Read Dikateny Iombonana Eto Madagasikara Rômanina 14 Bible Online

Rômanina 14 - Dikateny Iombonana Eto Madagasikara bible

Rômanina 14

¹Raiso ny malemy finoana, fa aza melohina ny heviny[88].

²Misy manana finoana matotra ka mihinana ny zavatra rehetra; misy kosa malemy finoana ka tsy mihinana afa-tsy zavamaniry.

³Izay mihinana ny zavatra rehetra, aoka tsy hanamavo izay mifady ny sasany; ary izay mifady kosa, aoka tsy hanameloka izay mihinana; fa Andriamanitra no efa nandray azy.

⁴Fa iza moa ianao no manameloka ny mpanompon’olon-kafa? Na mijoro izy na lavo, dia raharahan’ny tompony ihany izany. Hijoro anefa izy satria mahay mampijoro azy ny Tompo.

⁵Misy indray manavakavaka ny andro[89], misy kosa manao ny andro rehetra ho mitovy: aoka samy hatoky tsara ny ao amin’ny sainy avy.

⁶Izay mitandrina ny andro, dia ho an’ny Tompo no itandremany izany; izay mihinana, dia ho an’ny Tompo no ihinanany, satria misaotra an’Andriamanitra koa izy.

⁷Fa tsy misy amintsika velon-ko an’ny tenany ary tsy misy maty ho an’ny tenany.

⁸Eny, velona isika, dia velona ho an’ny Tompo; maty isika, dia maty ho an’ny Tompo: koa na velona isika na maty, dia mbola an’ny Tompo ihany.

⁹Satria maty i Kristy dia velona indray, mba ho Tompon’ny maty sy ny velona.

¹⁰Ianao kosa, nahoana no melohinao ny namanao? Ary ianao, nahoana no hamavoinao ny namanao? Fa samy hiseho eo anoloan’ny fitsaran’Andriamanitra isika rehetra,

¹¹satria izao no voalazan’ny Soratra Masina: «Raha velona koa Aho, hoy ny Tompo, dia handohalika eo anatrehako ny olombelona rehetra ary hiloa-bava avokoa hiaiky Ahy ho Andriamanitra[90]!»

¹²Noho izany, dia samy hampamoahin’Andriamanitra ny amin’ny tenantsika avy isika.

¹³Aoka mba tsy hifampitsara intsony àry isika. Fa aoka ianareo ho tapa-kevitra hanao izay tsy hahasolafaka ny namana amin’ny ratsy na izay tsy hitaomana azy amin’ny fahotana.

¹⁴Tafaray amin’i Jesoa Tompo aho ka fantatro ary azoko antoka fa tsy misy zavatra maloto fotsiny amin’izao, fa izay heverin’ny olona ho maloto no maloto aminy.

¹⁵Raha miteraka alahelo ho an’ny namanao ny fihinananao zavatra, dia tsy mizotra araka ny fitiavana intsony ianao. Aza simbànao amin’ny fihinananao zavatra ilay namanao fa efa maty i Kristy ho famonjena azy.

¹⁶Aoka tsy hampiteny ratsy ny sasany izay heverinao ho soa ho anao[91].

¹⁷Fa tsy izay mihinana na misotro no manana ny Fanjakàn’Andriamanitra, fa izay manao ny marina sy mikatsaka fiadanana ary mifaly ao amin’ny Fanahy Masina.

¹⁸Ka izay manompo an’i Kristy araka izany no sitrak’Andriamanitra sady ankatoavin’ny olombelona.

¹⁹Izay mampitombo ny fiadanana àry no aoka hokatsahintsika[92], mbamin’izay ifanampiantsika hiorina amin’ny finoana;

²⁰fa aza izay sakafo no handravanao ny asan’Andriamanitra. Eny, madio ka azo hanina avokoa ny zavatra rehetra, nefa kosa ratsy ny mihinan-javatra raha mahasolafaka namana amin’ny ratsy izany.

²¹Ny tsara dia ny tsy mihinan-kena na misotro divay na mikasika akory izay mahasolafaka ny namanao amin’ny ratsy.

²²Tano ho anao eo anatrehan’Andriamanitra izay itokianao ho marina. Sambatra izay tsy melohin’ny eritreriny amin’ny zavatra ankatoaviny.

²³Fa izay miahanahana dia melohin’Andriamanitra, raha mihinana, satria tsy vokatry ny finoana no ihinanany. Fa izay rehetra tsy vokatry ny finoana dia fahotana avokoa.