Read Dikateny Iombonana Eto Madagasikara Jôhany 7 Bible Online

Jôhany 7 - Dikateny Iombonana Eto Madagasikara bible

Jôhany 7

¹Taorian’izany i Jesoa dia nitety an’i Galilea fa tsy te hitety an’i Jodea, satria notadiavin’ny manampahefana jiosy hovonoina.

²Efa akaiky kosa ny fankalazana fanaon’ny Jiosy, dia ny fankalazana ny Tranolay;

³ka hoy ny rahalahin’i Jesoa taminy: — Mialà eto Ianao ka mandehana any Jodea, mba ho hitan’ny mpianatrao koa ireo asa ataonao.

⁴Fa tsy misy olona manafina izay ataony raha mitady ho fanta-bahoaka. Raha manao ireny zavatra ireny Ianao, dia misehoa amin’izao tontolo izao.

⁵Fa na dia ny rahalahiny aza tsy nino Azy;

⁶ka hoy i Jesoa taminy: — Tsy mbola migadona ny fotoanandroko, fa ny fotoanandro dia mety lalandava ho anareo.

⁷Tsy afa-mankahala anareo izao tontolo izao; fa Izaho no ankahalainy, satria mijoro ho vavolombelona manambara fa ratsy ny asany.

⁸Miakara any amin’ny fankalazana ianareo, fa Izaho tsy mbola miakatra[72] any amin’izany fankalazana izany, satria tsy mbola feno ny fotoanandroko.

⁹Nony avy nilaza izany i Jesoa, dia nijanona tao Galilea ihany.

¹⁰Rehefa lasa niakatra any amin’io fankalazana io ny rahalahiny, dia niakatra koa i Jesoa, nefa tsy mba nisehoseho fa toa niafinafina.

¹¹Nandritra ny fankalazana[73] dia nitady Azy ny manampahefana jiosy ary fatra-panontany hoe: — Aiza Izy?

¹²Ary nitakoritsika be ny amin’i Jesoa ny vahoaka; ny sasany nanao hoe: «Tsara fanahy Izy»; ny sasany kosa nanao hoe: «Tsy izany, fa mamitaka ny vahoaka Izy.»

¹³Saingy tsy nisy niresaka Azy an-karihary noho ny fahatahorana ny manampahefana jiosy.

¹⁴Teo antenatenan’ny fankalazana, dia niakatra tao an-kianjan’ny tempoly i Jesoa ka nampianatra.

¹⁵Dia gaga ny manampahefana jiosy ka vaky vava hoe: — Ahoana no ahaizan’ilay io Soratra Masina, nefa tsy mba nianatra Izy[74]?

¹⁶Fa novalian’i Jesoa hoe: — Tsy Ahy ny fampianarako, fa an’Ilay naniraka Ahy.

¹⁷Raha misy olona te hanao ny sitrapon’Andriamanitra, dia hahalala ny amin’ny fampianarako izy, na zavatra avy amin’Andriamanitra izany na zavatra teneniko avy amiko fotsiny.

¹⁸Izay miteny zavatra avy amin’ny tenany fotsiny dia mitady ny voninahitra ho an’ny tenany; fa izay mitady ny voninahitr’ilay naniraka azy no azo antoka sady tsy misy fitaka ao aminy.

¹⁹Moa tsy nomen’i Mosesy anareo ve ny lalàna? Kanefa tsy misy aminareo manatanteraka ny lalàna! Nahoana Aho no tadiavinareo hovonoina?

²⁰Dia hoy ny vahoaka taminy: — Ondranondranana Ianao! Iza no mitady hamono Anao?

²¹Ka novalian’i Jesoa hoe: — Asa iray monja no nataoko, dia gaga ianareo rehetra!

²²Noho i Mosesy nanome didy anareo hanao famorana (kanefa tsy i Mosesy no nipoirany fa ny razanareo[75]), dia mamora olona ihany ianareo na amin’ny andro sabata aza.

²³Koa raha andro sabata no amorana olona mba tsy hahafoana ny lalànan’i Mosesy, dia tezitra amiko ve ianareo raha misy lehilahy anankiray nataoko sitrana soa aman-tsara ny tenany manontolo tamin’ny andro sabata[76]?

²⁴Aza dia mitsara araka ny ivelany fa mitsarà araka ny rariny[77].

²⁵Tamin’izay ny mponina sasany tao Jerosalema nanao hoe: — Tsy Izy io ve Ilay tadiavin-dry zareo hovonoina?

²⁶Indro Izy miteny an-karihary, kanefa ry zareo tsy mandrara Azy akory! Sao dia efa azon’ireo filohantsika antoka fa Izy no ilay Mesia?

