Read Dikateny Iombonana Eto Madagasikara Deoterônômy 14 Bible Online

Deoterônômy 14 - Dikateny Iombonana Eto Madagasikara bible

Deoterônômy 14

¹Zanak’ilay TOMPO Andriamanitrareo ianareo, koa aza mitetika ny tenanareo na manaratra ny volon-doha eo ambonin’ny handrinareo noho ny amin’ny maty.

²Ianareo manko dia vahoaka voatokana ho an’ny TOMPO Andriamanitrareo; ianareo no efa nofidiny tamin’ny firenena rehetra ambonin’ny tany mba ho vahoaka fananany sarobidy indrindra[93].

³Aza mihinan-javatra[94] maloto na inona na inona.

⁴Izao no biby ho fihinanareo: ny omby, ny ondry aman’osy,

⁵ny diera, ny gazela, ny kapreôla, ny osidia, ny ombimanga, ny antilopa ary ny ropikapra;

⁶izany hoe ny biby rehetra mivaky kitro sady mandinika.

⁷Kanefa ny biby mandinika fotsiny na mivaky kitro fotsiny dia tsy hohaninareo, fa maloto aminareo ireny, ohatra: ny rameva sy ny bitro ary ny hiràka[95], satria mandinika ihany ireo saingy tsy mba mivaky kitro;

⁸ary ny kisoa koa, satria mivaky kitro ihany izy saingy tsy mba mandinika. Koa aza haninareo ny henan’ireo biby ireo ary aza kasihinareo akory ny fatiny.

⁹Amin’ny biby rehetra ao anaty rano dia izao no ho fihinanareo: ny biby rehetra misy vombony sy kirany.

¹⁰Tsy ho fihinanareo kosa izay tsy misy vombony na kirany, fa ho maloto aminareo.

¹¹Ny vorona madio rehetra dia ho fihinanareo.

¹²Kanefa ireto kosa no vorona tsy fihinanareo: ny voromahery sy ankoay isan-karazany;

¹³ny fanindry sy papango isan-karazany;

¹⁴ny goaika isan-karazany;

¹⁵ny vorombe, ny tararaka, ny vorondriaka, ny hitsikitsika isan-karazany,

¹⁶ny vorondolo, ny vorondolobe, ny gisabe,

¹⁷ny sama, ny arosy, ny manàrana,

¹⁸ny takatra, ny vano isan-karazany, ny takodara ary ny ramanavy.

¹⁹Ny bibikely rehetra manana elatra dia ho maloto aminareo ka tsy ho fihinanareo,

²⁰afa-tsy ny bibikely manana elatra saingy madio[96].

²¹Aza mihinam-biby maty ho azy fa omeo ho an’ny vahiny izay ao an-tanànanareo izany mba hohaniny, na amidio amin’ny olona hafa firenena. Ianareo manko dia vahoaka voatokana ho an’ny TOMPO Andriamanitrareo. Aza mahandro zanak’osy amin’ny rononon-dreniny[97].

²²Havahanareo ny ampahafolon’ny vokatra rehetra avy amin’ny voa nafafinareo, izany hoe ny vokatry ny sahanareo isan-taona.

²³Dia eo anoloan’ny Toeramasin’ny TOMPO Andriamanitrareo, eo amin’ny toerana izay hofidiny mba hipetrahan’ny voninahiny, no hihinananareo ny ampahafolon’ny vary sy divay ary menaka vokatry ny taninareo, ary koa hihinananareo ny voalohan-teraky ny omby sy ondry aman’osinareo[98]. Izany no hianaranareo hanaja mandrakariva ny TOMPO Andriamanitrareo.

²⁴Rehefa notahin’ny TOMPO Andriamanitrareo tamin’ny famokarana ianareo, dia mety tsy hahazaka ny ampahafolon-bokatrareo hankany amin’ny toerana izay hofidiny mba hipetrahan’ny voninahiny, satria lavitra loatra ho anareo ny lalan-kaleha.

²⁵Amin’izay, dia hamidinareo ny ampahafolom-bokatrareo, ka ny vola vidiny no hataonareo tsara fihina mankany amin’ny toerana izay hofidin’ny TOMPO Andriamanitrareo.

²⁶Io vola io no hividiananareo izay sakafo rehetra irinareo, na omby na ondry na osy na divay na zava-pisotro hafa misy alikaola; eny, hovidinareo avokoa izay rehetra tianareo, dia eo anoloan’ny Toeramasin’ny TOMPO Andriamanitrareo no hihinana izany an-kafaliana ianareo mbamin’ny ankohonanareo.

²⁷Aza ataonareo tsirambina ny Levita izay ao an-tanànanareo, satria tsy mba manana zaratany na anjara miaraka aminareo ny Levita.

²⁸Isan-telo taona, dia havahanareo ny ampahafolon’ny vokatra rehetra azonareo amin’izany taona izany, ka hatobinareo ao an-tanànanareo.

²⁹Ary ho avy hizaràna an’izany ny Levita (izay tsy manana zaratany na anjara miaraka aminareo) sy ny vahiny ary ny kamboty mbamin’ny mpitondratena izay eo an-tanànanareo; dia hihinana ireo ka ho voky, mba hitahian’ny TOMPO Andriamanitrareo anareo amin’ny asa rehetra izay ataonareo.