesoa tamin-kafaliana.

⁷Nimonomonona ny olona rehetra nanatrika teo ka nanao hoe: — Any amin’ny mpanota indray re no amantanany!

⁸Niato kosa i Zakeo ka niteny tamin’ny Tompo hoe: — Indro, Tompoko, ny antsasaky ny fananako afoiko ho an’ny mahantra; ary izay zavatr’olona azoko am-pitaka, dia honerako inefatra heny[141]!

⁹Ary hoy i Jesoa taminy[142]: — Anio ny famonjena dia tafiditra amin’ity trano ity; noho izany ity lehilahy ity koa dia zanak’i Abrahama!

¹⁰Fa ny hitady sy hamonjy izay very no nahatongavan’ny Zanak’olona!

¹¹Raha mbola nihaino izany teo ny olona, dia nanaovan’i Jesoa fanoharana indray. Akaiky an’i Jerosalema manko Izy tamin’izay ka noheverin’ny olona fa efa nadiva hiseho ny Fanjakàn’Andriamanitra.

¹²Toy izao àry ny tenin’i Jesoa: — Lasa tany an-tany lavitra ity andriandahy anankiray handray ny fahefana hanjaka, dia hiverina.

¹³Niantsoany folo lahy ny mpanompony talohan’ny hiaingany, ka samy nomeny denàry zato avy sady nataony hoe: «Ampiasao ireny mandra-piveriko.»

¹⁴Hàlan’ny mpiray tanindrazana aminy kosa ilay andriandahy ka nandefasany iraka nanaraka azy hilaza hoe: «Tsy mila iny lehilahy iny ho mpanjaka izahay.»

¹⁵Rehefa nahazo ny fahefana hanjaka izy, dia nody an-tanindrazana ary nampiantso an’ireo nomeny vola mba hahalalany izay tombony azony avy.

¹⁶Niseho ilay voalohany ka nilaza hoe: «Nahazo denàry arivo, tompoko, ny denàry zato nomenao ahy!»

¹⁷Dia hoy ny mpanjaka taminy: «Mahafinaritra izany, ry mpanompo tsara; nahatoky tamin’ny zava-madinika ianao, ka dia tendreko hiandraikitra tanàna folo.»

¹⁸Tonga ny faharoa ka nanao hoe: «Namokatra denàry dimanjato, tompoko, ny denàry zato nomenao ahy!»

¹⁹Dia hoy ny mpanjaka taminy: «Ianao indray dia tendreko hiandraikitra tanàna dimy.»

²⁰Tonga kosa ny anankiray hafa ka nanao hoe: «Intỳ, tompoko, ny denàry zato nomenao ahy, fa nataoko tsara tahiry tanaty mosara.

²¹Natahotra anao manko aho, satria lehilahy sarotiny ianao, ka maka izay tsy napetrakao ary mijinja izay tsy nafafinao.»

²²Dia hoy ny mpanjaka taminy: «Mpanompo ratsy fanahy raha ianao! Ny teninao no itsarako anao: fantatrao fa lehilahy sarotiny aho, maka izay tsy napetrako ary mijinja izay tsy nafafiko;

²³koa nahoana àry no tsy napetrakao tany amin’ny banky ny volako, ka ho noraisiko mbamin’ny zana-bola rehefa tafaverina aho?»

²⁴Ary hoy ny mpanjaka tamin’izay nanatrika teo: «Alao ny denàry zato eny aminy ka omeo an’ilay nahazo denàry arivo!»

²⁵Dia hoy ireo tamin’ny mpanjaka: «Ka efa manana denàry arivo anie izy, tompoko!»

²⁶Fa novaliany hoe: «Lazaiko aminareo fa izay rehetra manana no homena hatrany; ary izay tsy manana kosa, na izay kely ananany aza dia halana aminy.

²⁷Fa iretsy fahavaloko tsy nanaiky hanjakako iretsy, dia ento atỳ ka vonoy eto anatrehako!»

