Read Dikateny Iombonana Eto Madagasikara Lioka 2 Bible Online

Lioka 2 - Dikateny Iombonana Eto Madagasikara bible

Lioka 2

¹Tamin’izany andro izany, dia namoaka didy ny amperôra Aogosta[19] hampanao fanisàm-bahoaka eran’ny fanjakana rômanina.

²Izany fanisàm-bahoaka voalohany izany dia natao fony i Kireny no filohan’ny faritany Siria.

³Ary samy namonjy ny tanàna fiaviany avy ny olona rehetra mba hisaina.

⁴Niainga avy tao Nazareta tanàna any Galilea i Jôsefa hiakatra any Jodea, hankany amin’ilay tanàna fiavian’i Davida atao hoe Betlehema, noho izy taranaka sy fokon’i Davida.

⁵Mba hoisaina no foto-dian’i Jôsefa sy i Maria vadiny izay efa bevohòka.

⁶Raha tao Betlehema izy roa, dia tonga ny andro hahaveloman’i Maria.

⁷Teraka ny lahimatoany izy, dia nohodidininy lamban-jaza ary nampandrîny teo amina fihinanam-bilona; fa tsy nisy toerana ho azy telo mianaka tao amin’ny trano fivantanam-bahiny.

⁸Tany amin’izany faritany izany, dia nisy mpiandry ondry nitoetra tany an-tsaha niambina ny ondriny nandritra ny alina.

⁹Nisy anjelin’ny Tompo niseho tampoka taminy; ary nohodidinin’ny voninahitry ny Tompo ireo mpiandry ondry ka raiki-tahotra izaitsizy.

¹⁰Fa hoy ilay anjely taminy: — Aoka izay ny tahotra, fa vaovao mahafaly no entiko ho anareo, dia fifaliana lehibe ho an’ny vahoaka rehetra:

¹¹Mpamonjy no teraka ho anareo anio ao an-tanànan’i Davida, dia i Kristy Tompo.

¹²Izao no hahafantaranareo Azy: hahita zazakely anankiray voahodidina lamban-jaza sady mandry eo amina fihinanam-bilona ianareo.

¹³Ary nisy anjely alikisa avy any an-danitra niseho niaraka tamin’ilay anjely teo ka nidera an’Andriamanitra nanao hoe:

¹⁴«Voninahitra any amin’ny avo indrindra ho an’Andriamanitra; ary fiadanana etỳ an-tany ho an’ny olombelona fa nanehoany fitia[20]!»

¹⁵Rehefa nilaozan’ny anjely niverina any an-danitra ireto mpiandry ondry, dia nifampiresaka hoe: — Andao mihitsy ho any Betlehema isika hizaha izany zava-baovao nampahalalain’ny Tompo antsika izany!

¹⁶Dia nandeha faingana izy ireo nankany, ka nahita an’i Maria sy i Jôsefa ary nahita zazakely mandry eo amin’ny fihinanam-bilona.

¹⁷Nony avy nahita ireto mpamangy, dia nampiely ny teny nolazain’ny anjely taminy momba io zazakely io;

¹⁸ary izay rehetra nandre dia gaga tamin’ny zavatra voalazan’ireo mpiandry ondry.

¹⁹I Maria kosa nitadidy izany rehetra izany ka nieritreritra azy tao am-pony.

²⁰Dia lasa nody ireo mpiandry ondry ka nanome voninahitra sy dera an’Andriamanitra noho izay rehetra reny sy hitany, araka ny voalazan’ny anjely taminy.

²¹Tonga ny fotoana hamorana ilay zaza nony afaka herinandro; ary natao hoe Jesoa ny anarany, araka ilay nolazain’ny anjely talohan’ny nahatorontoronina Azy[21].

²²Tonga ny fotoana tsy maintsy anatanterahana ny fombam-pivavahana fidiovana ho an’i Maria sy i Jesoa zazakely, araka ny lalànan’i Mosesy[22]. Dia nentin’i Maria sy i Jôsefa tany Jerosalema ny zazakely mba hatolotra ny Tompo,

²³satria voasoratra ao amin’ny lalànan’ny Tompo hoe: «Hatokana ho an’ny Tompo ny lahimatoa rehetra[23].»

²⁴Nitondra fanatitra araka ny voalaza ao amin’ny lalànan’ny Tompo ihany koa i Maria sy i Jôsefa, izany hoe fanatitra «domohina roa na voromahailala roa[24]».

²⁵Tao Jerosalema tamin’izay dia nisy lehilahy nantsoina hoe Simehôna; olo-marina sady tena mpivavaka izany lehilahy izany ary fatra-piandry an’Ilay ho avy hampionona ny vahoaka Israely. Nombàn’ny Fanahy Masina izy

²⁶ary nampahalalainy fa tsy ho faty raha tsy efa mahita ilay Mesia avy amin’ny Tompo.

