Read Dikateny Iombonana Eto Madagasikara Lioka 22 Bible Online

Lioka 22 - Dikateny Iombonana Eto Madagasikara bible

Lioka 22

¹Efa akaiky ny fankalazana ny azima, izay antsoina hoe Paska[162].

²Ary nitady izay fomba hamonoana an’i Jesoa ny lohandoha-mpisorona sy ny mpahay lalàna, nefa tsy nahita satria natahotra ny vahoaka ry zareo.

³Kanjo nidiran’i Satàna tao am-pon’i Jodasy, ilay atao hoe Iskariôta, anisan’ny 12 lahy.

⁴Nankany amin’ny lohandoha-mpisorona sy ny lehiben’ny mpiambina ny tempoly izy hidinidinika ny amin’izay hanolorany an’i Jesoa aminy.

⁵Faly tokoa ry zareo ary nifanaraka fa hanome vola azy.

⁶Dia nanaiky i Jodasy ka nitady izay fotoana tsara hanolorana an-tsokosoko an’i Jesoa eo am-pelatanany.

⁷Tonga ny andro fihinanana ny azima izay tsy maintsy hamonoana ny zanak’ondry ho an’ny sakafo Paska.

⁸Dia nirahin’i Jesoa ry i Petera sy i Jôhany nataony hoe: — Ndeha manomana ny sakafo Paska ho antsika[163].

⁹Fa hoy izy roa lahy taminy: — Aiza no tianao hanomananay azy?

¹⁰Dia novalian’i Jesoa hoe: — Raha vao tafiditra ny tanàna ianareo, dia hisy lehilahy mitondra siny feno rano hifanena aminareo; ka iny arahina any amin’izay trano hidirany,

¹¹ary lazao amin’ny tompon-trano hoe: «Izao no tenin’ny Mpampianatra aminao: Aiza, hono, izay efitrano hiarahako mihinana ny sakafo Paska amin’ny mpianatro?»

¹²Dia hotoroany efitrano ambony rihana ianareo, efitrano malalaka sady ary fomba; ka ao ny sakafo no omany.

¹³Lasa izy roa lahy ka nahita ny toe-javatra araka ny voalazan’i Jesoa taminy ary dia nanomana ny sakafo Paska.

¹⁴Nony tonga ny fotoana, dia nipetraka nihinana i Jesoa mbamin’ny apôstôly.

¹⁵Ary hoy i Jesoa taminy: — Niriko dia niriko tokoa hiara-mihinana ity sakafo Paska ity aminareo alohan’ny hijaliako.

¹⁶Lazaiko aminareo fa tsy hihinana ny Paska intsony Aho mandra-pahatanteraka azy any amin’ny Fanjakàn’Andriamanitra.

¹⁷Dia nandray kalisy natolotra Azy i Jesoa; ary nisaorany an’Andriamanitra izany ka nataony hoe: — Raiso ity ka ifampizarao.

¹⁸Lazaiko aminareo fa tsy hisotro divay intsony Aho mandra-pahatongavan’ny Fanjakàn’Andriamanitra.

¹⁹Avy eo nandray mofo i Jesoa; ary nisaorany an’Andriamanitra izany, dia notapatapahiny sy nomeny ny apôstôly ka nataony hoe: — Ny tenako ity [izay omena ho anareo. Izany atao ho fahatsiarovana Ahy.

²⁰Ary noraisin’i Jesoa toy izany koa ny kalisy taorian’ny sakafo sady nataony hoe: — Ity kalisy ity dia ilay fanekempihavanana vaovao aorin’Andriamanitra amin’ny rako izay alatsaka ho anareo[164].]

²¹Eny, indro miaraka amiko eto am-pisakafoana ilay hanolotra Ahy[165].

²²Ny Zanak’olona moa dia efa ho faty araka izay voalahatran’Andriamanitra, nefa mampalahelo ilay olona hanolotra Azy!

²³Ary nifanontany ireo apôstôly hoe: «Iza re amintsika no dia hahavita izany?»

²⁴Nisy fifandirana teo amin’ny apôstôly ny amin’izay tokony ho lehibe indrindra amin’izy samy izy.

²⁵Dia hoy i Jesoa taminy: — Eo amin’ny hafa firenena, ny mpanjaka dia manjakazaka; ary ny mpanampatra fahefana dia antsoina hoe mpanasoa.

