Read Dikateny Iombonana Eto Madagasikara Jôhany 3 Bible Online

Jôhany 3 - Dikateny Iombonana Eto Madagasikara bible

Jôhany 3

¹Nisy lehilahy anankiray atao hoe Nikôdema, anisan’ny antokom-pivavahana Farisianina ary manampahefana teo amin’ny Jiosy.

²Nanatona an’i Jesoa izy indray alina ary niteny taminy hoe: — Mpampianatra ô, fantatray fa Mpampianatra nirahin’Andriamanitra Ianao; satria tsy misy olona mahavita ireo famantarana ataonao ireo, raha tsy ombàn’Andriamanitra.

³Fa novalian’i Jesoa hoe: — Lazaiko marina dia marina aminao fa raha tsy ateraka indray[34] ny olona, dia tsy afa-mahita ny Fanjakàn’Andriamanitra.

⁴Dia hoy i Nikôdema taminy: — Hataon’ny olona ahoana no hateraka indray rehefa antitra? Moa afa-miverina any an-kibon-dreniny ve izy ka hateraka fanindroany?

⁵Ka novalian’i Jesoa hoe: — Lazaiko marina dia marina aminao fa raha tsy ateraky ny rano sy ny Fanahy Masina ny olona, dia tsy afa-miditra ao amin’ny Fanjakàn’Andriamanitra.

⁶Izay ateraky ny olombelona, dia olombelona; izay ateraky ny Fanahy Masina, dia fanahy.

⁷Aza gaga ianao raha nilazako hoe: «Tsy maintsy ateraka indray[35] ianareo.»

⁸Ny rivotra[36] dia mitsoka amin’izay tiany, ary renao ny feony nefa tsy fantatrao izay iaviany na izay alehany: tahaka izany izay rehetra ateraky ny Fanahy Masina.

⁹Dia niteny tamin’i Jesoa i Nikôdema nanao hoe: — Hatao ahoana no hahatonga izany?

¹⁰Ka izao no navalin’i Jesoa azy: — Mpampianatra eto amin’i Israely ianao, ka tsy mahalala izany ve?

¹¹Lazaiko marina dia marina aminao fa izay fantatray no lazainay ary izay hitanay no ijoroanay ho vavolombelona, nefa tsy raisinareo izany fijoroanay ho vavolombelona izany.

¹²Raha nilaza taminareo ny zavatra etỳ an-tany Aho, dia tsy inoanareo; ka ahoana no hinoanareo Ahy, raha milaza aminareo ny zavatra any an-danitra Aho?

¹³Ary tsy nisy niakatra any an-danitra afa-tsy Ilay nidina avy tany an-danitra, dia ny Zanak’olona[37].

¹⁴Ary tahaka ny nanandratan’i Mosesy ny bibilava varahina tany an-taniefitra[38] no tsy maintsy hanandratana ny Zanak’olona

¹⁵mba ho velona aina mandrakizay izay rehetra mino Azy.

¹⁶Eny, notiavin’Andriamanitra fatratra izao tontolo izao, ka nomeny ny Zanany lahitokana, mba tsy ho very izay rehetra mino Azy fa ho velona aina mandrakizay.

¹⁷Andriamanitra manko tsy naniraka ny Zanany ho eto amin’izao tontolo izao, mba hanameloka an’izao tontolo izao, fa mba hamonjy an’izao tontolo izao amin’ny alalany.

¹⁸Izay mino ny Zanaka dia tsy helohina; fa izay tsy mino koa dia efa voaheloka rahateo, noho izy tsy nino ny Zanaka lahitokan’Andriamanitra.

¹⁹Ary izao no anton’ny fanamelohana: efa tonga tamin’izao tontolo izao ny fahazavana, nefa naleon’ny olona ny haizina toy izay ny fahazavana, satria ratsy ny asany.

²⁰Fa izay rehetra manao ratsy dia mankahala ny fahazavana sady tsy manatona ny fahazavana, fandrao hita miharihary ny asa ratsiny.

²¹Izay manao ny marina kosa dia manatona ny fahazavana, mba hiseho fa notontosaina araka an’Andriamanitra ny asany.

²²Taorian’izany, dia nankany amin’ny faritany Jodea i Jesoa mbamin’ny mpianany; ary niara-nitoetra tamin’izy ireo tany Izy sady nanao batisa[39] ny olona.

²³I Jôhany koa nanao batisa ny olona tao Enôna akaikin’i Salîma[40], fa be rano tao; nanatona an’i Jôhany ny olona ka nataony batisa

²⁴fa tsy mbola naiditra am-ponja izy[41].

²⁵Tamin’izay dia nisy fifandiran’ny mpianatr’i Jôhany tamina Jiosy anankiray[42] ny amin’ny fomba fidiovana;

²⁶ary nankany amin’i Jôhany ireo mpianany ka nilaza taminy hoe: — Mpampianatra ô, Ilay niaraka taminao teny andafy atsinanan’ny ony Jôrdàna sady nijoroanao ho vavolombelona iny anie ka manao batisa ary hatonin’ny olona rehetra.

²⁷Fa izao kosa no navalin’i Jôhany: — Tsy misy olona afaka mandray na inona na inona, raha tsy nomen’Andriamanitra azy izany.

²⁸Ianareo mihitsy no vavolombeloko fony aho nilaza hoe: «Tsy izaho no ilay Mesia, fa nirahina hialoha Azy aho[43].»

²⁹Izay manana ny ampakarina no mpampakatra; fa ny sakaizan’ny mpampakatra dia mipetraka eo anilan’ny mpampakatra sy mihaino azy ary faly tokoa mandre ny feony. Izany hafaliana izany no efa tanteraka amiko ankehitriny.

³⁰Izy tsy maintsy mitombo, fa izaho kosa tsy maintsy mihena.

³¹— Ilay avy any ambony dia ambonin’ny olona rehetra; fa izay avy amin’ny tany dia avy amin’ny tany, ka ny zavatra momba ny etỳ an-tany no lazainy. Ilay avy any an-danitra no ambonin’ny olona rehetra;

³²ka izay efa hitany sy reny no ijoroany ho vavolombelona, saingy tsy misy olona mandray izany fijoroany ho vavolombelona izany.

³³Izay mandray ny fijoroany ho vavolombelona dia manamarina fa azo antoka Andriamanitra.

³⁴Ilay nirahin’Andriamanitra manko no milaza ny tenin’Andriamanitra, satria tsy misy fetrany no anomezan’Andriamanitra Azy ny Fanahy Masina.

³⁵Ny Ray dia fatra-pitia ny Zanaka, ary efa nametraka ny zavatra rehetra eo am-pelatanany.

³⁶Izay mino ny Zanaka no velona aina mandrakizay; fa izay tsy mino ny Zanaka dia tsy ho velona aina, fa itoeran’ny hatezeran’Andriamanitra.