Read Dikateny Iombonana Eto Madagasikara Deoterônômy 29 Bible Online

Deoterônômy 29 - Dikateny Iombonana Eto Madagasikara bible

Deoterônômy 29

¹Novorîn’i Mosesy[197] ny Israelita rehetra ka nilazany hoe: — Tany Ejipta dia efa hitanareo izay rehetra nataon’ny TOMPO teo imasonareo tamin’ny Farao sy ny tandapany rehetra ary ny taniny manontolo.

²Efa hitanareo maso ny fitsapana mafy nianjady taminy, dia ireny famantarana sy zava-mahagaga goavana ireny.

³Nefa tsy nomen’ny TOMPO fo hahalala sy maso hahita ary sofina handre ianareo mandraka androany[198].

⁴Efapolo taona no nitondrako anareo tany an-taniefitra; tsy nihatonta na ny fitafiana teny an-koditrareo na ny kapa teny an-tongotrareo.

⁵Tsy mofo mba nohaninareo ary tsy divay na toaka mba nosotroinareo[199]: niahy anareo ny TOMPO hahafantaranareo fa Izy no TOMPO Andriamanitrareo.

⁶Nony tonga teto amin’ity toerana ity ianareo, dia niainga hifanehatra sy hiady amintsika i Sihôna, mpanjakan’i Hesbôna, sy i Hôga mpanjakan’i Basàna; kanefa resintsika izy roa lahy[200].

⁷Ary nalaintsika ny taniny ka nomentsika ho zaratanin’ny Reobenita sy ny Gadita ary ny antsasa-pokon’i Manase[201].

⁸Koa imasoy hotanterahina ny fepetra momba izao fanekempihavanana izao mba hambinina ianareo amin’izay rehetra hataonareo.

⁹Ry Israelita, anio no miseho eto anatrehan’ny TOMPO Andriamanitrareo ianareo rehetra, dia ny lehibenareo sy mpitsaranareo, ny loholonareo sy mpifehy anareo, ny vatan-dehilahy

¹⁰sy zaza amam-behivavy, ary koa ny vahiny eo amin’ny tobinareo ka ampiasainareo ho mpikapa hazo sy ho mpantsaka rano.

¹¹Hidiranareo izao ny fanekempihavanana ataon’ny TOMPO Andriamanitrareo aminareo ary hirosoanareo ny fianianana hankatoavana izany.

¹²Dia hasandrany ho vahoakany ianareo ary Izy ho Andriamanitrareo, araka izay nampanantenainy taminareo sy nianianany tamin’i Abrahama sy i Itsehàka ary i Jakôba razambenareo.

¹³Tsy aminareo ihany no ataoko manankery izao fanekempihavanana arahim-pianianana izao;

¹⁴eny, tsy an’izay olona tafaraka etoana manatrika ny TOMPO Andriamanitsika ihany izao fanekempihavanana izao fa ho an’izay taranaka amam-para tsy mbola tafaraka amintsika anio koa.

¹⁵Fantatrareo izay nitoerantsika tany Ejipta sy izay nandehanantsika namakivaky ny tanin’ireo hafa firenena;

¹⁶ary efa hitanareo ny zava-maharikoriko misy eo aminy, dia ny sampy vita hazo na vato na volafotsy na volamena.

¹⁷Koa aoka tsy hisy aminareo, lahy na vavy, na fianakaviana na foko, hanana fo mivily anio ka hiala amin’ny TOMPO Andriamanitsika mba handeha hanompo ny andriamanitr’ireny firenena ireny; aoka tsy hisy aminareo ho tahaka ny fakan-javamaniry miteraka poizina mangidy[202].

¹⁸Raha olona mandre izao tenim-pianianana izao no mihevi-tena ho ambinina ka hanao hoe: «Hanam-piadanana ihany aho, na manaraka ny ditram-poko aza; sady tany dibo-drano, tsy mba mangetaheta intsony[203]!»,

¹⁹dia tsy hety hamela heloka izany olona izany ny TOMPO; fa hanetroka aminy kosa ny fahatezeran’ny TOMPO sy ny fahasarota-piarony, ary hiafitra aminy avokoa ny ozona rehetra izay voasoratra amin’ity boky ity, ka hovonoin’ny TOMPO tsy ho eo amin’izao tontolo izao ny fahatsiarovana azy.

²⁰Dia havahan’ny TOMPO tsy ho anisan’ny foko israelita rehetra intsony izy; ary ho loza ho azy izany, araka ny ozona rehetra izay raketin’ny fanekempihavanana voasoratra amin’ity bokin’ny Lalàna ity.

²¹Rehefa mahita ny voina sy loza hamelezan’ny TOMPO ity taninareo ity ny taranaka any aoriana, dia ny zanakareo izay handimby anareo sy ny vahiny avy any an-tany lavitra, dia ho loa-bolana hoe:

²²«Main’ny solifara sy ny sira avokoa ity tany ity; tsy azo amafazana intsony, tsy hanirian-javatra intsony, ary tsy hisy ahitra hitrebona intsony ao. Ny mihatra aminy dia ny nanjo an’i Sôdôma sy i Gômôra ary i Admà sy i Tsebôima, izay tanàna noravan’ny TOMPO satria nirehetan’ny fahatezerany[204]».

²³Ny firenena hafa rehetra koa dia ho loa-bolana hoe: «Nahoana re ny TOMPO no dia nanao toy izany tamin’ity tany ity? Inona no hevitr’izao fahatezerany mirehitra mafy izao?»

²⁴Dia hovalian’ny olona hoe: «Tonga izao satria nafoin’izany vahoaka izany ny fanekempihavanana nataon’ny TOMPO, dia ilay Andriamanitry ny razambeny. Nanao fanekempihavanana taminy tokoa manko ny TOMPO fony nampiala azy tany Ejipta;

²⁵kanjo nandeha nanompo andriamani-kafa izy ka niankohoka teo anatrehan’ireny andriamanitra tsy fantany sady tsy navela hotompoiny ireny.

²⁶Dia nirehitra tamin’ity tany ity ny fahatezeran’ny TOMPO, ka nataony tonga taminy avokoa ny ozona rehetra izay voasoratra amin’ity boky ity;

²⁷eny, fahatezerana mirehitra mafy tokoa no nandroahan’ny TOMPO azy sy nanilihany azy any an-tany hafa, tahaka ny misy azy ankehitriny izao.»

²⁸Anjaran’ny TOMPO Andriamanitsika ny mahafantatra ny zava-miafina. Ny tenantsika sy ny taranatsika hatrany hatrany kosa no mahafantatra ny zavatra ambarany, mba hanatanterahantsika ny didy rehetra raketin’ity Lalàna ity.