Read Dikateny Iombonana Eto Madagasikara Deoterônômy 33 Bible Online

Deoterônômy 33 - Dikateny Iombonana Eto Madagasikara bible

Deoterônômy 33

¹Rehefa nadiva ho faty i Mosesy, lehilahin’Andriamanitra, dia izao no tsodrano nataony tamin’ny Israelita:

²Tonga avy tany Sinay ny TOMPO, avy tany Sehîra no nisehoany tamin’ny vahoakany, avy tao an-tendrombohitra Paràna no namirapiratany. Otronin’ny anjely alinkisa no nahatongavany; avy teo amin’ny tanan-kavanany no nanjelanjelatra ny lalàna[233].

³Eny, tia ireo fokon’i Israely ianao, ry Tompo! Ambany fifehezanao avokoa ny olona voatokana ho Anao; miankohoka eo an-tongotrao ireo ka samy mandray ny teninao.

⁴Ny Lalàna naroson’i Mosesy tamintsika no lovan’ny taranaka narovan’i Jakôba;

⁵ary tonga mpanjakan’i Jesoròna ny Tompo[234] fony tafangona ny lehiben’ny vahoaka mbamin’ireo foko israelita rehetra.

⁶Ny amin’ny taranak’i Reobena, dia hoy i Mosesy hoe: «Aoka ho velona ny fokon’i Reobena fa tsy ho faty, ary aoka ho tsy tambo isaina ny olony!»

⁷Ny amin’ny taranak’i Joda dia izao no voalazan’i Mosesy; «TOMPO ô, henoy antso ny fokon’i Joda! Ento izy hifandray amin’ireo mpiray firenena aminy; ny tanany no hiadiany ho an’ny fokony ka ampio izy hamely ny mpandrafy azy.»

⁸Ny amin’ny taranak’i Levỳ, dia hoy i Mosesy hoe: «Tompo ô, ny Orîmanao sy Tomîmanao dia nankininao amin’ireto olona mahatoky Anao ireto, izay efa nozahanao toetra tany Masà sy nanarinao mafy teo amin’ny ranon’i Meribà[235].

⁹Noho Ianao, dia tsy mba niraiki-po tamin’ny ray aman-dreniny ireo, na nifikitra tamin’ny mpiray tampo na fatra-pitia zanaka, fa nitandrina ny teninao sy nitana ny fanekempihavananao[236].

¹⁰Ireo no mampianatra ny fitsipika aman-dalànanao amin’ny Israelita namany sy manolotra vovo-javamanitra eo anatrehanao ary mitondra sorona dorana manontolo eo amin’ny alitaranao[237].

¹¹TOMPO ô, tahio ny ezaka vitany ary aoka ho sitrakao ny asa ataony; folahy ny herin’izay mitsangan-kanohitra azy, ary aoka tsy hiarina intsony izay mankahala azy.»

¹²Ny amin’ny taranak’i Benjamîna, dia hoy i Mosesy hoe: «Foko malalan’ny TOMPO ianareo ka monina feizay eo akaikiny; miaro anao isan’andro vaky Izy sady monina eo anivon’ny havoanareo[238].»

¹³Ny amin’ny taranak’i Jôsefa, dia hoy i Mosesy hoe: «Hotahîn’ny TOMPO anie ny taninareo, ka hahazo ny ando fanomezan-tsoan’ny lanitra sy ny rano misoko avy any ambany lalina any,

¹⁴handray ny zava-tsoa entin’ny masoandro sy ny zava-tsoa matoy isam-bolana,

¹⁵ho rakotry ny voka-tsoan’ny tendrombohitra sy ny voka-tsoan’ny havoana hatrizay hatrizay!

¹⁶Enga anie ny zava-tsoan’izany tany mahavokatra izany sy ny fanambinan’Ilay nitoetra tao amin’ny Roimemy hitosaka eo amin’ny taranak’i Jôsefa, dia ny taranak’ilay navahana tamin’ny rahalahiny[239]!

¹⁷Homem-boninahitra anie ny taranak’i Jôsefa satria mahery tahaka ny ombalahy izy! Tahaka ny ombimanga be tandroka izy, ka manan-tandroka roa hanotoany ny firenena rehetra hatrany amin’ny faravazan-tany, dia ny miaramila alinalin’ny fokon’i Efraîma sy ny miaramila arivoarivon’ny fokon’i Manase.»

¹⁸Ny amin’ny taranak’i Zebolòna sy i Jisakara, dia hoy i Mosesy hoe: «Mifalia, ry fokon’i Zebolòna, amin’ny varotra ataonao; mifalia, ry fokon’i Jisakara, ao an-dainao.

¹⁹Firenena maro no antsoinareo hankeo an-tendrombohitra mba hanolotra sorona araka ny voalahatra, satria angoronanareo harena ny ranomasina sy ny zava-tsoa miafina ao amin’ny fasika[240].»

²⁰Ny amin’ny taranak’i Gada, dia hoy i Mosesy hoe: «Hankalazaina anie ny Tompo Izay manome faritra malalaka ho an’ny fokon’i Gada! Tahaka ny liona no amitsahan’ny fokon’i Gada, dia liona vonon-kamiravira ny sandrin’ny rembiny mbamin’ny lohany koa aza.

²¹Nahazo ny zaratany tsara indrindra ho azy izy, dia anjara voatokana ho an’ny mpifehy; avy eo niaraka tamin’ny lehiben’ny vahoaka izy ka nanao ny marina soritan’ny TOMPO sy ny fitsipiny hanasoavana an’i Israely[241].»

²²Ny amin’ny taranak’i Dana, dia hoy i Mosesy hoe: «Ny fokon’i Dana dia tahaka ny vanton-diona izay miantoraka avy ao Basàna[242].»

²³Ny amin’ny taranak’i Naftalỳ, dia hoy i Mosesy hoe: «Ry fokon’i Naftalỳ, tototra tombontsoa ianao sady heniky ny fitahian’ny TOMPO. Aoka hitatra miankandrefana sy mianatsimo ny faritany anananao[243]!»

²⁴Ny amin’ny taranak’i Asera, dia hoy i Mosesy hoe: «Hotahîna anie ny fokon’i Asera, eo amin’ny samy taranak’i Jakôba! Hotiavin’ny mpiray firenena aminy anie izy! Aoka hitobaka ny menak’ôlivany ka hisy hanobohany ny tongony!»

²⁵Azo antoka ny varavaranao fa ho vy amam-barahina ny hidiny. Ny herinao[244] anie haharitra toy ny androm-piainanao!

²⁶Dia hoy koa i Mosesy hoe: «Ry Jesoròna[245], tsy misy tahaka an’ilay Andriamanitrao! Heni-boninahitra sady mitaingina ny rahon’ny lanitra Izy mba ho tonga hamonjy anao.

²⁷Andriamanitra, hatrizay hatrizay, no fialofana; ny heriny, hatrany hatrany, no miasa etỳ ambany[246] etỳ. Mandroaka ny fahavalo eo anoloanao Izy ary mandidy anao handringana an’ireo.

²⁸Mandry feizay ny Israelita; monina milamina ny taranak’i Jakôba eo amin’ny tany be vary sy divay, tany izay ipariahan’ny andon’ny lanitra.

²⁹Sambatra ianareo, ry Israelita! Iza no tahaka anareo, ry vahoaka voavonjin’ny TOMPO? Izy no ampinga miaro anareo sy sabatra ireharehanareo. Hikoy aminareo ny fahavalonareo, ka hohitsahinareo ny toerana avo fivavahany.»