Read Dikateny Iombonana Eto Madagasikara Deoterônômy 3 Bible Online

Deoterônômy 3 - Dikateny Iombonana Eto Madagasikara bible

Deoterônômy 3

¹Dia nihodina niakatra tamin’ny lalana mankany Basàna isika; ary niainga hiady amintsika tao Edrehỳ i Hôga mpanjakan’i Basàna, mbamin’ny tafiny manontolo.

²Tamin’izay, dia hoy ny TOMPO tamiko: «Aza matahotra an’i Hôga ianareo, fa efa natolotro eo an-tananareo izy sy ny tafiny manontolo mbamin’ny taniny; ary ny hataonareo amin’i Hôga dia araka izay nataonareo tamin’i Sihôna mpanjaka amôrita, izay nonina tao Hesbôna.»

³Dia natolotry ny TOMPO Andriamanitsika eo an-tanantsika koa i Hôga, mpanjakan’i Basàna, mbamin’ny tafiny manontolo; noresentsika ireo ka tsy nisy niangana na iray akory aza.

⁴Afatsika tamin’izay ny tanànany enimpolo izay nanjakàn’i Hôga manerana ny faritany Argôba manontolo tao Basàna.

⁵Tanànamimanda avokoa ireo tanàna ireo ka samy nisy manda avo sy vavahady voahidy mafy; ankoatra ireo, dia nisy tanàna kely maro dia maro.

⁶Noravantsika tanteraka ireny tanàna ireny ary naringantsika ny lehilahy mbamin’ny zaza amam-behivavy isan-tanàna, toy ny nataontsika tamin’ny tanànan’i Sihôna mpanjaka tao Hesbôna.

⁷Fa ny biby fiompy rehetra sy ny fananana tamin’ireo tanàna ireo no nobabointsika.

⁸Koa tamin’izany andro izany, dia nalaintsika tamin’ny mpanjaka amôrita anankiroa ny tany izay any an-dafin’i Jôrdàna, manomboka amin’ny lohasahan-driaka Arnôna ka miafara amin’ny tendrombohitra Hermôna[22],

⁹(dia i Hermôna izay nataon’ny Tsidônianina hoe Siriôna ary nataon’ny Amôrita kosa hoe Senîra).

¹⁰Nalaintsika ny tanàna rehetra amin’ny lembalemba, nalaintsika i Gilehada sy i Basàna manontolo hatrany Salkà sy Edrehỳ izay tanàna nanjakan’i Hôga tany Basàna.

¹¹I Hôga mpanjakan’i Basàna manko no hany sisa tavela tamin’ny Refaîta[23]. Mbola hita ao Rabà, renivohitry ny Amôrita, ny vatam-paty misy azy, dia vatam-paty natao tamin’ny vato vy voapaika ka efatra metatra sy sasany ny halàvany ary roa metatra ny sakany araka ny refy mahazatra.

¹²Tamin’izany andro izany tokoa no nahazoantsika io tany io. Ny antsasaky ny tany havoanan’i Gilehada mbamin’ny tanàna eo, manomboka any Harôhera izay eo amoron’ny lohasahan-driaka Arnôna, dia nomeko ny Reobenita sy ny Gadita[24].

¹³Ny sisa tamin’i Gilehada sy i Basàna manontolo, izay nanjakan’i Hôga, dia nomeko ny antsasa-pokon’i Manase. (Ny faritany Argôba miaraka amin’i Basàna manontolo dia natao koa hoe tanin’ny Refaîta.

¹⁴Ireo terak’i Jaîro zanakalahin’i Manase no nahazo ny faritany Argôba manontolo, mipaka amin’ny sisintanin’ny Gesorita sy Mahekatita; dia nantsoina hoe Havôta-Jaîro izany faritra izany araka ny anarana entiny mandraka androany.)

¹⁵Ny terak’i Makira kosa nomeko faritany Gilehada.

¹⁶Ny Reobenita sy ny Gadita dia nomeko ny ampahan’i Gilehada miafara amin’ny lohasahan-driaka Arnôna (ka tao afovoan’io lohasahan-driaka io no sisintany), sy miafara amin’ny lohasahan-driaka Jabôka izay sisin-tany mampisaraka amin’ny Hamônita;

¹⁷nomeko azy ireo koa i Harabà, ka ny ony Jôrdàna no sisintany, manomboka ao Kinereta ka miafara amin’ny Ranomasin’i Harabà, dia ny Ranomasina Maty, eo am-bodin’ny tendrombohitra Pisgà izay ao atsinanany.

¹⁸Tamin’izany andro izany, dia nomeko baiko ireo ka nataoko hoe: «Efa nomen’ny TOMPO Andriamanitrareo ho fanananareo ity faritany ity; ka ndeha mita eo alohan’ny Israelita hafa havanareo ianareo lehilahy mahery fo rehetra samy efa voaoman-kiady.

¹⁹Fa ny vadinareo sy ny zanakareo madinika ary ny biby fiompinareo, (fantatro fa be biby fiompy ianareo), dia hitoetra ao amin’ireo tanàna izay nomeko anareo.

²⁰Ampio ny Israelita hafa mandra-panomen’ny TOMPO azy fitsaharana tahaka ny nataony taminareo, ka hananany ny tany izay omen’ny TOMPO Andriamanitrareo azy any andafin’i Jôrdàna; dia samy hiverina any amin’ny zaratany izay nomeko anareo avy ianareo[25].»

²¹Tamin’izany andro izany koa dia nomeko baiko i Josoa ka nilazako hoe: «Efa hitanao maso izay rehetra nataon’ny TOMPO Andriamanitrareo tamin’ireo mpanjaka roa lahy; dia toy izany no hataon’ny TOMPO amin’ny mpanjaka rehetra hatrehinao eny ampita.

²²Aza matahotra azy ianareo satria ny TOMPO Andriamanitrareo mihitsy no hiady ho anareo.»

²³Tamin’izany andro izany, dia nitaraina tamin’ny TOMPO aho ka nanao hoe:

²⁴«Ry Tompo ANDRIANANAHARY ô, vao nanehoanao ny fahalehibeazanao sy ny fiarovanao mahery aho mpanomponao. Fa, na any an-danitra na eto an-tany, aiza no misy andriamanitra mahay manao araka ny asanao sy ny zava-dehibe vitanao?

²⁵Aoka mba hahazo mita aho ka hahita izany tany soa any andafin’i Jôrdàna izany, dia ilay faritra be tendrombohitra tsara sy i Libano.»

²⁶Fa tezitra tamiko ny TOMPO noho ny aminareo, ka tsy nihaino ahy sady nilaza tamiko hoe: «Aoka izay fa aza teneninao amiko intsony izany zavatra izany.

²⁷Miakara eo an-tampon’i Pisgà ianao ary atopazy miankandrefana sy mianavaratra ary mianatsimo sy miantsinanana ny masonao, dia aoka hijery; satria tsy hahazo mita izany Jôrdàna izany ianao[26].

²⁸Fa i Josoa no omeo baiko, dia ampaherezo sy hatanjaho, satria izy no hiampita eo alohan’ity vahoaka ity sady hampahazo azy ny tany izay ho hitanao.»

²⁹Dia nijanona teo an-dohasaha tandrifin’i Bety-Pehôra isika[27].