²⁷Nentin’ny Fanahy Masina hankao an-kianjan’ny tempoly i Simehôna, raha niditra indrindra ny ray aman-drenin’i Jesoa zazakely mba hanatanteraka izay andidian’ny lalàna ny amin’ny zaza;

²⁸dia nitrotro Azy i Simehôna sady velom-pisaorana an’Andriamanitra nanao hoe:

²⁹— Tompo ô, alefaso amim-piadanana amin’izay ity mpanomponao, araka ny teninao!

³⁰Efa hitako maso manko ny famonjena avy aminao

³¹izay nomaninao ho an’ny firenena rehetra:

³²dia fahazavana hampahalala Anao amin’ny hafa firenena ary hanome voninahitra an’i Israely vahoakanao[25].

³³Gaga ny ray aman-drenin’i Jesoa noho izao tenin’i Simehôna momba ny zanany izao.

³⁴Ary nitsodrano azy telo mianaka i Simehôna; avy eo izy dia niteny tamin’i Maria renin’i Jesoa hoe: — Indro ity zaza ity fa voatendry mba hahatonga ny maro amin’i Israely homelohin’Andriamanitra ary koa hahatonga ny maro amin’i Israely hankatoavin’Andriamanitra. Ho famantarana hifanoheran’ny olona ity zaza ity,

³⁵mba hampiharihary ny fisainan’ny besinimaro. Ary ianao kosa, ramatoa, hotsatohan-tsabatra ny fanahinao!

³⁶Nisy koa vehivavy mpaminany natao hoe Ana, zanakavavin’i Fanoela, avy amin’ny fokon’i Asera. Tena antitra izy. Fito taona ihany no nanambadiany taorian’ny nahatovovavy azy.

³⁷Dia nipetraka ho mpitondratena izy ary feno 84 taona izao ny andro niainany[26]. Tsy niala tao amin’ny tempoly mihitsy izy, fa nanompo an’Andriamanitra andro aman’alina, ka nifady hanina sy nivavaka.

³⁸Tonga koa i Ana tamin’io fotoana io ka nisaotra an’Andriamanitra ary nilazalaza momba ity zaza ity tamin’izay rehetra fatra-piandry ny hanavotan’Andriamanitra an’i Jerosalema.

³⁹Rehefa avy nanatontosa ny zavatra rehetra araka ny lalànan’ny Tompo ny ray aman-drenin’i Jesoa, dia niverina nankany Galilea izy telo mianaka ho ao Nazareta tanànany.

⁴⁰Nitombo sy nihatanjaka ilay zaza sady feno fahendrena; ary tao aminy ny fahasoavan’Andriamanitra.

⁴¹Mpankany Jerosalema isan-taona ny ray aman-drenin’i Jesoa amin’ny fankalazana ny Paska.

⁴²Nony feno 12 taona i Jesoa, dia lasa izy telo mianaka niara-niakatra araka ny fanao amin’izany fankalazana izany[27].

⁴³Nody i Maria sy i Jôsefa nony tapitra ny andro fankalazana, fa i Jesoa tovolahikely dia mbola nijanona tao Jerosalema, saingy tsy tsikaritr’ireo ray aman-dreniny izany.

⁴⁴Nihevitra moa izy roa fa tafaraka tamin’ny mpiara-dia ity zanany; ka efa lasa lalana indray andro, izay vao nitady Azy, nanontany ny havana sy olom-pantatra,

⁴⁵nefa tsy nahita Azy. Dia niverina ilàlana izy roa nitady Azy tany Jerosalema.

⁴⁶Tamin’ny andro fahatelo vao hitany tao an-kianjan’ny tempoly i Jesoa mipetraka teo afovoan’ireo mpampianatra jiosy ka mihaino sady manontany an-dry zareo.

⁴⁷Talanjona daholo ny olona nandre ity tovolahikely fa saina matotra no nasehony isak’izay niteny Izy.

⁴⁸Gaga dia gaga ny ray aman-dreniny nahita Azy, ka hoy ny reniny taminy: — Nahoana, anaka, no nanao toy izao taminay Ianao? Endrey izany tebitebinay sy ny rainao nitady Anao!

⁴⁹Dia hoy i Jesoa tamin’izy mivady: — Nahoana kosa no mitady Ahy ianareo? Hay tsy mbola fantatrareo fa tsy maintsy ato amin’ny tranon’ny Raiko Aho[28]?

⁵⁰Tsy azon’izy roa anefa izay nolazain-janany taminy.

⁵¹Dia niara-nody taminy tany Nazareta i Jesoa ary nanoa azy. Ny reniny kosa nitadidy izany rehetra izany tao am-pony.

⁵²Ary nitombo fahendrena sy taona i Jesoa sady nandroso nahatehotia tamin’Andriamanitra sy ny olona[29].