Read Dikateny Iombonana Eto Madagasikara Lioka 23 Bible Online

Lioka 23 - Dikateny Iombonana Eto Madagasikara bible

Lioka 23

¹Dia indray nitsangana ny mpivory ka nitondra an’i Jesoa tany amin’i Pilato,

²ary nanomboka niampanga Azy nanao hoe: — Ity olona ity hitanay manakorontana ny firenenay sy mandrara tsy handoa hetra amin’ny amperôra rômanina ary mihambo ny tenany ho Mesia mpanjaka.

³Fa i Pilato kosa nanontany an’i Jesoa hoe: — Ianao ve no Mpanjakan’ny Jiosy? Dia novaliany hoe: — Anao izany teny izany!

⁴Ka hoy i Pilato tamin’ny lohandoha-mpisorona sy ny vahoaka: — Tsy ahitako heloka na iray aza ity Lehilahy ity!

⁵Fa vao mainka nandentika ry zareo nanao hoe: — Mampiodina ny vahoaka eran’i Jodea manontolo Izy amin’ny fampianarana ataony, hatrany Galilea izay nanombohany ka hatratỳ.

⁶Vao ren’i Pilato izany, dia nanontaniany raha Galileanina tokoa ralehilahy.

⁷Nony fantany fa avy amin’ny tany fehezin’i Herôda i Jesoa, dia nalefany any amin’i Herôda izay tao Jerosalema koa tamin’izany andro izany.

⁸Faly dia faly erỳ i Herôda nahita an’i Jesoa, satria efa hatry ny ela no nandre ny lazany sy naniry hihaona aminy[171]; ary nanantena izy fa hahita Azy hanao famantarana.

⁹Nanaovan’i Herôda fanontaniana maro i Jesoa, fa tsy namaly na teny indraim-bava aza.

¹⁰Eo izany ireo lohandoha-mpisorona sy ireo mpahay lalàna tsy sasatra miampanga Azy.

¹¹Dia notebahin’i Herôda sy ny miaramilany Izy ka nesoiny sady nampiakanjoiny akanjo mamirapiratra, vao naveriny tany amin’i Pilato.

¹²Tamin’izay andro izay dia nanjary nihavana i Herôda sy i Pilato izay nifandrafy iny teo aloha.

¹³Novorîn’i Pilato ny lohandoha-mpisorona sy ny manampahefana jiosy ary ny vahoaka,

¹⁴dia nilazany hoe: — Nentinareo tatỳ amiko io Lehilahy io fa hoe nampiodina ny vahoaka; izaho efa nanadina Azy teo anatrehanareo, saingy tsy nahitako heloka na iray aza io Lehilahy io tamin’izay niampanganareo Azy.

¹⁵I Herôda koa tsy nahita heloka taminy, fa namerina Azy ho atỳ amintsika. Miharihary fa tsy misy na inona na inona nataony tokony hanamelohana Azy ho faty;

¹⁶noho izany, hasaiko hokapohina Izy dia halefako. [

¹⁷Fa isaky ny fankalazana ny Paska i Pilato dia tsy maintsy mandefa mpifatotra anankiray ho azy ireo[172].]

¹⁸Kanjo indray nihoraka izy rehetra nanao hoe: — Vonoy io, fa i Barabasy alefa ho anay.

¹⁹(Fa ity Barabasy ity dia anisan’ny nanao fikomiana tao an-tanàna sady nahafaty olona, ka natao am-ponja.)

²⁰Dia mbola niteny ihany i Pilato satria te handefa an’i Jesoa.

²¹Kanefa niantsoantso mafy ny vahoaka nanao hoe: — Homboy, homboy amin’ny hazofijaliana io!

²²Dia niteny fanintelony indray i Pilato nanao hoe: — Inona àry no ratsy nataony? Tsy hitako velively izay heloka tokony hahafaty Azy; noho izany, hasaiko hokapohina Izy dia halefako.

²³Fa nikiry niantsoantso mafy ny vahoaka nitaky ny hanombohana an’i Jesoa amin’ny hazofijaliana, ary nandresy ny horakoraka nataony.

²⁴Dia namoaka didim-pitsarana i Pilato nampanao izay notakîny.

²⁵Ilay natao am-ponja satria nanao fikomiana sady nahafaty olona moa nalefany araka ny notakîn-dry zareo, fa i Jesoa kosa natolony azy hanaovany izay sitrapony.

²⁶Ary raha nitondra an’i Jesoa hovonoina ireo miaramila, dia sendra an’i Simôna lehilahy sireneanina nody avy tany an-tsaha; notanany ralehilahy ka notereny hankeo aorian’i Jesoa, hanampy Azy hitondra ny hazofijaliana.

²⁷Vahoaka betsaka no nanaraka an’i Jesoa ary anisan’izany vehivavy maro izay nandona tratra sady nitomany Azy.

²⁸Nitodika azy ireto i Jesoa ka nanao hoe: — Ry vehivavy eto Jerosalema, aoka izay ny fitomaniana Ahy, fa ny tenanareo sy ny zanakareo itomaniana!

