Read Dikateny Iombonana Eto Madagasikara Lioka 6 Bible Online

Lioka 6 - Dikateny Iombonana Eto Madagasikara bible

Lioka 6

¹Indray sabata[55], ry i Jesoa dia nandeha namaky tanimbary. Nioty salohim-bary ireto mpianany ary nikosoka tamin’ny tanany, dia nihinana.

²Fa hoy kosa ny Farisianina sasany hoe: — Nahoana ianareo no manao zavatra tsy fanao amin’ny andro sabata[56]?

³Fa novalian’i Jesoa hoe: — Tsy novakînareo tao amin’ny Soratra Masina ve izay nataon’i Davida, raha noana izy mbamin’ireo olona niaraka taminy?

⁴Niditra tao an-tranon’Andriamanitra izy ka ny mofo apetraka eo anatrehan’Andriamanitra no nakany hohanina, ary dia nomeny koa ireo olona niaraka taminy; kanefa izany mofo[57] izany, tsy azon’iza na iza hanina afa-tsy ny mpisorona irery ihany.

⁵Ary hoy koa i Jesoa tamin’ny Farisianina: — Ananan’ny Zanak’olona fahefana ny sabata!

⁶Indray sabata hafa koa, dia niditra tao amin’ny sinagôga i Jesoa ka nampianatra. Nisy lehilahy maty tanana ankavanana tao;

⁷ary nizaha taratra an’i Jesoa ireo mpahay lalàna sy Farisianina raha hanasitrana amin’ny andro sabata Izy mba hahitany antony hiampangana Azy.

⁸Fantatr’i Jesoa anefa ny eritreriny, ka hoy Izy tamin-dralehilahy maty tanana: — Mitsangàna ka ndeha mijoro etsy afovoan’ny olona. Dia nitsangana ilay marary ka nijoro.

⁹Ary niteny tamin’ny mpahay lalàna sy ny Farisianina i Jesoa hoe: — Manontany anareo Aho: inona moa no azo atao amin’ny andro sabata, ny manao soa sa ny manao ratsy? ny mamonjy ain’olona sa ny manala ain’olona?

¹⁰Dia nanopy maso manodidina nijery azy rehetra i Jesoa ka niteny tamin-dralehilahy hoe[58]: — Atsory ny tananao. Dia natsotran’ilay marary ny tanany ka sitrana.

¹¹Fa romotry ny hatezerana kosa ireo mpahay lalàna sy Farisianina ka niara-nioko ny amin’izay hanaovany an’i Jesoa.

¹²Ary tamin’izany andro izany dia lasa nankany an-tendrombohitra i Jesoa mba hivavaka, ary naharitra nivavaka tamin’Andriamanitra nandritra ny alina.

¹³Nony maraina, nantsoiny ny mpianany ka nifidianany 12 lahy izay nomeny anarana hoe apôstôly:

¹⁴dia i Simôna, izay nomeny anarana koa hoe Petera, sy i Andrea rahalahiny; i Jakôba sy i Jôhany, i Filipo, i Bartôlômeo,

¹⁵i Matio, i Tômà, i Jakôba zanak’i Halfeo[59], i Simôna atao hoe Zelôta,

¹⁶i Jodasy zanak’i Jakôba[60], ary i Jodasy Iskariôta ilay tonga mpamadika.

¹⁷Dia niara-nidina tamin’ny 12 lahy i Jesoa ho eny an-tany lemaka. Mpianany maro sy vahoaka betsaka avy any Jodea[61] lafy valo sy Jerosalema ary ny morontsirak’i Tiro sy i Sidôna

¹⁸no tonga teo mba hihaino Azy sy hositraniny amin’ny aretiny; ka izay nampahorîn’ny fanahy maloto dia sitrana.

¹⁹Ary notadiavin’ny vahoaka rehetra hokasihina i Jesoa satria nisy hery niala taminy ka nahasitrana azy rehetra.

²⁰Dia nanopy maso ny mpianany i Jesoa ka nanao hoe: — Sambatra ianareo mahantra, fa anareo ny Fanjakàn’Andriamanitra!

²¹Sambatra ianareo noana ankehitriny, fa hovokisan’Andriamanitra! Sambatra ianareo mitomany ankehitriny, fa hampifalîn’Andriamanitra!

²²Sambatra ianareo raha halan’ny olona sy roahiny ary tevatevainy sy alàny baràka noho ianareo miandany amin’ny Zanak’olona.

²³Aoka hifaly ianareo amin’ny andro hisehoan’izany ary aoka hibita-karavoana, satria valisoa lehibe no miandry anareo any an-danitra. Fa toy izany indrindra no nataon’ny razan-dry zareo tamin’ny mpaminanin’Andriamanitra[62].

²⁴— Mampalahelo kosa ianareo mpanana, fa efa azonareo ny fahafaham-po! Mampalahelo ianareo voky ankehitriny, fa mbola ho noana!

