Read Dikateny Iombonana Eto Madagasikara Deoterônômy 34 Bible Online

Deoterônômy 34 - Dikateny Iombonana Eto Madagasikara bible

Deoterônômy 34

¹Dia niainga avy teo amin’ny lemak’i Môaba i Mosesy ka niakatra nankany amin’ny tendrombohitra Nebao, eo an-tampon’i Pisgà, izay tandrifin’i Jerikao[247]. Ary nasehon’ny TOMPO azy avokoa ilay tany: dia ny faritr’i Gilehada tafapaka hatrany Dana;

²ny faritr’i Naftalỳ manontolo; ny tanin-dry i Efraîma sy i Manase; ny tanin’i Joda manontolo tafapaka hatrany amin’ny Ranomasina Mediteranea;

³ny faritr’i Negeba; ary, ao amin’ny lohasahan’i Jôrdàna, ny faritanin’i Jerikao (tanàna be rofia), faritany izay tafapaka hatrany Tsôhara.

⁴Dia hoy ny TOMPO tamin’i Mosesy: — Io tany io no nampanantenaiko ombàm-pianianana tamin’i Abrahama sy i Itsehàka ary i Jakôba, fony ireo nilazako hoe: «Homeko ny taranakareo ity tany ity[248].» Nataoko nahita maso azy ianao, nefa tsy ho tafita eny.

⁵Teo no nahafatesan’i Mosesy, ilay mpanompon’ny TOMPO, dia teo amin’ny tany Môaba araka ny tenin’ny TOMPO.

⁶Ary nalevin’Andriamanitra[249] teo an-dohasaha, tao amin’ny tany Môaba, tandrifin’i Bety-Pehôra izy; ka tsy misy olona mahalala ny fasany mandraka androany.

⁷Efa 120 taona i Mosesy no maty; ary tsy pahina ny masony na nihena ny heriny.

⁸Nitomanian’ny Israelita teo amin’ny lemak’i Môaba i Mosesy, nandritra ny telopolo andro nanatontosana ny fisaonana azy.

⁹I Josoa, zanakalahin’i Nona, dia feno fanahy fahendrena, satria efa nametrahan’i Mosesy tanana[250]; ka nihaino azy ny Israelita sady nanatanteraka ny didy nampitain’ny TOMPO tamin’i Mosesy.

¹⁰Teo amin’i Israely, dia tsy mba nisy intsony mpaminany tahaka an’i Mosesy, izay fantatry ny TOMPO nifanatrika[251].

¹¹Tsy manan-tsahala i Mosesy satria izy no nirahin’ny TOMPO tany Ejipta hanao famantarana sy zava-mahagaga isan-karazany teo anatrehan’ny Farao sy ny tandapany ary ny taniny manontolo;

¹²ary tanana ombàn-kery no nanaovan’i Mosesy an’ireny zavatra goavana sy mampahatahotra isan-karazany ireny, teo imason’ny Israelita rehetra.