Read Dikateny Iombonana Eto Madagasikara Deoterônômy 22 Bible Online

Deoterônômy 22 - Dikateny Iombonana Eto Madagasikara bible

Deoterônômy 22

¹Raha hitanareo mania ny omby na osy na ondrin’ny mpiray firenena aminareo, dia tsy hialanareo fotsiny izany fa hoentinareo miverin-doha any amin’ny tompony mihitsy.

²Raha tsy akaiky anareo ilay tompony na tsy fantatrareo, dia hoentinareo mody eny aminareo ny biby nania ary hitoetra eo aminareo mandra-pitadin’ny tompony azy; ka amin’izay vao haverinareo aminy.

³Toy izany koa no hataonareo amin’ny boriky na fitafiana na zavatra hafa verin’ny mpiray firenena aminareo ka hitanareo; fa tsy hialanareo fotsiny izany.

⁴Raha hitanareo potraka eny an-dalana ny boriky na ombin’ny mpiray firenena aminareo, dia tsy hialanareo fotsiny izany fa hampianareo hanarina azy ny tompony[139].

⁵Aoka ny vehivavy tsy hitafy ny fitafian-dehilahy, ary aoka ny lehilahy tsy hitafy ny fitafiam-behivavy; fa zavatra mahatsiravina eo imason’ny TOMPO Andriamanitrareo ny fanaovana izany.

⁶Raha sendra mahita akanim-borona eo anoloanareo eny an-dalana ianareo, na ambony hazo na amy tany, ka misy vorona efa foy ombàn-dreniny na atody mbola kotrehiny, dia aoka ny zanany tsy halainareo miaraka amin’ny reniny.

⁷Halefanareo mihitsy ny reniny fa ny zanany ihany no halainareo ho anareo, mba hahita soa sy ho maro andro ianareo.

⁸Raha manao trano vaovao ianareo, dia hasianareo aro-fanina manodidina ny tampon-tranonareo; fandrao hisy olona hianjera avy eny ka tsy ny tranonareo no hizaka ny andraikitra amin’ny fahafatesan’ilay olona.

⁹Aza amafazana voan-javatra hafa karazana ny tanimboalobokareo, fandrao samy hanjary voatokana ho an’Andriamanitra na ny vokatry ny voan-javatra nafafinareo na ny vokatry ny tanimboalobokareo.

¹⁰Aza mampikambana omby sy boriky hiasa tany anareo;

¹¹aza mitafy lamba volon’ondry izay rongony ny fahany[140].

¹²Hasianareo sahondrany ny zorony efatra amin’ny lamba firakofanareo[141].

¹³Mety hisy lehilahy mampaka-bady ary miray aminy. Avy eo dia tsy tiany indray ravehivavy,

¹⁴ka haratsiany sy alàny baràka hoe: «Efa nampakatra ity vehivavy ity aho; kanefa tsy nahita ny famantarana maha virijiny azy aho nony niray taminy.»

¹⁵Dia halain’ny ray aman-drenin-drazazavavy ny famantarana maha virijiny azy ka hoentiny amin’ny fitsarana, eo anoloan’ny loholon’ny tanàna[142].

¹⁶Ary hiteny amin’ny loholona ny rain-drazazavavy hoe: «Nomeko ho vadin’io lehilahy io ny zanako vavy; avy eo dia tsy tiany indray izy,

¹⁷ka noharatsîny tamiko hoe tsy nahitany ny famantarana maha virijiny azy. Nefa indreto ny famantarana maha virijiny ny zanako vavy.» Dia hovelarin’ny ray aman-drenin-drazazavavy eo anatrehan’ny loholon’ny tanàna ilay lamba nandriany tamin’ny alin’ny fampakarana azy.

¹⁸Ary hosamborin’ny loholona izany lehilahy izany ka hofaiziny.

¹⁹Hosazîna sekela volafotsy zato koa ralehilahy, ka homeny ny rain-drazazavavy izany, satria nahafa-baràka tovovavy israelita anankiray izy; nefa dia ho vadiny ihany razazavavy ka tsy azony ariana amin’ny andro rehetra hiainany.

²⁰Fa raha marina kosa ny lazain-dralehilahy ka tsy hita ny famantarana maha virijiny an-drazazavavy,

²¹dia hoentina hankeo anoloan’ny varavaran’ny tranon-drainy razazavavy ka hitora-bato azy ho faty ny mponina ao an-tanànany; zava-pady tokoa teo amin’i Israely manko no nataony, raha nijangajanga fony izy mbola tao an-tranon-drainy. Izany no hanesoranareo ny fanao ratsy ho fongotra eo aminareo.

²²Raha misy lehilahy azo miray amim-behivavy vadin’olona, dia samy hatao maty izy roroa, na ralehilahy izay niray tamin-dravehivavy na ravehivavy koa. Izany no hanesoranareo ny fanao ratsy ho fongotra eo aminareo.

²³Raha misy tovovavy virijiny efa fofombadin’olona ka eo an-tanàna izy no hitan-dehilahy anankiray sy iraisany,

²⁴dia hoentinareo hankeo am-bavahadin’izany tanàna izany izy roroa[143], ka hotorahanareo vato ho faty: ravehivavy moa, satria tsy niantso vonjy nefa tao an-tanàna ihany; ary ralehilahy koa, satria niray tamin’ny vadin’ny namany. Izany no hanesoranareo ny fanao ratsy ho fongotra eo aminareo.

²⁵Fa raha any an-tsaha kosa ralehilahy no mahita an’ilay tovovavy fofombadin’olona ka misavika azy sy miray aminy, dia ralehilahy izay niray taminy ihany no hatao maty.

²⁶Fa razazavavy tsy hasianareo na inona na inona, satria tsy misy ota tokony hahafaty azy. (Mitovy amin’ny olona namely ny namany ka nahafaty azy manko izany toe-javatra izany).

²⁷Eny, tany an-tsaha no nahitan’io lehilahy io an-drazazavavy; ary niantso vonjy ihany ilay tovovavy fofombadin’olona, saingy tsy nisy namonjy azy.

²⁸Raha misy lehilahy mahita tovovavy tsy mbola fofombadin’olona ka misavika azy sy miray aminy, ary tratra manao izany izy roroa,

²⁹dia hanome sekela volafotsy dimampolo ho an’ny rain-drazazavavy io lehilahy io; ary satria efa nanaovany an-keriny ilay tovovavy, dia hovadiny izy ary tsy ho azony ariana amin’ny andro rehetra hiainany[144].