Read Dikateny Iombonana Eto Madagasikara Asa 3 Bible Online

Asa 3 - Dikateny Iombonana Eto Madagasikara bible

Asa 3

¹Tamin’ny telo tolakandro, fotoana fivavahana, dia niakatra ho any an-kianjan’ny tempoly i Petera sy i Jôhany.

²Teo anoloan’ny vavahadin’ny tempoly, ilay antsoina hoe Itsaraendrika[37], dia nisy lehilahy malemy tongotra hatrany an-kibon-dreniny. Nentin’ny olona isan’andro ka napetrany teo izy mba hangataka fiantrana amin’izay olona miditra ao an-kianjan’ny tempoly.

³Hitan-dralehilahy i Petera sy i Jôhany efa ndeha hiditra ka nangatahany fiantrana.

⁴Izy roa lahy kosa nibanjina ilay kilemaina ary hoy i Petera taminy: — Jereo izahay.

⁵Dia nanao tsara jery azy roa lahy ity mpangataka satria nanantena handray zavatra avy aminy.

⁶Fa hoy i Petera taminy: — Tsy ananako na ny volafotsy na ny volamena, fa izay ananako no omeko anao: amin’ny anaran’i Jesoa Kristy avy any Nazareta, mitsangàna ka mandehana!

⁷Dia noraisin’i Petera ny tanan-kavanan’ilay kilemaina ary nasainy nitsangana izy. Natanjaka niaraka tamin’izay ny tongony sy ny kitrokeliny;

⁸niantsambotra izy dia nijoro ary nandeha. Niara-niditra tamin’i Petera sy i Jôhany tao an-kianjan’ny tempoly ralehilahy, sady nandeha no niantsambotsambotra ary nidera an’Andriamanitra.

⁹Nahita azy nandeha sy nidera an’Andriamanitra toy izany ny vahoaka rehetra,

¹⁰ka nony nahafantatra fa io indrindra ilay nipetraka nangataka teo amin’ny vavahady Itsaraendrika, dia tolagaga sy talanjona noho ny zava-nitranga tamin-dralehilahy.

¹¹Tsy nisaraka tamin’i Petera sy i Jôhany ralehilahy, koa sady tolagaga ny vahoaka rehetra no nirohotra nanatona azy telo lahy teo amin’ny lala-mitafo atao hoe «lala-mitafon’i Salômôna[38]».

¹²Raha nahita izany i Petera, dia niteny tamin’ny vahoaka hoe: — Ry vahoaka israelita, nahoana no gaga amin’izany ianareo? Nahoana izahay no banjininareo hoatra ny hoe herinay manokana na ny fitiavam-bavakay no nampandeha io lehilahy io?

¹³Ilay Andriamanitr’i Abrahama sy i Itsehàka ary i Jakôba, Andriamanitry ny razantsika, no nanome voninahitra an’i Jesoa ilay Mpanompony[39]. Natolotrareo tamin’ny manampahefana i Jesoa ary nolavinareo teo anatrehan’i Pilato, izay efa tapa-kevitra handefa Azy;

¹⁴ilay Masina sy Marina dia nolavinareo, ary lehilahy mpamono olona no nitakianareo famotsoran-keloka[40];

¹⁵ilay Mpitari-dalana ho amin’ny fiainana dia novonoinareo, nefa natsangan’Andriamanitra ho velona avy any amin’ny maty; ary vavolombelona manambara izany izahay.

¹⁶Nino ny anaran’i Jesoa ralehilahy izay hitanareo sy fantatrareo io, ka ny herin’ny anaran’i Jesoa no nampanjaka azy; ny finoana avy amin’i Jesoa no nahatomady azy tanteraka indray araka izao atrehinareo rehetra izao[41].

¹⁷Fantatro kosa, ry havako, fa tsy fahalalana no nahatonga anareo hanao izay nataonareo tamin’i Jesoa ary toraka izany koa ny manampahefana teo aminareo.

¹⁸Notanterahin’Andriamanitra tamin’izany anefa izay voalazany tamin’ny alalan’ny mpaminany rehetra fahiny hoe: tsy maintsy hijaly ilay Mesiany[42].

¹⁹Noho izany, ialao ny toe-dratsy[43], ary miverena amin’Andriamanitra mba ho foana ny helokareo;

²⁰dia ho tonga aminareo ny vaninandro famelombelomana avy amin’ny Tompo ary hirahiny ho anareo ilay Mesia efa voatendriny, dia i Jesoa.

²¹Kanefa tsy maintsy horaisin’ny lanitra aloha Izy mandra-piavin’ny fotoana hanavaozana izao rehetra izao[44], araka izay nambaran’Andriamanitra tamin’ny alalan’ny mpaminany masina hatramin’ny fahagola.

²²Fa hoy i Mosesy: «Hisy mpaminany tahaka ahy hajoron’ny Tompo Andriamanitrareo ho anareo[45], dia mpaminany avy aminareo samy ianareo; aoka hohenoinareo izay rehetra holazainy aminareo.

²³Izay rehetra tsy hihaino izany mpaminany izany dia haringana tsy ho eo amin’ny vahoakan’Andriamanitra intsony[46].»

²⁴Ary ny mpaminany rehetra izay niteny, hatramin’ny andron’i Samoela no mankatỳ, dia samy nitory izao andro izao.

²⁵Ho anareo ny fampanantenana nataon’Andriamanitra tamin’ny alalan’ny mpaminany, ary iombonanareo anjara ilay fanekempihavanana nataon’Andriamanitra tamin’ny razanareo fony Izy niteny tamin’i Abrahama hoe: «Ny taranakao no hitahiana ny firenena rehetra eto an-tany[47].»

²⁶Ho anareo aloha no nampijoroan’Andriamanitra ny Mpanompony sady nanirahany Azy mba hitahy anareo, dia ny hampiala anareo tsirairay avy amin’ny asa ratsinareo.