²⁶Aminareo kosa tsy mba toy izany: izay lehibe kokoa eo aminareo no aoka ho toy ny zandriny, ary izay mpifehy ho toy ny mpanompo.

²⁷Satria iza moa no lehibe kokoa: ny mipetraka mihinana sa ny mpanompo mampihinana? Moa ve tsy izay mipetraka mihinana? Izaho anefa eto afovoanareo dia toy ny mpanompo mampihinana.

²⁸Ianareo dia naharitra niaraka tamiko tamin’ny fitsapana nanjo Ahy;

²⁹Izaho kosa manendry anareo ho mpanjaka tahaka ny nanendren’ny Ray Ahy ho mpanjaka.

³⁰Ka hihinana sy hisotro eo amin’ny latabatro ianareo any amin’ny Fanjakàko ary hipetraka ambony sezafiandrianana hitsara ny foko 12 amin’i Israely.

³¹Hoy i Jesoa tamin’i Petera: — Ry Simôna, ry Simôna, indro efa notakîn’i Satàna hokotranina toy ny vary sivanina ianareo.

³²Izaho efa nangataka ho anao mba tsy ho lefy ny finoanao; ianao kosa, rehefa tafaverina amiko, herezo ny rahalahinao.

³³Fa i Petera niteny taminy hoe: — Tompo ô, vonon-kanaraka Anao aho na ho any am-ponja sy ho any amin’ny fahafatesana aza!

³⁴Dia hoy i Jesoa: — Lazaiko aminao, ry Petera, fa mbola tsy haneno akory ny akoho anio, dia efa intelo no handavanao ho tsy mahalala Ahy!

³⁵Ary izao no tenin’i Jesoa tamin’ny apôstôly: — Moa orin-javatra ve ianareo, raha nirahiko tsy aman-kitapom-bola na kitapom-batsy na kapa? Dia novalian’ireo hoe: — Tsy orin’inona na inona izahay!

³⁶Ary hoy i Jesoa taminy: — Amin’izao kosa anefa, izay manana kitapom-bola, aoka hivimbina ny azy; torak’izany koa izay manana kitapom-batsy; ary izay tsy manan-tsabatra, aoka hivarotra ny lambany ka hividy sabatra.

³⁷Lazaiko aminareo fa tsy maintsy tanteraka amiko ilay tenin’ny Soratra Masina hoe: «Natao ho isan’ny mpanao ratsy Izy[166]»; ary efa ho tanteraka tokoa ity ny momba Ahy.

³⁸Dia hoy ny apôstôly: — Indreto, Tompoko, misy sabatra roa! Fa i Jesoa nanao taminy hoe: — Aoka izay[167]!

³⁹Dia niainga i Jesoa nankany an-tendrombohitra Analanôliva araka ny fanaony; ary tafaraka taminy koa ny mpianany.

⁴⁰Vao tonga teo amin’ilay toerana i Jesoa, dia nanao tamin’ny mpianany hoe: — Mivavaha mba tsy ho azon’ny fakampanahy ianareo!

⁴¹Ary nihataka tamin’ny mpianany tokony ho tra-toraka i Jesoa; dia nandohalika Izy ary nivavaka

⁴²nanao hoe: — Ray ô, raha sitrakao, esory lavitra Ahy izao fijaliana izao; kanefa aoka tsy ny sitrapoko no hatao, fa ny anao.

⁴³Tamin’izay kosa nisy anjely anankiray avy tany an-danitra niseho taminy sy nankahery Azy.

⁴⁴Dia nitebiteby fadiranovana Izy, fa vao mainka nivavaka mafimafy kokoa indray. Ary nanjary toy ny ra mitete ny hatsembohany sady nipotrapotraka tamin’ny tany.

⁴⁵Nony nitsangana avy nivavaka i Jesoa, dia nankeo amin’ny mpianany, ka nahita azy ireo natory noho ny alahelo.

⁴⁶Ary hoy Izy taminy: — Nahoana no matory ianareo? Mifohaza, ka mivavaha mba tsy ho azon’ny fakampanahy ianareo!

⁴⁷Raha mbola miteny eo i Jesoa, dia indro nisy andian’olona tamy; ka ilay atao hoe Jodasy, anankiray amin’ny 12 lahy no lohalalana. Ary nanatona an’i Jesoa i Jodasy mba hanoroka Azy.