²⁹Eny, ho avy ny andro hilazana hoe: «Sambatra ny vehivavy momba, tsy niteraka sady tsy nampinono!»

³⁰Amin’izay ny tendrombohitra hilazan’ny olona hoe: «Ianjerao izahay»; ary ny havoana hilazany hoe: «Saròny izahay[173]!»

³¹Fa raha izao no hatao amin’ny hazo maitso, inona no hihatra amin’ny hazo maina?

³²Ary nisy koa olon-dratsy roa lahy nentina hiara-kovonoina amin’i Jesoa.

³³Rehefa tonga tany amin’ny toerana atao hoe Ikarandoha, dia nohomboana tamin’ny hazofijaliana i Jesoa mbamin’ireo olon-dratsy[174], ka ny iray teo ankavanany, ny iray teo ankaviany.

³⁴Ary i Jesoa namerimberina hoe: — Ray ô, avelao ny helony fa tsy fantany izay ataony! Dia nifampizaràn’ireo miaramila ny fitafian’i Jesoa ka nanaovany loka[175].

³⁵Ny vahoaka tamin’izany nijanona teo nijery. Ny manampahefana jiosy kosa nandatsa[176] nanao hoe: — Namonjy olon-kafa Izy, ka aoka hamonjy ny tenany, raha Izy tokoa no ilay Mesia avy amin’Andriamanitra!

³⁶Ny miaramila koa naneso an’i Jesoa ka nanatona hanome vinaingitra[177] Azy

³⁷sady niteny hoe: — Raha Ianao tokoa no Mpanjakan’ny Jiosy, vonjeo ny tenanao!

³⁸Ary teo ambonin’ny lohan’i Jesoa dia nasiana soratra hoe: «Ity no Mpanjakan’ny Jiosy!»

³⁹Ny anankiray tamin’ireo olon-dratsy nihantona teo dia nanevateva Azy ka nanao hoe: — Tsy Ianao tokoa ve no ilay Mesia? Vonjeo ny tenanao ary vonjeo koa izahay.

⁴⁰Fa niteny azy mafy kosa ilay faharoa nanao hoe: — Tsy matahotra an’Andriamanitra mihitsy ve ianao, na dia voaheloka miaraka amin’ity olona ity aza?

⁴¹Ny antsika roa lahy dia rariny izao, satria valin’ny natao no raisina; fa ny Azy kosa, tsy mba nisy ratsy nataony na inona na inona.

⁴²Dia izao no naverimberiny: — Jesoa ô, mba tsarovy aho rahatrizay ho avy indray Ianao amin’ny maha Mpanjaka Anao.

⁴³Ka hoy i Jesoa taminy: — Lazaiko marina aminao fa anio ihany dia ho tafaraka amiko any am-paradisa ianao.

⁴⁴Tamin’ny mitataovovonana teo ho eo, dia takona ny masoandro ka rakotra haizina ny faritany manontolo ary naharitra hatramin’ny telo tolakandro izany. Nitriatra nizara roa kosa ny efitra lamba tao amin’ny Toeramasina[178] tao an-tempoly.

⁴⁵

⁴⁶Ary niantso tamin’ny feo mahery i Jesoa nanao hoe: — Ray ô, apetrako eo am-pelatananao ny aiko[179]! Avy nilaza izany Izy, dia niala aina.

⁴⁷Nahita ny zava-nitranga ilay kapiteny rômanina ka nanome voninahitra an’Andriamanitra sady niteny hoe: — Tena olo-marina tokoa io Lehilahy io!

⁴⁸Ary ny vahoaka rehetra vory teo mba hizaha dia nanatri-maso ny zava-nitranga, ka lasa niverina nandondòn-tratra noho ny alahelo.

⁴⁹Fa ny olom-pantatr’i Jesoa rehetra mbamin’ireo vehivavy nanaraka Azy hatrany Galilea kosa nijanona teny lavidavitra teny[180] ka nahita izany.

⁵⁰Ary indro nisy lehilahy atao hoe Jôsefa, avy any Harimatia[181] tanàna ao Jodea. Olona tsara fanahy sady marina ary fatra-piandry ny Fanjakàn’Andriamanitra izany lehilahy izany, anisan’ny mpitsara ambony amin’ny Jiosy saingy tsy mba niombon-kevitra sy tetika tamin’ireo namany.

⁵¹

⁵²Nanatona an’i Pilato izy nangataka ny vatan’i Jesoa.

⁵³Dia nampidinin’i Jôsefa avy teo amin’ny hazofijaliana ny vatan’i Jesoa, nofonosiny lamba sarobidy, ary napetrany tao amin’ny fasana nolavahana tamin’ny vatolampy, mbola tsy nandevenana olona.

⁵⁴Zoma hariva fiomanana tamin’izay ary efa hanomboka ny sabata.

⁵⁵Ireo vehivavy nomba an’i Jesoa hatrany Galilea dia niaraka tamin’i Jôsefa, ka nandinika ny fasana sy ny fomba nametrahana ny vatan’i Jesoa.

⁵⁶Avy eo dia nody izy ireo ary nanomana zava-manitra sy ilomanitra, fa tamin’ny sabata dia niala sasatra araka ny lalàna[182].