²⁵Mampalahelo ianareo mihomehy ankehitriny, fa mbola higogogogo hitomany!

²⁶Mampalahelo ianareo raha ataon’ny olona tsara laza. Fa toy izany indrindra no nataon’ny razan-dry zareo tamin’ny mpaminany sandoka!

²⁷— Izao anefa no lazaiko aminareo mpihaino: Tiavo ny fahavalonareo, manasoava ny mpankahala anareo,

²⁸miraria soa ho an’izay manozona anareo.

²⁹Izay mamely anao amin’ny takolaka iray, tolory koa ny ilany; ary izay maka ny lambanao, avelao koa haka ny akanjonao.

³⁰Omeo izay rehetra mangataka aminao ary aza itakiana izay maka ny anao.

³¹Izay tianareo hataon’ny olona aminareo no mba ataovy aminy koa[63].

³²Raha ny manam-pitiavana anareo ihany no tiavinareo, inona no mba sitraka manokana mendrika anareo? Ny mpanota koa mba tia izay manam-pitiavana azy!

³³Ary raha ny manasoa anareo ihany no soavinareo, inona no mba sitraka manokana mendrika anareo? Ny mpanota koa mba manao toy izany.

³⁴Ary raha ny antenain-kamerina ihany no ampisamborinareo, inona no mba sitraka manokana mendrika anareo? Ny mpanota koa mba mifampisambotra hahazoana takalony.

³⁵Fa ianareo kosa, tiavo ny fahavalonareo, manasoava azy ary mampisambora tsy manantena valiny, dia ho lehibe ny valisoa miandry anareo; ary ianareo ho zanaky ny Avo indrindra, dia Ilay mora fo amin’ny tsy mahay mankasitraka sy ny ratsy fanahy.

³⁶Tsara fo ilay Rainareo: noho izany, aoka ianareo ho tsara fo tahaka Azy koa[64]!

³⁷— Aza mitsara olona, dia tsy hotsarain’Andriamanitra ianareo; aza manameloka olona, dia tsy hohelohin’Andriamanitra ianareo; mamelà, dia havelan’Andriamanitra ianareo;

³⁸manomeza, dia homen’Andriamanitra ianareo; fatra tsara, mihintsana, mifatratra sy avo loha no haidina amin’ny kitaponareo fa izay fomba hamaranareo ho an’ny olona ihany no mba hamaran’Andriamanitra ho anareo koa.

³⁹Mbola nilazan’i Jesoa fanoharana koa ireo mpihaino nataony hoe: — Jamba ve mahatantana jamba? Tsy hifamarina an-kady ve ny jamba mifampitantana?

⁴⁰Mpianatra tsy mihoatra mpampianatra, fa izay mpianatra tonga lafatra no toy ny mpampianatra azy.

⁴¹— Nahoana moa ianao no mahita tapak’ahitra eo amin’ny mason-kavana, nefa ny vatan-kazo eo amin’ny masonao tsy tandrinao akory?

⁴²Ahoana no hahafahanao milaza amin-kavana hoe: «Etsy, rahavako, hoesoriko ny tapak’ahitra amin’ny masonao», nefa ny vatan-kazo amin’ny masonao tsy hitanao akory? Ry mpihatsaravelatsihy, esory aloha ny vatan-kazo amin’ny masonao, izay ianao vao hahiratra tsara ka hanaisotra ny tapak’ahitra amin’ny mason-kavana.

⁴³— Tsy mba hazo tsara no hamoa voa ratsy, na hazo ratsy indray no hamoa voa tsara.

⁴⁴Eny, ny voany no ahafantarana ny hazo isan-karazany; fa foto-tsilo tsy ahazoana voanaviavy, ary foto-droy tsy iotazana voaloboka.

⁴⁵Koa ny olona tsara fanahy dia mamoaka zavatra tsara avy amin’ny rakitra tsaran’ny fony; ary ny olona ratsy fanahy kosa mamoaka zavatra ratsy avy amin’ny rakitra ratsin’ny fony. Fa izay mameno ny fon’ny olona no aloaky ny vavany.

⁴⁶— Ahoana no iantsoanareo Ahy hoe: «Tompo ô! Tompo ô!» nefa tsy tanterahinareo akory izay lazaiko?

⁴⁷Izay rehetra manatona Ahy ka mihaino ny teniko sady manatanteraka, dia hasehoko anareo ny mety hampitahana azy:

⁴⁸tahaka ny olona manorin-trano ka nihady lalina ary nandatsaka ny fototra am-batolampy; nony tondraka ny rano, dia notonafan’ny riaka ilay trano nefa tsy nihontsona noho izy tsara orina.

⁴⁹Fa izay mihaino ihany kosa nefa tsy manatanteraka, dia tahaka ny olona manorin-trano amin’izao tsy misy fototra; raha vao notonafan’ny riaka ilay trano, dia nirodana avy hatrany ka rava tanteraka.