Read Dikateny Iombonana Eto Madagasikara Deoterônômy 15 Bible Online

Deoterônômy 15 - Dikateny Iombonana Eto Madagasikara bible

Deoterônômy 15

¹Isaky ny fito taona dia hanao famoizan-trosa ianareo,

²ka izao no fomba hampiharana izany: ianareo tompon-trosa rehetra, izay nampisambo-bola ny namany, dia hamoy izany, rehefa natao antso avo ny taona famoizan-trosa ho fanajana ny TOMPO; tsy hoterenareo hamerin-trosa ilay namana mpiray tanindrazana aminareo.

³Ny olona hafa firenena ihany no azonareo terena hamerin-trosa; fa izay trosanareo amin’ny mpiray firenena aminareo kosa dia hafoinareo.

⁴Kanefa tsy hisy mahantra eo aminareo, satria hotahîn’ny TOMPO tokoa ianareo, any amin’ny tany izay homen’ny TOMPO Andriamanitrareo ho fanananareo,

⁵raha henoinareo tsara ny feony ka imasoanareo hotanterahina manontolo izao didy ampitaiko aminareo anio izao.

⁶Eny, hotahîn’ny TOMPO Andriamanitrareo ianareo, araka izay nampanantenainy anareo; ka ianareo tsy mba hisy hisambo-bola fa firenena maro kosa no hampisamborinareo vola; firenena maro no hofehezinareo, fa ianareo kosa tsy mba hofeheziny.

⁷Raha sendra misy mahantra ny mpiray firenena aminareo ao an-tanàna anankiray amin’ny tany izay omen’ny TOMPO Andriamanitrareo anareo, dia aza anidianareo fo izy na anakombonanareo tanana;

⁸fa sokafy tsara amin’io mahantra mpiray firenena aminareo io ny tananareo, ka ampisambory azy ny sahaza ilainy, araka izay mahory azy[99].

⁹Tandremo fandrao mitsiry ao am-ponareo ny hevi-dratsy manao hoe: «Antomotra ity ny taona fahafito, dia ny taona famoizan-trosa.» Aoka ianareo tsy ho ratsy fijery an’ilay mahantra mpiray firenena aminareo, ka tsy hanome azy na inona na inona; fa hitaraina amin’ny TOMPO hiampanga anareo izy, ka dia ho fahotanareo izany.

¹⁰Omeo tokoa izy ary aoka tsy halahelo ny fonareo raha manome azy, satria izany fahalalahan-tananareo izany no hitahian’ny TOMPO Andriamanitrareo anareo amin’ny asa aman-draharaha rehetra ataonareo.

¹¹Koa satria hisy mandrakariva ny mahantra eo amin’ny taninareo[100], dia izany no andidiako anareo hoe: Sokafy tsara amin’ny mpiray firenena aminareo ny tananareo, dia amin’ny ory sy mahantra eo amin’ny taninareo.

¹²Raha sendra misy mitolo-tena ho mpanomponareo ny lehilahy na vehivavy hebreo mpiray firenena aminareo[101], dia hanompo anareo enin-taona izy; amin’ny taona fahafito kosa hovotsoranareo ho afaka izy.

¹³Rehefa hovotsoranareo ho afaka izy, dia tsy havelanareo handeha fotsiny;

¹⁴fa hisy hampitondrainareo azy avy amin’ny ondry aman’osinareo ary avy amin’ny vary aman-divainareo: izay efa nitahian’ny TOMPO Andriamanitrareo anareo no hanomezanareo azy.

¹⁵Tsarovy fa nandevozina tany Ejipta ianareo, saingy efa nanafaka anareo ilay TOMPO Andriamanitrareo; koa izany no anomezako anareo anio izao didy izao.

¹⁶Kanefa mety milaza aminareo io mpanomponareo io fa tsy hiala aminareo, satria tiany ianareo mianakavy ka finaritra izy miaraka aminareo;

¹⁷amin’izay, dia alaovy ny fitevika ka teveho amin’ny varavarana ny sofiny; dia ho mpanomponareo mandra-maty izy. Toy izany koa no hataonareo raha misy mpanompovavy tsy te hiala aminareo.

¹⁸Aoka tsy ho mafy aminareo ny hamotsotra ny mpanomponareo ho afaka, satria nahazoanareo avo sasaka mihoatra noho izay vitan’ny mpikarama ny nanompoany anareo enin-taona. Eny, votsory izy, dia hotahîn’ny TOMPO Andriamanitrareo ianareo amin’izay rehetra ataonareo[102].

¹⁹Ny lahy rehetra amin’ny voalohan-teraky ny ombinareo sy ny ondry aman’osinareo dia hatokanareo ho an’ny TOMPO Andriamanitrareo[103]; aza mampiasa ny voalohan-teraky ny ombinareo, na manety ny voalohan-teraky ny ondry aman’osinareo.

²⁰Isan-taona isan-taona dia eo anoloan’ny Toeramasin’ny TOMPO Andriamanitrareo, ao amin’ny toerana izay hofidin’ny TOMPO Andriamanitrareo, no hihinananareo izany[104].

²¹Raha misy kilemany kosa ny voalohan-teraky ny biby fiompinareo fa mandringa na jamba na voan’ny kilema ratsy hafa, dia aza atolotra ho sorona ho an’ny TOMPO Andriamanitrareo ireny.

²²Ao an-tanànanareo ihany no hihinananareo ireny; ka samy mahazo mihinana azy na ny olona maloto ara-pivavahana na ny madio, tahaka ny ahazoany mihinana ny gazela sy ny diera.

²³Saingy ny rany no aza haninareo[105] fa araraho amin’ny tany toy ny rano.