Read Dikateny Iombonana Eto Madagasikara Asa 10 Bible Online

Asa 10 - Dikateny Iombonana Eto Madagasikara bible

Asa 10

¹Tany Kesaria dia nisy lehilahy atao hoe Kôrnely, kapiteny tao amin’ny andian-tafika rômanina atao hoe «andian-tafika Italianina».

²Mpivavaka sady mpanaja an’Andriamanitra izy mbamin’ny ankohonany manontolo. Nanampy be dia be ny olo-mahantran’ny vahoaka jiosy i Kôrnely sady nivavaka tamin’Andriamanitra isaky ny fotoana voatendry.

³Indray tolakandro, tokony ho tamin’ny telo, dia nisehoam-pahitana izy ary nisy anjelin’Andriamanitra tazany mazava tsara niditra tao an-tranony ka niteny taminy hoe: — Ry Kôrnely!

⁴Nibanjina an’ilay anjely i Kôrnely ka raiki-tahotra sady nanao hoe: — Ahoana izay, tompoko? Dia hoy ny anjely taminy: — Tafakatra any amin’Andriamanitra ny vavaka sy ny fiantrana vitanao, ka ahatsiarovany anao.

⁵Izao ankehitriny izao dia mandefasa lehilahy ho any Jôpa haka an’i Simôna, izay antsoina koa hoe Petera.

⁶Ao amin’ny mpandon-koditra atao hoe Simôna izay manan-trano eo amoron-dranomasina no iantranoany.

⁷Rehefa lasa ilay anjely niteny taminy teo, dia nantsoin’i Kôrnely ny roa lahy tamin’ny mpanompony sy ny miaramila anankiray mpivavaka, anisan’ireo mpanotrona azy.

⁸Nitantaran’ny kapiteny izay rehetra nitranga izy telo lahy ary dia nirahiny ho any Jôpa.

⁹Raha mbola teny an-dalana ireto iraka ny ampitson’iny ka efa nanakaiky an’i Jôpa, dia niakatra tao an-tampon-trano kosa i Petera, tokony ho tamin’ny mitataovovonana, mba hivavaka.

¹⁰Ary efa noana mafy izy ka te hisakafo; ny olona namboatra sakafo ho azy, izy kosa nisehoam-pahitana mahavariana.

¹¹Hitan’i Petera fa nisokatra ny lanitra ary nisy fasian-javatra nidina avy any: toa lamba lehibe voatana amin’ny zorony efatra, nalatsaka amin’ny tany.

¹²Ary tao anatiny dia nisy biby isan-karazany, ny mandeha tongotra efatra mbamin’ny mikisaka amin’ny tany, ary koa voro-manidina isan-karazany.

¹³Dia nisy feo nanao taminy hoe: — Mitsangàna, ry Petera, mamonoa ka mihinàna!

¹⁴Dia hoy i Petera: — Sanatria, Tompoko! Tsy mbola nihinan-javatra fady na maloto[97] aho!

¹⁵Nefa dia mbola injay indray ilay feo nanao taminy hoe: — Izay efa nambaran’Andriamanitra fa madio[98], dia aza ataonao ho fady.

¹⁶Intelo niverina izany vao nakarina tany an-danitra ilay fasian-javatra.

¹⁷Raha mbola nieritreritra izay tokony ho hevitr’ilay fahitana niseho taminy teo i Petera, dia tonga ireo irak’i Kôrnely. Nanontany tamin’olona izay tranon’i Simôna mpandon-koditra izy telo lahy ary efa migadona eo am-bavahady.

¹⁸Niantso izy ireo ary nanontany hoe: — Miantrano ato ve i Simôna, ilay antsoina koa hoe Petera?

¹⁹Mbola revo nieritreritra izay tokony ho hevitr’ilay fahitana i Petera no nitenenan’ny Fanahy Masina hoe: — Indreo misy olona telo lahy[99] mitady anao.

²⁰Mitsangàna, dia midîna ary aza misalasala fa mandehana miaraka aminy; satria Izaho no naniraka azy ireo.

²¹Dia nidina i Petera ary nanatona azy telo lahy ka nanao hoe: — Izaho no ilay tadiavinareo. Inona no anton-dianareo?

²²Dia hoy izy telo lahy: — Iraky ny kapiteny Kôrnely izahay. Izy dia lehilahy tia rariny sady mpanaja an’Andriamanitra no tsara laza amin’ny Jiosy rehetra. Notoroan’ny anjely masina hevitra izy mba hampaka anao ho any an-tranony ary hihaino izay zavatra hambaranao aminy.

²³Nampiantranoin’i Petera izy telo lahy ka nandry tao ny alin’iny. Ny ampitso kosa dia lasa i Petera niara-dia tamin’ireto iraka. Tafaraka tamin’i Petera koa ny havana sasany mpino avy ao Jôpa.

²⁴Ny afakampitso dia tonga tany Kesaria ry i Petera. Efa niandry azy ireo i Kôrnely sy ny havany aman-tsakaizany izay nasainy.