⁴⁸Fa hoy i Jesoa taminy: — O! ry Jodasy, dia fanorohana ve no anoloranao ny Zanak’olona?

⁴⁹Nahatsinjo ny zava-hitranga ireo mpianatra teo amin’i Jesoa, ka nanontany Azy hoe: — Ahoana, Tompoko, raha mba hamely amin’ny sabatra izahay?

⁵⁰Dia namely ny mpanompon’ny mpisorombe tokoa ny anankiray tamin’ireto mpianatra, ka nahafaka ny sofiny havanana[168].

⁵¹Fa niteny i Jesoa nanao hoe: — Aoka izay! Dia nikasika ny sofin-dralehilahy Izy, ka nanasitrana azy.

⁵²Ary izao no tenin’i Jesoa tamin’ny lohandoha-mpisorona sy ny lehiben’ny mpiambina ny tempoly mbamin’ny loholona tonga teo hisambotra Azy: — Toy ny hisambotra jiolahy izato fiavinareo mirongo sabatra sy kibay.

⁵³Teo aminareo isan’andro Aho tao an-kianjan’ny tempoly kanefa tsy nikasi-tanana Ahy ianareo; fa izao no ora voatendry ho anareo sy hanamparan’ny maizina ny fahefàny.

⁵⁴Dia nosamborin-dry zareo i Jesoa ary nentiny ka nampidiriny tao amin’ny tranon’ny mpisorombe. I Petera izany nanjohy lavidavitra teny ihany.

⁵⁵Namelona afo teo afovoan-tokotany ny mpiasa ary namindro; dia mba namindro niaraka taminy teo koa i Petera.

⁵⁶Teo amin’ny mazavazava izy no nitoetra, hany ka tsikaritry ny vehivavy mpiasa anankiray sy nodinidinihiny ary nataony hoe: — Ity rangahy ity koa niaraka taminy!

⁵⁷Fa nandà i Petera nanao hoe: — Tsy mahalala Azy aho, ramatoa!

⁵⁸Nony afaka kelikely, dia nisy lehilahy indray nahatsikaritra azy ka nanao hoe: — Ianao koa anisan’ireny! Fa hoy i Petera: — Tsy anisany aho, andriamatoa!

⁵⁹Ary tokony ho adiny iray taoriana, nisy lehilahy hafa koa nanizingizina hoe: — Tena niaraka tamin’io mihitsy ity rangahy ity sady Galileanina rahateo.

⁶⁰Fa hoy i Petera: — Tsy fantatro izay lazainao, andriamatoa! Niaraka tamin’izay, raha mbola niteny i Petera, dia nisy akoho naneno.

⁶¹Ary nitodika nijery an’i Petera ny Tompo ka tsaroan’i Petera ny tenin’ny Tompo fony Izy nilaza taminy hoe: «Alohan’ny maneno akoho anio, dia handà Ahy intelo ianao[169].»

⁶²Dia lasa nankany ivelany i Petera ka nitomany fatratra.

⁶³Dia nesoin’ireo mpiambina Azy i Jesoa sady nokapohiny;

⁶⁴ary nony avy nosaronany tava, dia nanontaniany hoe: — Vinanio hoe izay namely Anao teo?

⁶⁵Ary maro koa ny teny hafa nanevatevany Azy.

⁶⁶Nony maraina ny andro, dia nivory ny loholom-bahoaka sy ny lohandoha-mpisorona mbamin’ny mpahay lalàna; ary nasain-dry zareo nentina i Jesoa hiatrika ny Fitsarana ambony teo anoloany.

⁶⁷Ka hoy ireo taminy: — Lazao aminay raha Ianao no ilay Mesia! Dia novalian’i Jesoa hoe: — Raha hilaza aminareo Aho, tsy hinoanareo akory;

⁶⁸raha hanontany Aho, tsy hovalianareo akory.

⁶⁹Tsy ho ela intsony anefa ny Zanak’olona dia hipetraka eo ankavanan’ilay Andriamanitra mahery[170].

⁷⁰Ary hoy izy rehetra hoe: — Koa Ianao ve izany no ilay Zanak’Andriamanitra? Dia novalian’i Jesoa hoe: — Voalazanareo fa Izaho no Izy.

⁷¹Ka hoy ry zareo: — Inona indray no ilàntsika vavolombelona? Ny tenantsika no efa nandre tamin’ny vavany.