Read Dikateny Iombonana Eto Madagasikara Asa 11 Bible Online

Asa 11 - Dikateny Iombonana Eto Madagasikara bible

Asa 11

¹Ren’ny apôstôly sy ny havana iray finoana tany Jodea fa efa nandray ny tenin’Andriamanitra koa ny hafa firenena.

²Ka nony tafaverina tany Jerosalema i Petera, dia nifandiran’ireo mpino jiosy

³nataony hoe: — Dia olona tsy voafora ve no niantranoanao sy niarahanao nisakafo?

⁴Fa notantarain’i Petera tamin’ny antsipiriany hatrany am-boalohany izay nitranga, ka hoy izy tamin’ireo mpino jiosy:

⁵— Tao an-tanànan’i Jôpa aho, ary sendra nivavaka indrindra no nisehoam-pahitana mahavariana. Nisy zavatra nidina avy any an-danitra: toa lamba lehibe voatana amin’ny zorony efatra, nalatsaka avy any ary tonga teo akaikiko.

⁶Nijery tsara sy nandinika ny tao anatiny aho, ka nahita ny biby mandeha tongotra efatra, ny bibidia, ny biby mikisaka amin’ny tany ary ny voro-manidina.

⁷Dia nisy feo henoko nanao tamiko hoe: «Mitsangàna, ry Petera; mamonoa ka mihinàna!»

⁸Ary novaliako hoe: «Sanatria, Tompoko! Tsy mbola nisy mihitsy zavatra fady na maloto niditra ny vavako.»

⁹Dia mbola heno indray ilay feo avy any an-danitra nanao hoe: «Izay efa nambaran’Andriamanitra fa madio, dia aza ataonao ho fady.»

¹⁰Intelo niverina izany, dia nakarina manontolo tany an-danitra indray ilay zavatra.

¹¹Tamin’izany fotoana izany indrindra dia indreo nisy olona telo lahy tonga tao amin’ilay trano nitoerako[106]: iraka avy any Kesaria hankatỳ amiko.

¹²Dia nitenenan’ny Fanahy Masina aho mba tsy hisalasala ny hiaraka aminy. Tafaraka tamiko tany koa ireto havana mpino enina nentiko eto aminareo ireto, ary niditra tao an-tranon’i Kôrnely izahay.

¹³Dia notantarain’i Kôrnely ny fomba nahitany tao an-trano anjely anankiray izay nanao taminy hoe: «Maniraha lehilahy any Jôpa haka an’i Simôna, izay antsoina koa hoe Petera.

¹⁴Hitondra teny hamonjena anao sy ny ankohonanao rehetra izy.»

¹⁵Vao nanomboka niteny aho, dia efa nilatsaka tamin’izy rehetra ny Fanahy Masina tahaka ny nilatsahany tamintsika tany am-boalohany koa.

¹⁶Tsaroako tamin’izay ilay tenin’ny Tompo hoe: «I Jôhany dia nanao batisa tamin’ny rano; fa ianareo kosa dia hatao batisa amin’ny Fanahy Masina[107].»

¹⁷Notoloran’Andriamanitra ny fanomezany isika rehefa nino an’i Jesoa Kristy Tompo; koa raha notoloran’Andriamanitra fanomezana mitovy amin’ny antsika ireo hafa firenena, dia iza moa aho no ho afa-manohitra an’Andriamanitra?

¹⁸Nony nandre izany ireo mpino jiosy, dia nitony ary nanome voninahitra an’Andriamanitra ka nanao hoe: — Marina fa nomen’Andriamanitra ny hafa firenena ihany koa ny hiala amin’ny toe-dratsy mba hahazoany fiainana.

¹⁹Niely patrana ny mpino noho ilay fanenjehana nitranga taorian’ny namonoana an’i Stefàna. Ny sasany dia tonga hatrany Fenisia sy hatrany Sipra ary hatrany Antiôkia, nefa tsy nitory ny tenin’Andriamanitra afa-tsy tamin’ny Jiosy ihany[108].

²⁰Nisy ihany mpino sasantsasany avy any Sipra sy avy any Sirena izay tonga tany Antiôkia ka niteny tamin’ireo Grika[109] koa, ary nanambara ny Vaovao Mahafaly momba an’i Jesoa Tompo.

²¹Nombàn’ny herin’ny Tompo izy rehetra ka marobe ny olona nino sy nitodika tamin’ny Tompo.

²²Nandre ny lazan’izany ny Fiangonana tany Jerosalema, ka naniraka an’i Barnabà hankany Antiôkia.

²³Hafaliana ny azy nony tonga tany ka nahita ny vokatry ny fahasoavan’Andriamanitra; ary nananatra azy rehetra i Barnabà mba tsy hiroa fo fa haharitra hiombona amin’ny Tompo.

²⁴Lehilahy tsara fanahy i Barnabà, sady feno Fanahy Masina sy vontom-pinoana, ka vahoaka maro no niandany tamin’ny Tompo.

²⁵Ary lasa i Barnabà naka an’i Saoly tany Tarsa.

²⁶Rehefa hitany izy, dia nentiny nankany Antiôkia. Nandany herintaona ngarangidina tao amin’io Fiangonana io izy roa lahy ary nampianatra vahoaka maro. Tao Antiôkia no voalohany niantsoana ny mpianatra hoe kristianina.

²⁷Tamin’izany andro izany, dia nisy mpaminany sasany avy tany Jerosalema nankany Antiôkia.

²⁸Isan’ireo i Hagabo izay notsilovin’ny Fanahy Masina ka nijoro nilaza fa hisy mosary be eran’ny tany tontolo. (Dia nitranga tokoa izany tamin’ny andron’i Klaody amperôra[110]).

²⁹Nanapa-kevitra ny mpianatra tao Antiôkia fa samy hanome araka izay nanambinana azy avy mba halefa hanampiana ireo havana iray finoana nonina tany Jodea.

³⁰Dia nataony izany ka nampitondrainy an’i Barnabà mbamin’i Saoly ho any amin’ny loholom-piangonana[111] tany Jodea.