Read Dikateny Iombonana Eto Madagasikara Deoterônômy 23 Bible Online

Deoterônômy 23 - Dikateny Iombonana Eto Madagasikara bible

Deoterônômy 23

¹Tsy misy olona mahazo miray amin’ny vadin-drainy, fa mahavery zo aman-kasina an-drainy izany[145].

²Ny lehilahy torotoro vihina na tapaka filahiana dia tsy mahazo miditra ho anisan’ny fiangonan’ireo mpivavaka amin’ny TOMPO.

³Ny zazasary[146] dia tsy mahazo miditra ho anisan’ny fiangonan’ireo mpivavaka amin’ny TOMPO; na ny taranany fahafolo aza, dia tsy hahazo miditra ho anisan’ny fiangonan’ireo mpivavaka amin’ny TOMPO.

⁴Ny Hamônita sy ny Môabita[147] dia tsy mahazo miditra na oviana na oviana ho anisan’ny fiangonan’ireo mpivavaka amin’ny TOMPO; na ny taranany fahafolo aza, dia tsy mahazo miditra ho anisan’ny fiangonan’ireo mpivavaka amin’ny TOMPO.

⁵Tsy nitsena sakafo sy rano anareo teny an-dalana manko ny Hamônita sy ny Môabita fony ianareo niala tany Ejipta; sady ry zareo Môabita koa no nampaka an’i Balahàma, zanakalahin’i Behôra, avy tany Petôra any Mezôpôtamia, ary nanamby vola azy mba hanozona anareo.

⁶Kanefa ny TOMPO Andriamanitrareo tsy nety nihaino an’i Balahàma, fa nampody ny fanozonana ho fitahiana anareo IZY noho ny fitiavany anareo[148].

⁷Aza mitady izay hiadanan’ireo firenena ireo na izay hahasoa azy na oviana na oviana ianareo amin’ny andro rehetra hiainanareo.

⁸Aza hamavoinareo ny Edômita, satria taranaky ny mpiray tampo izy mbaminareo[149]. Aza hamavoinareo koa ny Ejiptianina, satria efa mba vahiny tany amin’ny taniny ianareo.

⁹Ny valovotak’ireo firenena roa tonta ireo, manomboka eo amin’ny taranaka fahatelo, dia hahazo miditra ho anisan’ny fiangonan’ireo mpivavaka amin’ny TOMPO.

¹⁰Raha eo am-pitobiana hanafika fahavalo ianareo, dia fadio ny zava-dratsy rehetra.

¹¹Raha eo aminareo no misy miaramila tsy madio satria nanary lahinaina tsy nahy tamin’ny alina, dia hivoaka ny toby izy ary tsy hiditra ao.

¹²Handro izy rehefa harivariva, ary mahazo miverina eo amin’ny toby indray nony tokony ho maty masoandro.

¹³Aoka hisy tany voafaritrareo any ivelan’ny toby mba ho fivoahanareo.

¹⁴Ary mitondrà fantàka miaraka amin’ny fiadianareo; ka raha hihataka hivoaka ianareo, dia io fantàka io no hihadianareo lavaka hivoahana sy hanotofanareo ny dikinareo.

¹⁵Mandeha eo afovoan’ny tobinareo ilay TOMPO Andriamanitrareo mba hiaro anareo sy hampanaiky resy ny fahavalonareo; ka dia ho faritra masina ny tobinareo, ary tsy tokony hahita zava-maharikoriko eo aminareo ny Tompo mba tsy hialany aminareo.

¹⁶Aza atolotrareo ny tompony intsony ny andevo izay mandositra mialoka eo aminareo.

¹⁷Eo aminareo no honenany, dia eo amin’ny toerana izay fidiny ao amin’ny tanànanareo mba hahafinaritra azy; fa aza mampahory azy ianareo.

¹⁸Aoka tsy hisy vehivavy na lehilahy israelita hanolo-tena hijangajanga ho fanompoan-tsampy[150].

¹⁹Aza ekena hoentina eo an-tranon’ny TOMPO Andriamanitrareo mba hanefana voady na ny tangim-behivavy janga na ny karaman’alikalahy: ireo zavatra anankiroa ireo manko dia samy zava-mahatsiravina eo imason’ny TOMPO Andriamanitrareo.

²⁰Aza mampanàna zavatra amin’ny mpiray firenena ianareo, na vola, na hanina, na zavatra hafa mety hampananàna.

²¹Ny olona hafa firenena ihany no azonareo ampananàn-javatra, fa ny mpiray firenena kosa tsy hanaovanareo izany; dia hotahîn’ny TOMPO Andriamanitrareo ianareo amin’ny zavatra rehetra hataonareo, any amin’ny tany izay efa hidiranareo mba halainareo ho fananana[151].

²²Raha mivoady hanao sorona na fanatitra amin’ny TOMPO Andriamanitrareo ianareo, dia aza ela fanefa; raha tsy izany kosa dia hanadinany anareo tokoa ilay voady ka ho fahotana aminareo[152].

²³Fa raha tsy mivoady ianareo, dia tsy fahotana aminareo izany.

²⁴Izay aloaky ny vavanareo dia imasoy hotanterahina, araka ny voady an-tsitrapo notononin’ny vavanareo tamin’ny TOMPO Andriamanitrareo.

²⁵Raha ianareo sendra mandalo ny tanimboaloboky ny namanareo, dia mahazo manaram-po mihinam-boaloboka hahavoky; fa aza mitondra mody.

²⁶Raha ianareo sendra mandalo ny tanimbarin’ny namanareo, dia mahazo mioty salohim-bary amin’ny tananareo[153]; fa aza jinjanareo antsy ny variny.