²⁸Nony avy niteny izany i Jesoa, dia nitarika ny dia hiakatra ho any Jerosalema.

²⁹Rehefa nanakaiky an’i Betifage sy i Betania izay eo amin’ny tendrombohitra atao hoe Analanôliva[143] Izy, dia naniraka roa lahy tamin’ny mpianany

³⁰ka nanao hoe: — Mankanesa amin’itsy tanàna manoloana itsy. Rehefa tafiditra ny tanàna ianareo, dia hahita zana-boriky mifatotra mbola tsy nitaingenan’olona; vahao izy ka ento atỳ.

³¹Ary raha misy olona manontany anareo hoe: «Nahoana io no vahanareo?», dia valio hoe: «Misy ilàn’ny Tompo azy[144].»

³²Nony lasa ireo nirahina, dia nahita araka izay voalazan’i Jesoa taminy.

³³Raha namaha ny zana-boriky iny izy, dia hoy ny tompom-boriky hoe: — Nahoana io no vahanareo?

³⁴Dia novalian’izy roa lahy hoe: — Misy ilàn’ny Tompo azy!

³⁵Nentin’ireto iraka nankeo amin’i Jesoa ilay zana-boriky; ary ny lamban’izy roa lahy no napetrany teo amboniny, vao nasainy nitaingina i Jesoa[145].

³⁶Nony nandroso i Jesoa, dia namelaran’ny olona lamba teny amin’ny lalan-kalehany[146].

³⁷Rehefa nanakaiky an’i Jerosalema Izy ka handray ilay fidinana eo amin’ny tendrombohitra Analanôliva, dia nisy mpianatra marobe indray nientan-kafaliana sady nidera an’Andriamanitra tamin’ny feo mahery, noho ny asa mahagaga rehetra efa hitany;

³⁸hoy ny antsoantsony hoe: «Hombàm-pitahiana amin’ny anaran’ny Tompo anie ny Mpanjaka izay avy! Fiadanana anie any an-danitra, ary voninahitra anie ho an’Andriamanitra[147]!»

³⁹Nisy kosa Farisianina avy teo anivon’ny vahoaka niteny tamin’i Jesoa hoe: — Mpampianatra ô, mba teneno ny mpianatrao hangina!

⁴⁰Fa novalian’i Jesoa hoe: — Lazaiko aminareo fa raha mangina ireo, dia ny vato no hiantsoantso!

⁴¹Ary nanakaiky an’i Jerosalema hatrany i Jesoa ka nony nahatazana ny tanàna, dia nitomany azy

⁴²sady nanao hoe: — Raha mba fantatrao amin’ity andro ity manko izay hanananao fiadanana! Nefa indrisy, takona ny masonao izany!

⁴³Fa ho avy aminao ny andro hananganan’ny fahavalonao tovon-tany manodidina anao, ka hanaovany fahirano anao sy hanereny anao hatraiza hatraiza.

⁴⁴Hofongorana tanteraka ianao sy ny mponina ao anatinao ka tsy havelany hisy vato mifanongoa eo aminao, noho ianao tsy nahalala ny andro notendren’Andriamanitra hamangiana anao!

⁴⁵Nony tafiditra tao an-kianjan’ny tempoly i Jesoa, dia nandroaka ireo mpivarotra

⁴⁶sady nanao taminy hoe: — izao no voalazan’ny Soratra Masina: «Ny tranoko dia trano fivavahana.» Nefa he itỳ izy ataonareo zohy fieren’ny mpangalatra[148]!

⁴⁷Ary nampianatra isan’andro teo an-kianjan’ny tempoly i Jesoa; fa ny lohandoha-mpisorona sy ny mpahay lalàna mbamin’ny loholom-bahoaka kosa nitady hahafaty Azy.

⁴⁸Saingy tsy hitan-dry zareo izay hatao satria liana fatratra ny vahoaka rehetra mihaino Azy.