Read Dikateny Iombonana Eto Madagasikara Rômanina 12 Bible Online

Rômanina 12 - Dikateny Iombonana Eto Madagasikara bible

Rômanina 12

¹Ry havana, satria efa nanehoan’Andriamanitra ny hatsaram-pony isika, dia manainga anareo aho, mba samy hanolotra ny tenanareo ho sorona velona, voatokana ho an’Andriamanitra sady ankasitrahany. Izany no fanompoam-pivavahana tokony hataonareo.

²Aza miray lasitra amin’izao tontolo izao[80]; fa meteza hovan’Andriamanitra ka hihavao saina tanteraka, mba hahaizanareo mamantatra ny sitrapon’Andriamanitra: dia izay tsara sy ankasitrahiny ary lavorary.

³Noho ny tombon-tsoa nomen’Andriamanitra ahy, dia izao lazaiko aminareo tsirairay avy: aza mihevi-tena mihoatra ny tokony hiheverana ny tena, fa aoka samy hihevi-tena amim-pahendrena, araka ny anjara finoana nomen’Andriamanitra azy avy.

⁴Eny, ao amin’ny vatana iray, dia misy zavatra maro anisan’izany vatana izany kanefa tsy mitovy asa avokoa ireo.

⁵Dia toy izany koa: na maro aza isika, dia vatana iray ihany noho isika tafaray amin’i Kristy, ka mifampiankina toy ny ifampiankinan’ireo zavatra anisan’ny vatana iray ihany.

⁶Manana fanomezana samihafa isika, araka ny tombon-tsoa nomen’Andriamanitra antsika. Raha misy manana ny fanomezana hilaza hafatra avy amin’Andriamanitra, dia aoka hanao izany mifanaraka amin’ny finoana.

⁷Raha misy manana ny fanomezana hanompo, dia aoka hanompo. Ny mpampianatra, aoka hampianatra.

⁸Ny mpananatra, aoka hananatra. Ny mpizara, aoka hizara amim-pahatsoram-po. Ny mpahafoy harena, aoka hahafoy amin-jotom-po. Ny mpanao asa fiantrana, aoka hanao ny asany an-kafaliana[81].

⁹Aoka ny fitiavana tsy hisy fihatsarambelatsihy. Mankahalà ny ratsy; mifikira amin’ny tsara.

¹⁰Mifankatiava toy ny mpiray tampo; miezaha amin’ny fifanajana.

¹¹Mazotoa fa aza malaina. Aoka hafana fo amin’ny fanompoana ny Tompo.

¹²Mifalia amin’ny fanantenana; miareta amin’ny fahoriana, mahareta amin’ny fivavahana,

¹³mandraisa anjara amin’ny fanampiana ireo sahirana amin’ny samy vahoakan’Andriamanitra; mazotoa mandray vahiny.

¹⁴Miraria soa an’izay manenjika anareo; miraria soa fa aza manozona[82].

¹⁵Miaraha mifaly amin’izay mifaly, miaraha mitomany amin’izay mitomany.

¹⁶Miraisa hina; aza matimatim-boninahitra fa ny fanetren-tena ankamamiana. Aza manao ny tenanareo ho hendry[83].

¹⁷Aza mamaly ratsy ny ratsy, na amin’iza na amin’iza. Miezaha hanao ny tsara eo imason’ny olona rehetra.

¹⁸Ary raha azo atao, dia ataovy izay hihavananareo amin’ny olona rehetra.

¹⁹Aza mamaly faty, ry hava-malala, fa ny fahatezeran’Andriamanitra no avelao hiasa, satria izao no voalazan’ny Soratra Masina: «Ahy ny famaliana, Izaho no hamaly, hoy ny Tompo.»

²⁰Fa «raha noana ny fahavalonao, dia omeo hanina; raha mangetaheta, dia omeo rano hosotroiny; fa raha manao izany ianao, dia hanangona vainafo eo an-dohany[84].»

²¹Aza mety ho resin’ny ratsy, fa reseo amin’ny tsara ny ratsy.