²⁷Ilay io anefa dia fantatsika ny ipoirany; fa ny Mesia, rehefa tonga, dia tsy misy mahalala ny ipoirany.

²⁸Koa raha nampianatra tao an-kianjan’ny tempoly i Jesoa, dia niantso mafy hoe: — Izaho ve dia fantatrareo tokoa, ary fantatrareo tokoa ve ny ipoirako? Tsy avy amin’ny tenako no nahatongavako; fa azo antoka Ilay naniraka Ahy, saingy ianareo tsy mahalala Azy.

²⁹Izaho no mahalala Azy, satria avy any aminy no ipoirako sady Izy no naniraka Ahy.

³⁰Tamin’izay dia nitady hisambotra Azy ny olona, kanefa tsy nisy naninji-tanana taminy satria tsy mbola tonga ny fotoanandron’i Jesoa.

³¹Maro kosa tamin’ny vahoaka no nino Azy sady niteny hoe: «Rehefa tonga ny Mesia, moa ve hanao famantarana maro mihoatra ny nataon’Izy io?»

³²Ren’ny Farisianina ny vahoaka mitakoritsika ny amin’i Jesoa toy izany; ka naniraka mpiandry raharaha hisambotra Azy ny lohandoha-mpisorona sy ny Farisianina.

³³Dia hoy i Jesoa: — Kely foana sisa no itoerako aminareo, dia hankany amin’Ilay naniraka Ahy aho.

³⁴Hitady Ahy ianareo fa tsy hahita, satria ny toerana hisy Ahy tsy azonareo aleha!

³⁵Tamin’izay ny manampahefana jiosy dia nifampilaza hoe: — Aiza no toerana halehan’ilay io no tsy ho hitantsika Izy? Hankany amin’ireo Jiosy miely any amin’ny Grika[78] ve Izy ka hampianatra ny Grika?

³⁶Inona no hevitr’ity teny voalazany hoe: «Hitady Ahy ianareo fa tsy hahita, sady ny toerana hisy Ahy tsy azonareo aleha»?

³⁷Tamin’ilay andro lehibe famaranana[79] ny fankalazana, dia nijoro i Jesoa ka niantso mafy hoe: — Raha misy olona mangetaheta, aoka izy hanatona Ahy;

³⁸ary izay mino Ahy, aoka hisotro! Fa araka ny voalazan’ny Soratra Masina[80], dia «hisy onin-dranovelona hiboiboika avy ao am-pony!»

³⁹Ny Fanahy Masina efa horaisin’ireo nino an’i Jesoa no voalazany tamin’izany; tsy mbola nomena manko ny Fanahy Masina, satria tsy mbola nomem-boninahitra i Jesoa.

⁴⁰Ny sasany tamin’ny vahoaka, nony nandre ireo teny ireo, dia nanao hoe: — Ity tokoa no ilay Mpaminany!

⁴¹Ny sasany nanao hoe: — Ity no ilay Mesia! Ny sasany kosa nanao hoe: — Fa angaha avy any Galilea[81] no iavian’ny Mesia?

⁴²Tsy efa voalazan’ny Soratra Masina ve fa avy amin’ny taranak’i Davida sady avy ao Betlehema tanàna nonenan’i Davida no iavian’ny Mesia[82]?

⁴³Koa nisara-tsaina ny amin’i Jesoa ny vahoaka;

⁴⁴ny sasany tamin’izy ireo dia nitady hisambotra Azy, kanefa tsy nisy naninji-tanana taminy.

⁴⁵Dia niverina tany amin’ireo lohandoha-mpisorona sy ireo Farisianina ny mpiandry raharaha ka nilazan-dry zareo hoe: — Ahoana no tsy nitondranareo Azy?

⁴⁶Dia novalian’ny mpiandry raharaha hoe: — Tsy mbola nisy olona niteny tahaka izany!

⁴⁷Ka hoy ny Farisianina taminy: — Ianareo koa angaha voafitaka?

⁴⁸Moa ve misy anankiray amin’ireo filohantsika na anankiray amin’ireo Farisianina mba nino Azy?

⁴⁹Saingy ireto vahoaka tsy mahalala ny lalànan’i Mosesy no olona voaozona!

⁵⁰Fa i Nikôdema, ilay efa nanatona an’i Jesoa teo aloha sady anisan’ny Farisianina, dia niteny tamin-dry zareo hoe:

⁵¹— Moa ny lalànantsika ve manameloka olona raha tsy efa re aloha izy sady fantatra izay nataony[83]?

⁵²Dia novalian’ireo hoe: — Ianao koa angaha mba avy any Galilea? Diniho dia ho hitanao fa tsy misy mpaminany mipoitra avy any Galilea[84]! [

⁵³Dia samy lasa nody any an-tranony avy ry zareo.