²⁵Iny vao hiditra iny i Petera, dia nitsena azy i Kôrnely ary niantoraka teo an-tongony ho mari-panajana azy.

²⁶Fa nampitsangana azy i Petera ka nanao hoe: — Mitsangàna ianao, fa izaho koa dia olombelona ihany!

²⁷Sady niresaka tamin’i Kôrnely i Petera no niditra tao an-trano ka nahita ny olona marobe tafavory tao.

²⁸Dia hoy izy tamin’ireo: — Fantatrareo fa ny Jiosy dia raran’ny fivavahany tsy hifanerasera amin’ny hafa firenena na hiditra ao an-tranony. Nefa nasehon’Andriamanitra tamiko fa tsy misy olona azoko atao hoe maloto na tsy mendrika hifaneraserana.

²⁹Noho izany, raha vao nampanalainao aho, dia tonga fa tsy nandà. Tiako ho fantatra àry izay anton’ny nampanalanao ahy.

³⁰Dia novalian’i Kôrnely hoe: — Telo andro lasa izay, tamin’ny telo tolakandro toy izao indrindra, dia nivavaka[100] tato an-trano aho. Ary nisy lehilahy manao fitafiana mamirapiratra nijoro tampoka teo anatrehako,

³¹ka nilaza tamiko hoe: «Ry Kôrnely, nohenoin’Andriamanitra ny vavakao ary notsarovany koa ny fiantrana vitanao.

³²Noho izany, mandefasa olona ho any Jôpa haka an’i Simôna, izay antsoina koa hoe Petera. Ny iantranoany dia ao amin’i Simôna mpandon-koditra, eo amoron-dranomasina.»

³³Nandefa olona haka anao niaraka tamin’izay aho, ka mahafinaritra ny nanekenao hankatỳ. Ankehitriny àry dia eto anatrehan’Andriamanitra izahay rehetra, mba hihaino ny hafatra rehetra nandidian’ny Tompo anao.

³⁴Dia niteny i Petera ka nanao hoe: — Azoko tsara ankehitriny, fa tsy mba mijery tavan’olona Andriamanitra[101].

³⁵Eny, ankasitrahin’Andriamanitra avokoa izay olona manaja Azy sy manao ny rariny na aiza na aiza firenena misy azy.

³⁶Fantatrareo ny teny[102] nampitondrain’Andriamanitra ho an’ny vahoaka Israely, anambaràny ny Vaovao Mahafaly: dia ny fampihavanana amin’ny alalan’i Jesoa Kristy, ilay Tompon’ny olona rehetra.

³⁷Fantatrareo ny zava-nitranga tany Galilea aloha ary dia nanerana an’i Jodea, taorian’ny toriteny sy ny batisa nataon’i Jôhany:

³⁸nandrotsahan’Andriamanitra ny herin’ny Fanahy Masina i Jesoa avy any Nazareta, ka nitety tany nanao soa sy nanasitrana izay rehetra teo ambany fahefàn’ny devoly, satria nombàn’Andriamanitra Izy[103].

³⁹Izahay dia vavolombelona nahita ny zavatra rehetra nataony manerana ny tanin’ny Jiosy sy tao Jerosalema. Io Jesoa io dia nahanton’ny olona tamin’ny hazofijaliana no namonoany Azy,

⁴⁰nefa natsangan’Andriamanitra ho velona tamin’ny andro fahatelo. Nasehon’Andriamanitra miharihary Izy,

⁴¹tsy tamin’ny vahoaka ankapobeny fa taminay vavolombelona efa notendren’Andriamanitra mialoha hanambara an’i Jesoa. Niara-nihinana sy nisotro taminy izahay taorian’ny nananganan’Andriamanitra Azy ho velona avy any amin’ny maty[104];

⁴²ary nomeny baiko mba hitory amin’ny vahoaka sy ho vavolombelona manambara fa Izy no voatendrin’Andriamanitra ho Mpitsara ny velona sy ny maty.

⁴³Samy mijoro ho vavolombelona momba azy ny mpaminany rehetra ka manambara fa izay rehetra mino Azy dia hahazo famelan-keloka amin’ny anarany[105].

⁴⁴Raha mbola nilaza izany zavatra izany i Petera, dia nilatsahan’ny Fanahy Masina ny olona rehetra nihaino ny lahateniny.

⁴⁵Talanjona ireo mpino jiosy tafaraka tamin’i Petera, satria narotsaka tamin’ny hafa firenena koa ny Fanahy Masina fanomezan’Andriamanitra;

⁴⁶fa henony niteny tamin’ny fiteny tsy fantatra sady nankalaza an’Andriamanitra ny hafa firenena. Tamin’izay dia hoy i Petera hoe:

⁴⁷— Azo sakanana tsy hatao batisa amin’ny rano ve ireto olona efa nandray ny Fanahy Masina tahaka antsika ireto?

⁴⁸Dia nasain’i Petera natao batisa amin’ny anaran’i Jesoa Kristy izy rehetra. Ary nangatahin’izy ireo kosa i Petera mba hitoetra eo aminy andro vitsivitsy.